【2018年10月31號福州訊】
今暝晡（10月31號），福州閩劇院帶𡅏新編閩劇《銀箏斷》行裏福建師範大學旗山校區青春劇場。嚽也是只蜀月日《銀箏斷》尾尾蜀回敆榕城高校巡迴演出。
-
尾尾蜀回彩排，演員確認自家其動作共臺詞 -
現場燈光也敆調試
下晝兩三點左右，閩劇院其演員共工作人員都遘了劇場，做尾尾蜀回排練，介改囇道具、燈光、演員倚其位置等等。
五點，演奏其儂也開始調音。「洞箫其声音是主声音啊！」「好，大提大提！」「琴對囇！」聽見管音響其儂其講話，每蜀隻儂依次試𡅏演奏，讓表演其時候配樂「無問題」。遘尾，管音響其告：「尾聲謝幕做囇！」大家齊齊演奏，先遘其學生也停下手裏勢其事計乞吸引去。試奏結束，聽遘「會使了！都OK！」，演奏其儂也放下手裏其乇，坐蜀堆攀講，等待暝晡其演出。
六點半，觀衆慢慢裏場了。有幾隻老儂坐着前首其位位懸頂。伊各儂對維基記者表示，伊儂平常間稠稠敆蜀麇聽閩劇，閩劇院俤所表演，伊儂也䟛遘俤所去。有蜀隻依姆，厝敆鼓樓，今旦也䟛來聽。伊各儂臺中有蜀隻依姆，女囝是閩劇院其儂，敆舞臺前首乞閩劇配音樂，故此幾隻老儂會及時得遘演出其信息。
現場學生來野価，其中有蜀隻張依妹，伊是泉州儂，做細細起就愛看高甲戲、傀儡戲。今旦伊是頭蜀回聽福州戲，就見覺盡去新奇。比如講閩南儂唱戲，配樂其都囥着舞臺後首，或者坐着邊首其房裏，固掛上席箔，就是讓觀衆覷𣍐着自家。但是做福州戲，配樂其坐着舞臺共觀衆之間，固共觀衆蜀樣面覷舞臺。幾隻老儂仈傳依妹由泉州來，固掏出蜀把牛奶糖塞乞伊食，講是做喜時候蜀把蜀把拋落來其，都掏去食無敆涉。張依妹介紹閩南唱戲其習俗，講若有「討食其」出場，下底就會拋碎錢囝乞伊，問福州有無總款。老儂應講有。攀講無偌𣆯，七點了，表演開始。
有蜀隻依媽帶了自家其囝聽戲，序幕蜀開始，許隻伲囝哥就覷𡅏拉二胡其師傅凝師。只蜀場結束，師傅也對伊彎囇骿講謝。
-
楊帥演男主角林旭，黃秀春演女主角沈鵲應 -
「大清國敗了」其消息傳來，男主固敆怨嘆、食酒 -
變法時候，林旭伓顧自家安危 -
林旭擔心老媽安全，讓伊去江寧 -
結束
閩劇《銀箏斷》是福州閩劇院新其作品。嚽也是中國國家藝術基金2017年度大型舞臺劇共作品資助項目。只蜀本戲是講「戊戌六君子」林旭共伊老媽沈鵲應其故事。沈鵲應出自三坊七巷其名門。這林旭雖然講厝裏野逼，但是盡去有才華。就總款，兩隻儂結婚去了。林旭仈曾裏京參加科舉，僅是講無中。兩年以來，日日食酒，乇都伓做。甲午海戰，中國乞拍敗。沈鵲應讓老公參加變法，伓通介怨嘆。林旭乞皇帝賞識，但是之後變法失敗。林旭乞搦起去刣去。沈鵲應仈傳，魂也䟛遘北京，跟𡅏老公行去。
雖然伓是歡喜其故事，但是臺中也有刺溪其話，讓觀衆大笑。比如第二場依貴共紫英耀女主沈鵲應，講「老媽討得好，伓使食補藥」。第三場林旭講皇帝聽𣍐會意自家講什乇，因爲伊腔野重。固有接落來紫英卜煮福州菜，慶祝林旭得遘皇帝賞識，就報了蜀段菜名，讓觀衆忍𣍐得去大告「哇」。僅是歡喜其時間野短，劇情發展遘後首，也有觀衆敆偷偷啼。就總款一直唱遘九點左右結束。謝幕其時候，觀衆鼓掌野𣆯無停動。之後有觀衆卜送花乞男主角，伊剃了講「伓使伓使」。遘尾儂共花拋上去，花也乞接住了。敆劇場外首，記者看遘固有蜀隻儂，手𡅏掏去蜀把其花，敆𡅏等演員出門。
《銀箏斷》編劇林瑞武仈曾對媒體表示，林旭是「戊戌六君子」臺中第一細其許蜀隻，之前無文藝作品共伊當主角。沈鵲應也是盡少乞關注其名門之后，仱只回戲讓兩隻儂都做了主角。
9月20號，只蜀本戲頭蜀回敆福建演出，演出其所在是福州鳳凰劇院。遘10月，敆福州其幾芘高校裏勢巡演。先後是福建工程學院、福建農林大學、福州職業技術學院，固有今旦其福師大，反響野好。遐辰候敆工程學院演完，固有學生䟛遘舞臺懸頂䀹相卜挃簽名。
消息來源
edit- 新编闽剧《银筝断》福建首演 演绎林旭与沈鹊应的生死爱情. 新浪新闻. 2018-09-20 [2018-10-31].
- 福州闽剧院. 2018年10月12日，国家艺术基金资助项目闽剧《银筝断》巡演首站亮相福建工程学院，受到师生们的欢迎。明日即13日还将继续演出，以飨师生. 新浪新闻. 2018-10-13 [2018-10-31].
- 福州闽剧院. 2018年10月13日，国家艺术基金资助项目闽剧《银筝断》巡演第二场迎来了又一批福建工程学院的老师和同学们，演出结束，同学们纷纷拥向演员签名留念，满满“追星”既视感. 新浪微博. 2018-10-13 [2018-10-31].
- 福州闽剧院. 2018年10月19日，国家艺术基金资助项目闽剧《银筝断》巡演第三站亮相福建农林大学。前期小型分享会正在进行中……精彩演出即将开始，欢迎同学们. 新浪微博. 2018-10-19 [2018-10-31].
- 福州闽剧艺术传承发展中心. 2018年10月19日，国家艺术基金资助项目闽剧《银筝断》巡演第三站亮相福建农林大学。今日即将启程前往福州职业技术学院开始第四场高校巡演. 新浪微博. 2018-10-22 [2018-10-31].
- 福州闽剧院. 2018年10月31日，国家艺术基金资助项目闽剧《银筝断》巡演，为福建师范大学的师生献艺. 新浪微博. 2018-10-31 [2018-11-01].