【2018年7月25號訊】
昨暝（24號），福州市普通高中做完第二輪錄取。
第二輪錄取由前日（23號）開始。普高第二輪錄取由普高第一條線逐降10分來錄取，一直遘第四條投檔線——525分。市區8個老牌一級達標校臺中，敆普高第一條投檔線懸頂無錄取完其福州二中、四中、高級中學也跟𡅏切出自家其最低錄取線。遘這辰候，8個老牌一級達標校普通班都已經錄完，並且公布了敆初中其定向生錄取線。
同時，一類校福州屏東中學、福州外國語學校、福州十八中也定下了最低錄取線。根據《福州日報》其數據，二中、四中、屏東中學、十八中等一類校其錄取線也跟𡅏變懸。
由定轉統其錄取線來看，今年「老八所」定轉統錄取線共統招線其分數差沰了仂囝。《日報》講，福一中2017年統招線共定轉統線差了10.5分，今年差8分；三中去年統招線共定轉統線差5.5分，今年差3分；附中去年統招線共定轉統線差6.5分，今年差5分。定轉統錄取線共統招線固接近，會表現定向生作用發揮固充分，剩餘指標比起以前沰了仂囝。
第二輪之後，福州普通高中其錄取工作就差不多結束了。如果敆最低控制線——也就是410分——無招滿其學校，可以敆8月其供需見面會選落取其學生。
消息來源
edit- 普高进行第二轮录取 “老八所”一类校普通班招满. 福州日報.