【2019年6月22號訊】
只幫中國大陸野価城市整治「儥規範」地名，拍算除唻「洋地名」或且「大地名」。浙江、廣東、海南等等地方先後開出單單。溫州也有超過兩百隻地名卜改，比喻講「歐洲城」改做「矮凳橋小區」，「中瑞曼哈頓」改做「中瑞曼哈屯」。福建漳州其東風大橋、琯溪大橋、南山大橋乞講「名稱刻意誇大」，着共「大」字除唻。仱福州也伓是例外。
前日（20號），福州其有關部門開了單單，裡勢伓啻「洋地名」，「田墘」「倉埕前」「倉邊埕」「康邊埕」也變做「怪地名」。者「墘」共「埕」，都是平話。故有其地名，正好敆儥蜀隻縣市名字蜀樣，故此也着改唻。
只回地名改完，墿牌着拆去做新其，已經登記其戶籍、不動產、工商註冊等等也着跟𡅏改，賣厝其廣告、電子地圖等等也着清理。按有關部門其講法，總款做是爲𡅏「淨化全市地名環境，延續福州地名文脈，發揮地名着繁榮中國特色社會主義文化、提升社會治理能力、滿足人民美好生活需要等方面其作用」。
下底就是許蜀張單單。下底其「大」意思是者名字野誇張，盡像講呵套。「洋」就是掏外首儂其名字或且地名做自家其地名。「怪」，是講使其字「儥規範」、意思比較「低級庸俗」、有「封建」其色彩。「重」就是正好敆儥蜀隻縣市名字做重複去。單單本底是寫普通話，仱下底直接翻譯做平話。
| 序號 | 儥規範其地名 | 俤蜀種地名 | 俤所儥規範 | 備註 |
|---|---|---|---|---|
| 1 | 海韻國際城 | 小區 | 大 | |
| 2 | 啓航・濱江國際 | 小區 | 大 | |
| 3 | 田墘 | 墿路 | 怪 | 無通名 |
| 4 | 成龍步行街 | 墿路 | 怪 | 儥適合 |
| 5 | 朝陽南路 | 墿路 | 重 | 倉山、長樂重名 |
| 6 | 21米路 | 墿路 | 怪 | |
| 7 | 政府路 | 墿路 | 怪 | 儥適合 |
| 8 | 壯元街 | 墿路 | 重 | 連江、臺江重名 |
| 9 | 橋樑路 | 墿路 | 怪 | 儥適合 |
| 10 | 學校路 | 墿路 | 怪 | 儥適合 |
| 11 | 皇恩路 | 墿路 | 怪 | 儥適合 |
| 12 | 堤壩路 | 墿路 | 怪 | 儥適合 |
| 13 | 祠堂路 | 墿路 | 怪 | 儥適合 |
| 14 | 山岔路 | 墿路 | 怪 | 儥適合 |
| 15 | 新村路 | 墿路 | 怪 | 儥適合 |
| 16 | 三盛・托斯卡納 | 小區 | 洋 | |
| 17 | 羅馬景福城 | 小區 | 洋 | |
| 18 | 恆宇首府 | 小區 | 怪 | 無通名 |
| 19 | 美和・天著 | 小區 | 怪 | 無通名 |
| 20 | 烏龍江畔 | 小區 | 怪 | |
| 21 | 倉埕前、倉邊埕 | 墿路 | 怪 | |
| 22 | 康邊埕 | 墿路 | 怪 | |
| 23 | 融信大衛城 | 小區 | 洋 | |
| 24 | 融信白宮 | 小區 | 洋 | |
| 25 | 融信西班牙 | 小區 | 洋 | |
| 26 | 交通路 | 墿路 | 重 | |
| 27 | 三木諾丁山首府 | 小區 | 洋 | |
| 28 | 東方紐約 | 小區 | 洋 | |
| 29 | 山姆小鎮 | 小區 | 洋 |
消息來源
edit- 陈海容. 福州30个不规范地名 或将更名. 海峡都市报 (8079) (福建日报报业集团). 2019-06-21: A1. CN35-0059 （中文（中国大陆））.
- 福州多个小区要改名！那房产证、身份证、户口本要不要改？. 东南快报 (搜狐). 2019-06-21. （原始内容存档着2019-06-21） （中文（中国大陆））.