ناول گزر ڳئ گزران لکھت عبدالباسط بھٹی یونیورسٹی اچ داخلے دے بعد تھوڑے ݙینہاں اچ چھوہریں، چھوہر ہک ݙوجھے دے سونہیں تھی ڳے، ہک ݙوجھے دے نانواں دےواقف تھی ڳے ول ہر کوئ آپݨی فکر تے مزاج دےطالب علماں دا سنگتی ب٘ݨ ڳیا سیاݨے آھدن چندرے کوں چندرا سو کوہ تے ڳولیندے، نشائ، نشائ دا یار ہوندے، پڑھݨ آلے پڑھݨ آلیاں دے سونہیں تھی ویندن، ساݙی کلاس اچ ساݙے گروپ دا ؤݙ پردھان غلابی شاہ ہا، ھݨ تہاݙی مرضی گروپ سمجھو یا گینگ، میں پہلے عرض کیتے نینگر چٹا، گورا، سوھݨا ویس پاوݨ آلا، سونے تے سوہاڳا، پلے چار پیسے، ڳنڈھ دا وی پولا، ھا، کھل آلاوݨ آلا، درگاھی نظام دی پیداوار ہووݨ دے باوجود پڑھݨ آلا، سوچ ترقی پسند، مٹھا ملاوڑا، ساݙی اوندے نال چس بݨ ڳئ ہک سرخا ݙوجھا ٹیرر، ہیں سانگوں چار پنج طالب علم اوندے اڳوں پچھوں راھندے، جوان ہر کیہں نال احترام دا رشتہ رکھیا ہویا ھا، تساں ݙیکھو جمعیت دا نائیب ناظم دانش خاں ملے ذائ ساݙا نظریاتی مخالف ھا لیکن رات دے اندھارے ابوبکر ہاسٹل دے،، کامریڈ ھاوس،، اچ ساݙے نال ہوندا، دانش خاں وی دلبر نینگر ھا آپوں ڄاݨ او جمعیت دا ٹیرر ھا، آپݨے ݙکھ ݙؤل پاروں خوف ناک لڳدا ھا، لیکن ݙوجھے جماعتیاں دے مقابلے عدم تشدد دا حامی ھا، ساݙے نال شراب دی محفل اچ باقاعدہ شریک تھیندا، پیوݨ دے بعد آپݨی جماعت دے لیڈراں کوں مندے کڈھݨ شروع کرݙیندا، آھدا وؤے بھٹی صاحب آ،
سرخے ھوون تے بھانویں ساوے سارے ساکوں استعمال کریندن،
کلاس اچ کجھ چھوہریں وی ساݙے وانگوں
سرخیاں ھن، انھاں دی وݙیری،، ثمینہ،، ھئ، میں. پہلےعرض کیتے سرخیاں اچ سارے بشری عیب ثواب ھن لیکن او پڑھدے وی ٻہوں ھن، ساکوں میکسم گورکی دا جڳ مشہور ناول،، ماں،، وی غلابی شاہ پڑھایا بلکہ مان لغاری، وقاص تونسوی، تے اجمل نوناری. دے علاوہ میکوں وی گفٹ کیتا، ، جیڑھا میں پڑھݨ دے بعد،، ثمینہ،، کوں آپݨے دستخطاں نال دان کیتا،
ثمینہ دے علاوہ بہاول پور ڄلواݨیاں دی ہک چھوکری ھئ،، فرحانہ ڄلواݨہ، ݙوجھی ہک ھئ دیرے غازی غاں دی،، روبینہ بزدار، ہک تونسے دی چھوکری ھئ، ھݨ میکوں اوندا ناں یاد نی پیا آندا ھݨیں یاد آ ویسی ہا اوندا ناں ہا، زرینہ چچی، ٻہوں پڑھی ݪکھی تے سیاݨی چھوکری ھئ، اساں اونکوں،، چوچی،، سݙ دے چڑویندے ھاسے،،، چ،، اتے پیش پاء، تے شودی ٻہوں چنگی ھئ ، آھدی ھئ باسط بھائ، اللہ داناں منؤ، میں چچی آں،، چ،، اتے،، زبر،، ہے،، پیش،، کینی، اساں پٹھاݨ ہیں، اونکوں وی ثمینہ وانگوں کلاس اچ پٹھے سدھے سوال کرݨ دی عادت ھئ، ڈاکٹر امین صاحب سوال کرݨ آلے ٻالاں نال ٻہوں حٻ سک رکھیندے ھن، آھدے ھن ٻچہ جے تئیں سوال نہ کریسو تساں کجھ نہ سکھ سڳسوں، ساݙے کجھ جونئیر استادھن، انھاں کوں سوال جو کروں ھا او وٻل ویندے ھن، اساں آپݨی کلاس اچ چھݨ چھݨ آلے ݙیہاڑے سٹڈی سرکل کریندے ھاسے،. ٻہوں سارے سٹوڈنٹس آ ویندے ھوں زمانے سٹوڈنٹس اچ کجھ پڑھݨ کجھ ڄاݨݨ دی سک وی ھئ، اساں انھاں کوں سوشل ازم بارے لٹریچر ݙیندے، چھوٹے کتابچے ݙیندے، ساݙے کول ݙوجھیاں کلاساں دے طالب علم وی خوشی نال آندے، جݙاں جو جماعتیے طالب علماں کوں ڈرا دھمکا تے مسیت اچ گھن ویندے،تے سٹڈی سرکل کریندے، غلابی شاہ وانگوں،، ثمینہ،، دے نال وی ہر ویلے چار پنج چھوہریں ودیاں ھوندیاں ھن، ہک تاں او لیڈر ݙوجھا اوندا کھیسہ وی پر ہوندا ھا، ابا اوندا ایس پی ھا، کجھ ایں وجہ توں وی او پھنڈی ودی راھندی ھئ، ݙوجھا او ھئ وی پیؤ ماء دی کلھی، اساں ٻیا کجھ نہ ہفتے اچ ہک واری ضرور سرائیکی زبان تے ادب بارے ڈسکس کریندے ھاسے، یار، کیا زمانہ ھا چھوہریں، چھوہر تیاری کر آپݨے، آپݨے علاقے، شہر، وستی دے شعراء کرام تے ادیباں بارے جان کاری حاصل کرتے آندے، اساں سرخے ظلم دے نظام کوں بدلݨ چاھندے ھاسے طبقاتی نظام کنوں کریر کریندے ھاسے، اساں ساری دنیا اچ وسدے مزدوراں، پورھیت طبقے، تے کم کار دے اوقات اچ وقت دی پابندی منگدے ھاسے لیکن سچی ڳالھ اے جیڑھیلے اساں غلابی شاہ دے چمچے بݨ عشاء دے بعد ملتان کینٹ یا منڈوے تے فلم ݙیکھݨ ویندے ھاسے تاں، میں ایہ محسوس کریندا ھم جو اساں زورآور طبقے دی پوجا کریندے ہیں، وݙے بندے، میݙا مطلب اے طاقت تے اختیار آلے بندے نال ٹر، فوٹوں چھکوا فخر محسوس کریندے سے، بھانویں جو غلابی شاہ ساݙے نال فرق کائیناں کریندا ھا ساکوں ٹرویندا پھرویندا خرچے کریندا بعض دفعہ کینٹ کپڑے. گھنݨ جو ونجے ھااساں جیڑھے سنگتی اوندے نال ھوندے ھاسے ساکوں وی. ہک ہک جوڑا جوڑا کپڑیاں دا گھن ݙیندا ھا، جے کݙاھیں سپر سٹور اچ ونج وڑوں ھا آپ جو جینز دیاں پنٹاں گھندا ساکوں وی، ہک ہک گھن ݙیندا آپ جو پرفیوم گھنے ھا ساکوں وی ھک ھک،، شیشی گھن ݙیندا ھا،میں سوچیندا ھم یار، ایندے کول اتنی رقم کتھوں آندی اے ایہ تاں پتہ ھا جو ایندا ابا،، حضرت کھٻڑ فقیر، سہروردی، چشتی، رضوی، سعیدی، چکڑالوی دی درگاہ دا سجادہ نشین ہے لیکن ایہ پتہ نہ ھا جو درگاہ دی آمدنی اتنی زیادہ. ھوندی ھے، سچی ڳالھ اے غلابی شاہ ساݙے نال کݙاھیں فرق نہ کیتا، ول وی خیال آندا یار ایہ امیر غریب دا فرق کتنا وݙا ظلم ہے، ملاں ساکوں ݙسیندے ایہ سبھو اللہ سیں دی مرضی اے، ہک ہاسے دنیا دیاں ساریاں نعمتاں ݙوجھے پاسے مزدور کوں روٹی نہ ملے، ہک پاسے محل ماڑیاں ݙوجھے پاسے محل اسارݨ آلیاں دی جھڳی وی نہ ھووے، ملاں ساکوں ݙساوے میاں صبر کرو ایہ اللہ سیں دی ونڈ ہے، اڳلے جہان مزے کریسو، اساں سوچوں یار، ایہ اتھاں وی چس اچ ھن اڳلے جہان وی انھاں دے مزے ھوسن، اساں سوچوں اللہ سیں ایویں کیویں کر سڳدے، او تاں رحیم، کریم تے مہربان رب اے، خیر اساں سویرے سویرے اشنان مشنان کر، میس توں نرھان کر کلاس کیتے ہاسٹل کنوں نکلوں ھا تاں کامریڈ غلابی شاہ دی جیپ تیار کھڑی ھوندی ھئ، سب توں پہلے غلابی شاہ کمرے اچوں ٻاھر نکلےھا لیکن ٻاھر نکلݨ توں پہلےاو ساکوں لائین اچ کھڑا کر پرفیوم سپرے کرے ھا چھیکڑ اچ آپݨے سارے کپڑیاں تے سپرے کرے ھا، ٻاھر نکلݨ توں پہلے میں نعرہ مروینداھم، انقلاب زندہ باد سامراجیت مردہ باد غلابی شاہ شیر ہے باقی ہیر پھیر ہے کمرے کنوں ٻاہر آ پہلے کامریڈ غلابی شاہ جیپ اچ ٻاھوے ھا ول میں ول مانی لغاری ول وقاص تونسوی میں ھمیشہ کامریڈ دے نال اڳلی سیٹ تے ٻاھندا ھم، باقی مارکا پچھوں جیپ کیمپس آلے پاسے ٹردی میں گولڈ لیف دا ہک سگریٹ بکھا کامریڈ غلابی شاہ کوں پیش کریندا، ھم، کامریڈ جیپ چلیندا تے اساں لت تے ڄنگھ رکھ ٻاھندے اساں ایویں آکڑیج تے ٻھاندے ھاسے جو رھے رب دا ناں، جینویں جیپ ساݙی ھووے تے غلابی شاہ ساݙا ڈرائیور، لیکن کیا کروں او شکلوں وی معزز لڳدا ھا، . تے ہر کیہں کوں ہتہ ھا جو موٹر غلابی شاہ دی ھے تے اساں اوندے بستہ بردار ہیں، چھوہریں چھوہر ساکوں حسرت بھری نگاہ نال ݙیہدے تاں اساں اکڑیج ویندے، مچھاں تے پتھ پھریندے، سر دے وال انگلیں نال سدھے کریندے، چھک تے سگریٹ دا سوٹا لیندے، مانی لغاری ہر ویلے کھیسے اچ شیشہ کنگھی رکھیندا ھا کلاس وڑݨ توں پہلے اساں اوندے کنوں کنگھی شیشہ گھن آپݨے وال سیٹ کریندے ھاسے کلاس دے بعد ٻاھر جو نکلوں ھا اڳوں اڳوں کامریڈ غلابی شاہ، اللہ سیں دی قسم جوان رڄ سوھݨا ھا چھوہریں ھک واری پچھوں تے ول ضرور ݙیہدیاں ھن، اساں وی نال نال اکڑیج تے ٹردے ھاسے، آپݨے آپ کوں غلابی شاہ سمجھدے ھاسے، لیکن کتھ مہر علی کتھ تیری ثناء میں کیہں کیہں ویلے سوچیندا ھم یار باسط، اساں کتنے منافق ہیں ہک پاسوں طبقات دی ونڈ نسے منیندے ݙوجھے پاسوں ہک پیر دے پتر دے پچھوں چھڑا ایں ڳالھوں ٹردے ہیں جو اوندا کھیسا پر ھوندے، اساݙے تے وی خرچ کریندے، اساں ڄاݨ ڄاݨ تے اوندے نال نال اڳوں پچھوں پھردے ہیں تانکہ ݙوجھے طالب علماں کوں پتہ لڳے جو ایہ وی وݙے بندے ھن آخر غلابی شاہ نال جو ودے ھوندن، اساں ھک دفعہ سوشل ازم دی اھمیت بارے ہک پروگرام ستریا آپݨی پارٹی دے آڳواݨاں کنوں چنگی بھلی رقم کٹھی کر آیوسے سرخ رنگ دے جہازی سائیز پمفلٹ چھپ ڳے، کانڈھا تیار تھی ڳیا اساں رات ݙوں وڄے دے بعد ساری یونیورسٹی دیاں نشابر جاھئیں تے پمفلٹ لا ݙتے، ملتانوں ھک پینٹر چاء آیوسے تے یونیورسٹی دیاں کندھاں تے نعرے ایشیاء سرخ ھے سوشل ازم زندہ باد سامراجیت مردہ باد لکھیج ڳے سویرے کوئ ملاں بانگ ویلے تھکیے ھاریے واپس ہاسٹل آ ستوسے ساری رات دے تھکیے ھاریے ھاسے گھاٹی نیند رآ ڳی پروگرام رات عشاء دے بعد دا ھا، سویرے کوئ نوں وڄے وقاص تونسوی میکوں ٻانھ کنوں پکڑ آ جڳایا ،، وؤے کامریڈ اٹھی،، یار، خیر ھے کئیناں سیں خیر کائینی وؤے کیا تھے یار، اوجمعیت آلے آپݨے سارے بینر تے اشتہار پاڑ ڳن، کندھاں دی لکھائ تے چوناں پھیر ڳن، ہیں، وؤے انھاں دی،،،،،،،،،، اساں اٹھی ݙنڈکے چاء ٻھڄ پیوسے اڳوں موقعے تے کوئ ہتھ نہ آیا یونیورسٹی دی کلاس وی عجب جہان ھوندے وݨ، وݨ دی کاٹھی کٹھی ھوندی اے وستیاں ٹھٹیاں اچوں آوݨ آلے تے شہراں وسدے نینگر آپݨے ݙکھ ݙؤل کنوں صاف سنڄاتے ویندن، ویس پوشاک وی تے شکل صورت وی ݙس ݙیندی ھے،جو نینگر کتھوں دا ھے، ساݙی کلاس اچ اکثر کوئ نہ کوئ تقریب تھیندی راھندی ھئ، بھل سارے شعبیاں اچ کوئ نہ کوئ تقریب تھیندی راھندی کوئ سیمینار کوئ مشاعرہ، کوئ جھیڑا جھڳڑا، جینویں میں عرض کیتے اساں ڳالھ تاں طبقاتی نظام دی کریندے ھاسے لیکن سچی ڳالھ اے غلابی شاہ دی چمچہ گیری کریندے ھاسے، ایجھیں وی ٻہوں سارے نینگر ھن جیڑھے ساݙے کنوں وٹ تے راھندے، ھن، تے ساکوں چنگا نہ سمجھدے ھن، کجھ اݨ کھٹ محبت کرݨ آلے وی ھن، ایویں،، ثمینہ،، دا وی ھک گروپ ھا، ݙوں چار چھوہریں اوندے اڳوں پچھوں پھردیاں ھن، ھݨ اینکوں گروپ آکھو یا گینگ تہاݙی مرضی، جݙاں اساں کلاس دے بعد کمرے اچوں نکلدے تاں،، ثمینہ،، میکوں ݙیکھ، سیندھ تے ہتھ پھریندی، ایندا مطلب ھوندا میں برادری نال کنٹین تے ویندی پئ ھاں، اڈھائیں آ پیا،
ھݨ ثمینہ اڳوں اڳوں تے پچھوں اوندیاں سنگتاݨیاں یا چمچیاں سمجھو. تے انھاں دے پچھوں میں، مانی خاں تے وقاص تونسوی،سڑک تے آ اساں کٹھے تھی ٹردے، کنٹین تے ونج ہر کوئ کرسی چھک ٻہہ ویندا، چاء تے سموسیاں دا آڈر مل وینداں، ایں دوران، کتاباں، سیاست، سماجیات، جمعاتیاں تے مظالم، کھڑاند بازی،. دڑکے دٻاشے، تے ݙوجھے موضوعات تے ڳالھ مہاڑ تھیندی، ثمینہ ڈھیر ٻولیندی تے نال زرینہ چچی رل ویندی، ایݙوں مانی تے وقاص تونسوی ہر ڳالھ دی ولدی ݙیندے لیکن ثمینہ کیہں کوں ٻولݨ نہ ڈیندی،زرینہ ٻولیندی تاں مانی خاں تے تونسوی اوندے نال رل ویندے تے اوندی ہر ڳالھ دی تصدیق کریندے، او بھانویں سچی ھووے تے بھانویں کوڑی، ایہ تونسوی وی عجب لوک ھن، تونسہ، تونسہ ضرور کھیݙدن، انویں وی ہر علاقےدا بندہ، نینگر آپݨے علاقے دی ڳالھ تے آپݨے لوکاں دی حمائیت ضرور کریندے، ایہ فطری عمل ہے، میں اٹھݨ ویلے کھیسے اچ ہتھ مریندا، حالانکہ ایہ ڈرامہ ھوندا ھا، ساݙے پلے پیسے کھتوں آے، ساݙا بارا تاں یکا غلابی شاہ چیندا ھا ول وی ڈرامہ کرݨا پوندے، خالی مچھاں تے ہتھ پھیرݨ نال بندہ وݙا آدمی نی بݨ ویندا، میکوں ݙیکھ مان خاں تے وقاص تونسوی وی کھیسیاں اچ ہتھ مار فل ڈرامہ کریندے حالانکہ ثمینہ کوں سارا پتہ ھوندا ھا، فورن انھاں کوں آھدی، بھائ جان راھݨ ݙیو، ایہ وی تہاݙے پیسے ھن،
بھٹی صاحب،
میکوں کھیسے اچ ہتھ مریندا ݙیکھ ، ثمینہ ٹھک پک پرس کوں ہتھ مریندی، مانی خاں تے وقاص تونسوی چھؤ مار ویندے، ثمینہ پیسے ݙیوݨ دے بعد فاتحانہ انداز اچ مسک تے میکوں ڈہدی تے میں چپ کر سر سٹ ویندا، آکھیں، آکھیں اچ ڳالھ تھی ویندی جو. ایہ تیݙی تے تیݙے یاراں دی اوقات ھے،
کیا زمانہ ھا،
ھݨ تاں چھڑیاں یاداں ھن کیہں کیہں ویلے میں سو چینداں جے ساݙے پلے ٻلپݨ، نینگرپ تے ول جوانی نہ ھوندی تاں. آڄ اساں کتھ ھووں ھا لیکن قدرت اللہ سیں دی،جو اوں، ہر بندے کوں ایہ ݙینہہ نصیب کیتن، کو ئ امیر ھووے یا غریب اوندے پلے کجھ نہ کجھ تاں ضرور ھوندے تے ایہو بندے دی حیاتی داسمل ھوندے شکر اے ساݙے پلے یاداں دی ٻہوں ساری ڳوجھی ھے، جیڑھی ضرورت ویلے کڈھ اساں جیوݨ دی راند رسیندے ہیں،
ھوں رات جؤ تھئ اللہ دی مرضی سمجھ چپ کر ڳیوسے، گھر آلی آھدی رھے ڳئ نوید دا ابو، نرھان تاں کیتی ونجو، جیندے رات خرچے تھے ھوون، جئیں رات ساری جڳارا کٹیا ھووے، ھک ٻانھہ سرا ندی ݙیوݨ کیتے اٹھی اٹھی ٻاھوے لیکن کتھاؤں خیر دی خبر نہ آوے تاں ول سرخی وی بندوق دی گولی ݙسدی اے، میں بریف کیس چاء موٹر دی کنجی ہتھ پاء گھروں ٻاھر آیـم، چیتر رت ھئ اسلام آباد. پھلاں تے ساول نال چیتریا پیا ھا، لیکن میݙے کیتے سارا منظر سنج بر ھا، میں دفترپڄ کار پارک کیتم تے سدھا آپݨے دفتر اچ وڑ ڳیم، بریف کیس میز تے رکھیم زوردی آلس بھنیم کمپویٹر کھولیم تاں کمپیوٹر وی میکوں چڑوایا بھٹی صاحب، حال ݙیو رات کیا گزری، میں ایہ ڳالھ سݨ حیران تھی ڳیم یار اینکوں کیویں پتہ لڳ ڳے، میں اٹھی دراز اچوں ھک فائیل کڈھی تاں فائیل اچوں آواز آی نوید دا ابو، نوید حالی جاڳدا پے، میں حیران پریشان تھی ہتھ پچھوں. تے ھٹا گھدا اللہ سیں آں،
ایہ کیا تھیندا پے، میز تے ٻہہ سر پکڑ گھدم آکھ نوٹاں تاں بلائیں ڈراون، میں بغیر ارادے دے بل وڄائ تاں ندیم خاں بھڄدا آیا ہتھ جوڑ میݙے سامݨے کھڑ رھیا میں سر چاء اوں دو ݙٹھا تاں او کھلدا کھڑا ھا، مار اینکوں وی سارا پتہ لڳ ڳے، ٻولیا
جی سر ھاں بھائ، خیر ھے ندیم کیویں سر، ھݨیں تاں تساں گھنٹی کھڑکای اے اچھا جیا سیں، اچھا یار ھک کڑک چاء تاں بݨا آ، ٹھیک ھے سر لیکن آڄ ناشتہ نہ کریسو، کیا مطلب سر، آڄکل گھروں ناشتہ کر کے جو نیوے آندے، میں ھیں ڳالھوں پچھیے ھا یار، ایں کر تلوں کنٹین توں ݙوں روٹیاں تے چھولے گھدی آ، چاء ول بعد اچ بݨاویں آڄکل بجٹ نیڑے آندا پیا ھا دفتر اچ کم دا زور ھا، میں ناشتہ کر دفتر دا کم نبڑیا میکوں پتہ ھا جے کم کٹھا تھی ونجے تاں ول مصیبت بݨ ویندی اے، ݙوپہر کوں میں ول ھک چاء پیتی حالانکہ میں کوئ چاء دا ایݙا وی شوقین کائنی، دفتروں واندا تھئ دل آکھیا سدھا غلابی شاہ کول اوندے ہاسٹل ونجاں، ول دلیل پئ او تاں اسمبل دے اجلاس اچ ھوسی، میں بریف کیس چاتا تے ٹر پیوم لیکن ندیم خاں فورن آ میݙے ہتھوں بریف کیس گھن گھدا، تے میکوں کار تئیں چھوڑݨ آیا،. تے ٻولیا سر جی جی سر ڈھیر ݙینہہ تھی ڳن میں وستی نی ڳیا آڄ گھر آلی دا سنہیا آے، اوں آکھوا بھیڄیے توں ھک واری آ ونج تے مدت دی اڄڑی کوں توں آپ وسا ونج
تے مونجھاں لھا ونج توں ہیں من بھاندا وے یار
شالا خوش پیا وسسیں، میں اوندی مونجھ تے زاری سݨ آکھیا خان چوکھی چھٹی ھووے،سیں، بس ڈوں ݙینہہ، ݙوں ݙینہہ، میں ولدی ݙتی ندیم خاں
پتر توں ݙوں دی جاء چار چھٹیاں کر، میݙی ڳالھ سݨ او حیران تھیا تے پچھیس،
سر، کجھ فرماے وے میں عرض کیتی، پتر توں بے شک چار چھٹیاں کر، اوں خوشی کنوں ٹپ ماریا تے ٻولیا سر، تہاݙے ٻچے جیون، او شکر گزار تھی ٹرݨ لڳا تاں میں اونکوں پچھوں ہکل ماری، ھارن وڄایم تاں او واپس ول آیا جی سر پتر کوئ رقم لوڑ ھووی تاں او تھتھ ٻت کرݨ لڳا، میں کھیسے اچوں ݙوں ھزار کڈھ اونکوں ݙتم تے آکھیم ندیم خاں، تیݙے ٻال حالی چھوٹے ھن، لیکن میکوں لڳدے تیکوں وی رات رقم دی لوڑ پوسی، میݙی ڳالھ سݨ او شرم کر ڳیا تے ٻولیا سر، میݙی ذال بسم اللہ دے ویلے دی ھے، سدھی سادی ھے، ، سر، ساݙا خرچے دا مسلہ نی ھوندا جاء دا مسلہ ھوندے ساݙا ہک کوٹھا ھے اوندے اچ وی چار بندے راھندن،باقی سب خیر ھے، ، اچھا، اچھا ماشاللہ
خوش راھؤ، میں تیݙی ذال دی نی ٻالاں دی ڳالھ کیتی اے
ندیم میڈی ڳالھ سمجھ تے شرم کر ڳیا تے ولدی ݙتس سر، میݙے ٻال حالی چھوٹے ھن وقتی سم ویندن، میں اوں دو ڈٹھا تے آکھیم اللہ دی امان ھووی، ھا یار، جݙاں واپس ولیں تاں کوئ پنج ست کلو سوہانجڑے دا ٻاٹا ڳولی آویں، آڄکل سرمی جوبن تے ہے، کوئ پھندڑیں دے پھل وی ڳولی آویں، کوئ ھک ادھ دیسی چلہا، کوئ دیسی ککڑیں دے انڈے، بھاء لڳے مدت گزر ڳئ اے دیسی چلہے دا شوربہ وی نصیب نی تھیا، آڄکل ویلنڑیں لڳ ڳے ھوسن، کوئ ککوں دا ݙولا بھروائ آویں، حاضر سر، سیں دی نوکری کریساں میں کار سٹارٹ کر سدھا گھر آیم ٻال وی جیوون ھوون سکولوں ول آے ھن، میں کوٹھی دے ٻاہروں ونج ھارن ݙتا تاں نوید بھڄد آیا تے گیٹ آ کھولیس، ابو، اسلام علیکم، میں کوئ ولدی نہ ݙتی تے سدھا آپݨے کمرے اچ وڑ ڳیم، بیگم ݙٹھا جو پہلے تاں ڈرائینگ روم اچ آ ساریاں کوں سلام کریندا ھا، اللہ خیر کرے آڄ کیا تھی ڳس، بیگم گلاس پاݨی دا بھر میݙے کمرے اچ آئ تے بولی نوید دا ابو، ایہ گھنو پاݨی پیؤؤ میں وݪدی ݙتی گھر اچ کوئ کچلا سچلا کائینی ودا، میݙی ڳالھ سݨ بیگم ولدی ݙتی سیں اللہ نہ کرے، آڄ تساں کیجھیں ڳالھ کیتی اے کیوں خیر ھے، ھا خیر ھے جینویں تیکوں پتہ نہ ھووے، میݙی ڳالھ سݨ، اوں میں دو ݙٹھا تے ٻولی نوید دا پیؤ، جی میݙا کوئ قصور تاں ݙس نہ نہ، تیݙا کیا قصور ھے میں آپݨا کوٹ لہیندا کھڑا ھم بختاں آلی میکوں پچھوں چھک تے ڳلکڑی پاتی تاں میݙی ساری کاوڑ ویندی رھئ، میں سدھا تھی اونکوں غور نال ݙٹھا تاں ول میکوں چھک تے بھاکل پاتا تے ٻولی باسط، چس نال کس تاں ھوندی ای ، اڄاں میں پاݨی نہ پیتا تے نوید دی آواز آئ امی، امی کتھا ھیووے ایں دوران او کمرے اچ بھڄدا آیا تے آکھیس ابو، اسلام علیکم میں ولدی ݙتی پتر، واعلیکم سلام، جی سیں، کوئ حکم، اوں میݙے منہ دو ݙٹھا تے ٻولیا ابو، بھلا تساں میݙے نال ناراض ھیووے نہ پتر نہ، میں کیوں ناراض تھیواں ابو، آڄ تساں میݙے سلام دی ولدی نی ݙتی، میں ٻال کوں پکڑ ھاں نال لایا تاں اوندی ماء مسک تے کمرے کنوں ٻاہر نکل ڳئ