【2019年2月23號福州訊】
2月22號暝晡其上下杭萬壽尚書廟野鬧熱，因為兩年蜀擺其尚書公送官船活動遘了。
-
由前首看官船 -
由後首看官船 -
官船前首其船囝
七點幾，十番樂隊開始奏樂。八點幾，官船由廟裡勢扛出。官船懸頂逢乇都有，共真其船㑚有大嫩其區別。船頭故有兩粒目珠。船扛遘溪墘之前，目珠著使筆篤囇。篤好了，介來幾隻儂蜀堆扛遘溪墘。十點，開始燒船，故無偌䀪，船就㑚長架架了。
-
官船扛遘河邊 -
開始點火 -
船火燒去
尚書公到底是底儂？伊名號陳文龍，莆田儂，是南宋時候其民族英雄。為了紀念伊，敆伊福州官邸其位處，企了茲座尚書廟。明清時候乞皇帝冊封為水部尚書。送官船，就是送陳尚書轉莆田。正工茲種活動，已經變成區級非物質文化遺產了，蜀代蜀代傳落。