【2019年10月24號訊】
日本天皇德仁拜二（10月22號）下晝著皇宮宮殿舉行其「即位禮正殿之儀」臺中宣告即位。伊著即位宣言其時候祈願國民幸福共世界和平，遵循《憲法》，作為日本國共日本國民統合其象徵履行職責。
德仁著今年5月1號即位，成為日本第126代天皇，日本正式行裏「令和」時代。年號是著4月1號公佈其。天皇明仁著4月30號退位，成為上皇。
拜二下晝德仁著「即位禮正殿之儀」開始之後，頌𡅏平安時代開始皇帝就會頌其黃袍行裏「松之間」 ，故爬上大概6.5米其「高御座」。皇后雅子頌𡅏傳統其衣裳「十二單」，接𡅏爬上「高御座」邊兜其「御帳臺」。德仁著「高御座」𡅏發表即位宣言。
由180幾隻國家行來其政要貴賓參加慶祝活動。東京警方動員了全國其警力去支援，部署了2萬6千隻警力戒備。
日本首相安倍晉三著德仁前斗讀號𡅏「壽詞」其祝詞，表示日本國民會銘記天皇登基誓言。安倍故帶領列席者齊去三呼萬歲。接下日本自衛隊鳴21響禮炮。宮殿裏勢有30臺顯示屏直播典禮，乞列席者看。
因爲颱風「海貝思」災害野嚴重，德仁天皇共皇后參加其巡遊「祝賀御列之儀」改遘下蜀月日10號做。
