踩地雷嘅遊戲版係一個分成一格格嘅長方形，每一格一係有、一係無地雷。
玩家可以用滑鼠左鍵或者右鍵去撳啲格仔。
左鍵：
- 如果撳落去嗰格係無地雷嘅話，佢就會開一個數字出嚟，表示呢一格上下左右同打斜夾埋八格入面有幾多個地雷。如果八格入面一個地雷都無，唔會顯示零，同埋會自動幫玩家撳開嗮周圍嗰八格。
- 如果撳落去嗰格係有地雷，遊戲即時結束，玩家輸咗。
右鍵：
- 喺一格空格撳右鍵，格入面會出現一枝旗仔，表示玩家覺得呢一格係有地雷，方便玩家記低作為之後嘅推理用。
- 喺一啲版本入面，對一枝旗仔撳右鍵會變成一個問號，表示玩家唔太肯定呢一格有無地雷。
左右鍵一齊撳：
- 如果一個格仔有數字，而且同周圍八格嘅旗仔數量一樣，電腦會自動幫玩家開嗮周圍嗰八格未開嘅格仔，等同於玩家逐格逐格撳左鍵。亦即係話，如果周圍嘅旗仔有標錯嘅話，咁樣撳係會輸咗個遊戲。
遊戲勝出條件係撳嗮所有無地雷嘅格仔，而唔係搵嗮啲地雷出嚟，即係話，用旗仔標嗮所有地雷出嚟係贏唔到遊戲嘅，相反，一枝旗都唔插但係撳嗮所有無地雷嘅格仔嘅話，係可以贏嘅。