法文係一種羅曼語，全球有大概一億三百六十萬人以佢為母語。如果計埋非母語者嘅話，全球就有成五億人識講法文。仲有，大概有二億人將法文當成一門外語噉去學。法文社群遍佈五十六個國家或地區，大多數法文嘅母語者住喺法國，其餘嘅就住喺加拿大（尤其係魁北克省）、比利時、瑞士、摩納哥、盧森堡，同埋美國嘅路易斯安那州同緬因州；大多數用法文做第二語言嘅人就住喺非州，呢啲人可以話仲多過法文母語者。法文係二十九個國家嘅官方語言之一，呢啲國家構成咗一個法語圈（La Francophonie）；佢亦都係聯合國同好多國際組織嘅其中一種官方語言。喺歐盟入面，有一億二百九十萬人（歐盟人口嘅百分之26）識講法文，當中有6500萬人係母語者，6900萬人將法文當成外語或者第二語言，令到佢成為歐盟第三多人講嘅語言（僅次於英文同德文）。
法文同意大利文、葡萄牙文、西班牙文、羅馬尼亞文同加泰羅尼亞文呢啲語言一樣，係由羅馬帝國嘅通用語言——拉丁文衍生出嚟嘅。