參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
【2018年7月28號福州訊】 今旦（28號）起五更早，茲芘世紀第一長其月全食敆天懸頂上演，同時固有「火星大衝」現象。中國境內其儂，伓使什乇設備，都會觀測遘茲蜀回其天象。
天文學臺中，「衝」表示蜀種相對其位置：三個天體敆蜀條直線懸頂，地球敆臺中，觀察到另蜀個天體（比如火星）共太阳呈現180度相反其位置。衝，也告衝日，火星衝日固是觀測火星第一好其機會。茲蜀回火星衝，火星敆近日点附近，就號「火星大衝」。
臨近農曆十五，暝晡月都野圓，野光。今旦起五更早其辰候，發生了本世紀歷時最长其月全食。維基新聞記者敆福州屏山公園停車場看見了總款其景象：2點24分初虧，月開始行裏地球其本影，慢慢變為紅色。
3點30分起，月食開始（食既），紅色其月全部都裏地球本影，紅色加深；4點22分，紅色第一深，這辰候固是月全食其高潮，月固敆向西南移動；5點13分月開始移出地球本影，四周紅色褪去，但是這辰候月已經落山，日頭馬上出來，僅長日出前其維納斯帶。全部其月食過程有104分鐘，嚽臺中閃亮其火星乞月食增色野価，野価天文愛好者早早安排好拍攝計劃，固有為了茲蜀回月全食新買了蜀隻大口徑望遠鏡其儂。維基記者了解遘，福州茲蜀回觀測條件野好，野価儂䀹月食，比如格致中學其學生就敆飛風山奧體公園觀測。
舊底科學𣍐發達，中國儂認為月食是「天狗食月」，𣍐吉祥，著敲鑼拍鼓除唻。現在，月全食已經𣍐驚儂，儂當伊做浩瀚宇宙其餽贈。
晨光熹微，月慢慢眠著地球其另蜀面，骹下其土地復迎來新其蜀工。
