【2018年8月18號上海訊】
今旦（18號），上海書展迎來頭蜀芘週末。書展敆上海展覽中心舉辦。
-
隊伍排遘銅仁路中部 -
噴霧蜀開，排隊其儂就舉手卜摸 -
買票後，維基記者行裏西一區其長廊
維基記者趁靜安寺地鐵站行出，卜過街，就看見對面隊伍沿𡅏路邊一直延伸。邊首蜀隻老儂都忍𣍐得去，使上海話大告：「隊會排茲滿長！」排隊其儂野価都𣍐仈奚勢排隊，排上以後，問身邊其儂，敆煞伊也𣍐仈，仱就互相問。邊首有志願者行來行去大聲講：「有票直接裏，無票介來排！」固有野価隻二哥嫩聲問：「挃伓挃票？伓使排隊！」茲蜀回書展8月1號開始賣票，上海各處其新華書店都可以買，固有網絡渠道。但是這辰侯網絡票已經賣澈去。過了蜀點半，維基記者乍行遘買票窗口。買遘票，復敆西一區其門前首排了仂𣆯，乍可以行裏。
-
豐子愷外孫宋雪君乞買書其儂簽名、畫畫 -
豐子愷外孫楊子耘乞書蓋章
杭州子愷藝術請來豐子愷其外孫宋雪君、楊子耘，乞買書其顧客簽名、畫畫。所賣其書將豐子愷其畫共古詩詞其原文、註解結合出版。
書展有中國其書，也有其他國家其書。外文書店賣其書，都是英語共日本話其。夫塊大部分都是小說。同濟大學出版社也有賣德語學習其書。茲蜀禮拜固是「國際文學週」，書展共總有請9隻中國以外其作家去參加活動。
書展裏勢伓啻有書，也有賣文具共活字。賣活字其攤位，擺去野価活字，都是儂其姓，嚽吸引盡価儂去揀自家其姓。
外文書店展區邊兜有上海圖書館其書架，儂會使市民卡借自家中意其書去讀。
有其作家也受遘邀請參加訪談，訪談室外兜儂圍去蜀環復蜀環。
書展15號開始舉辦，做遘20號結束。每蜀工活動做100場左右。
消息來源
edit- 2018上海书展 怎么逛？看主办方怎么说. 上海書展.