更正 — 2018年11月5號
展覽結束時間固未定下。
本底11月3號結束。展覽開始二十幾工，正正好閉館，野𣆯乍開門，故此延長展覽時間。
【2018年9月10號訊】
茲月3號，中國北京，中國國家博物館「大唐風華」展覽開幕。展覽共總做2個月日，11月3號結束。
展覽分去野価芘部分，分別是「文武安天下」「皇室其珍寶」「長安多麗人」「騎獵散歌塵」「大唐異鄉客」「學理共歸真」。
第一部分「文武安天下」，主題分去「文」共「武」兩芘。這「文」其代表，是三彩文官俑、深斑白玉帶、「翰林」蓋罐，等等。這「武」其代表，是三彩武官俑、水晶綴十字鐵刀、彩繪貼金騎馬俑等。固有兩隻儂其墓誌：蜀隻是唐儉，凌煙閣二十四功臣；蜀隻是馬璘，唐朝中期野有名其將領。
-
「皇室其珍寶」，鎏金刻花折枝團花紋銅碗 -
鎏金如來說法盝頂銀寶函，法門寺地宮出土，來自法門寺博物館 -
「李勉奉進」雙魚紋銀盤
第二部分「皇室其珍寶」揀去何家村窖藏其蜀套煉丹使其乇，固有法門寺地宮其蜀套茶具，作爲展示其重點。同時也擺去銀盤、銀盒、銀鋌等等乇，嚽都是遐時候地方懸頂各隻官員進奉其。
-
彩繪拱手女陶俑其頭部。嚽是中國國博自家其收藏 -
三彩拱手女立俑 -
鎏金摩羯紋銀釵其左邊 -
鎏金摩羯紋銀釵其右邊 -
描繪騎馬其女界其唐三彩 -
海獸葡萄紋葵花鏡 -
鎏金雙蜂團花紋鏤空銀香囊 -
螺鈿花鳥紋八出葵花鏡
第三部分「長安多麗人」，展出韋浩墓出土其《攜嬰飼鳥出行圖》，武惠妃敬陵出土其《捧包裹侍女圖》、《持如意侍女圖》、《男裝捧盒侍女圖》等等野価幅壁畫，固有展出永泰公主墓石槨拓片，總款去表現共歷史懸頂其他時代𣍐蜀色其唐朝女界。
第四部分「騎獵散歌塵」使《胡人打馬球圖》壁畫、《含光殿毬場石誌》，展現遐辰候拍馬球其樣式；使帶猞猁狩獵胡女俑展現遐辰候其狩獵；使伎樂紋八棱金杯、彩繪陶腰鼓女坐俑，展現遐辰候其樂舞。
第五部分「大唐異鄉客」，展出《胡人備馬圖》壁畫，也有野価件胡人俑、駱駝俑。
第六部分「學理共歸真」，展覽道教、佛教、祆教、景教其乇。
茲蜀回其展品都趁陝西來。其中野価件文物是頭蜀回離開原來其博物館，搬遘外首展出。譬如講陜西歷史博物館韓休墓其《高士圖》、武惠妃敬陵壁畫，西安碑林博物館其《蘇諒妻馬氏墓誌》、《米繼芬墓誌》，中國國家博物館其智藏禪師舍利函具，等等。
茲蜀回展覽由中國國家博物館共中共陝西省委宣傳部、陝西省文物局共同舉辦。陜西歷史博物館承辦，法門寺博物館、西安博物院、陝西省考古研究院、昭陵博物館、乾陵博物館、西安碑林博物館、西安市文物保護考古研究院、長武縣博物館協辦。
消息來源
edit- 國家博物館. 盛世大唐 绝代风华 “大唐风华”展览今日开幕. 微信公眾號.