Wb/skr/چاکلیٹ

< Wb‎ | skrWb > skr > چاکلیٹ

چاکلیٹ

کہانی کار: جاوید آصف

سجاد ہک سرکاری دفتر وچ چپراسی ہا جݙاں ایندا پیو سروس دے دوران ہک حادثے وچ فوت تھیا اوں ویلھے سجاد بی اے دا امتحان ݙے تے رزلٹ دی انتظار وچ ہاـ سجاد دا پیو محکمہ تعلیم اچ ہیڈ کلرک ہا ـ اوندی وفات دے بعد سجاد دے چاچے غفور بھڄ دھرک کر تے ڈی ای او دے دفتر اچ سجاد دے چپراس دے آرڈر کرا گھدے اتے سجاد پڑھائی چھوڑ تے نوکری تے لڳ ڳیا ـ پیو دے بعد گھر دا وݙا ایہو ہا جیندے اتے ساری گھر دی ذمہ داری آ پئی ـ سجاد ایں دوران ہک بھیݨ جیرھی جو کنواری بیٹھی ہئی اوکوں پرنایا ـ چھوٹے بھرا صفدر کوں کالج اچ داخل کرایا ݙو سال بعد ماء دی آکھ تے آپݨی ہک مسات جیرھی جو چھوٹے لا دی ایندی منگ ہئی کوں آپݨی کنوار بݨا تے گھر گھن آیا ـ سجاد آپݨی تعلیم تاں اڳوں تے جاری نہ رکھ سڳیا ہا لیکن فارغ وقت اچ ہمیشہ کوئی نہ کوئی کتاب اوندے مطالعے وچ رہ ویندی ہئی سجاد دی کلثوم نال شادی کوں تقریبا چار ساݙھے چار سال تھیوݨ والے ہن اتے سلمان جیرھا جو اوندا پہلا پتر ہا ترائے سالیں کوں نبیڑی ودا ہا سلمان دے بعد سجاد دی ہک نکی ہئی جیرھی حالی تھنڄ پیندی پئی ہئی

ہک اتوار چھٹی دے ݙینہہ دیغر ویلھے سجاد کھٹڑے تے رڑھیا کوئی کتاب پڑھدا پیا ہاـ سلمان اوں کنوں شے دے پیسے آن منگیے اتے پیسے ملݨ تے او بھڄ تے ہٹی توں جیرھی شے گھن آیا ـ او انسانی شکل دی بݨی چاکلیٹ ہئی ـ اڄ کنوں پہلے سجاد ایں شیپ دی چاکلیٹ نہ ݙٹھی ہئی او ہک حساس بندہ ہا ـ سلیمان دے دکان توں واپس آوݨ دے بعد جیلھے کتاب توں اتے سر چا تے سجاد اوں ݙے ݙٹھا او اوں وقت انسان نما چاکلیٹ دے ݙوہیں ہتھ، ٻاہیں کھا چکا ہا اتے اوندی ہک لت بھن وات اچ پا اوندی گردن تے حملہ کرݨ والا ہا ـ سجاد کوں اوں ویلھے چاکلیٹ کھمدا پتر ایویں لڳا جیویں او کوئی آدم خور بلا ہووے اتے او چاکلیٹ کوئی جیندا جاڳدا ساہ بھریا انسان ـ سجاد وئی وللی اچ اوں ویلھے کتاب کوں اتھائیں پٹھا رکھ تے ایویں پتر ݙے ودھیا جیویں او اوندے قبضے وچوں اوں انسان جسم کوں جیرھا تقریبا کافی حد تئیں اوندے پتر دی خوراک بݨ چکا ہا دی جان بچواوݨ پیا چاہندا ہووےـ پر جے تئیں او پتر توݨی پڄدا تھیا اوندا پتر اوں انسان نما چاکلیٹ دی گچی لپور چکا ہا ـ سجاد جیلھے اوندی گردن اوندے تن توں جدا تھئی ݙٹھی تاں اوکوں کنڈیر چڑھ ڳئی ـ او پتر کوں دڑکے ݙیندا " وئے اے کیا کیتی " اہدا اڳو تے تھیا تاں ٻال ݙر کنوں بھڄ تے نال ٻیٹھی ماء دی جھولی وچ گھسڑ ڳیا اتے کنبدیں کنبدیں کاݨی اکھ نال حیران تھی تے پیو دے منہ ݙے ایویں ݙیکھݨ لگا جیویں اوں کنوں پچھدا پیا ہووے آخر میں غلطی کیا کیتی اے ـ سجاد دی گھر والی پئے دی حالت ݙیکھ تے پریشان تھی ڳئی آخر ٻیٹھیں ٻیٹھیں ایکوں کیا تھی ڳیا ہوسی؟  او ݙر توں کنبدے ݙکدے سلیمان کوں ہاں نال لیندیں سجاد توں پچھݨ لڳی ـ

اڑے کیا تھی ڳئی؟ خیر تاں ہئی؟

تیں کائنی ݙٹھا سلمان کیا کھندا ودا ہا؟

کیا کھندا ودا ہاــــــ!؟

چاکلیٹ ــــــ

ول کیا ہے؟ چاکلیٹ تاں روز کھمدے

چاکلیٹ دی شکل ݙٹھی ہاوی؟

روز ݙہدی ہاں ـ توں اصل ڳالھ کر، بجھارتاں کیوں پیا پیندیں

او چاکلیٹ اینجھی شکل دی ہئی جیویں کوئی جیندا جاڳدا بندہ ہووے

وت کیا ہے؟ بندہ ہا کائنا

توں کیا اہدیں او واقعی بندہ ہووے ہا ـ تیں ݙٹھا کائنی اوندے سارے انگ ایویں ہن جیویں انسان دے ہوون

اتنا ویڑا کیوں پیا تھیندیں؟  شے ہے ٻئے وی تاں سارے ٻال کھمدن

او وی غلط کریندن ـ نی کھاوݨی چاہیدی

ہنیں کوں کیوں نوھی اہداجیرھے رکھی ٻیٹھن  یا جیرھے اینجھیاں شئیں بݨیندن ـ ٻالیں شودیں دا کیا قصور اے؟

انھیں کوں وی آکھساں ـــــ

اصلوں ڳالھا تھی ڳئیں آ ـ ـ ـ اے کوئی ڳالھ اے جیرھا سݨسی اوہو ڳالھا ـــــ ڳالھاــــــ کریسی

آکھن پئے، جیرھا کجھ میں سوچیندا پیاں توں او توݨی نوھی پئی پڄدی ــــــ

میں پڄݨ نمھی چاہندی ـ ساریں کنوں وݙا پڑھیا لکھیا تاں توں تھیوں ـــــ ٻے کہیں کوں کہیں شے دا پتے ـــــ چنڳے بھلے کھلدے کھیݙدے ٻال کوں لحظے وچ روا ٻلہائے اوترے

"آ ابا آ میں تیکوں ݙوجھی چاکلیٹ چھل ݙیواں " کلثوم نکے کوں نال لیندی کوڑیج تےکمرے وچوں ٻہر نکھتی ڳئی ـ

سجاد کولر اچوں پاݨی دا کلاس پی تے سوچݨ ٻہہ ڳیا "پتہ نی لوکیں کوں کیا تھی ڳئے ـ اینجھی چاکلیٹ تیار کرݨ والےکمپنی مالک آخر اے کیوں نہ سوچیندے ہوسن جو اینجھیاں شئیں بݨا تےاساں ٻالیں دی حساسیت ختم کر تے انھیں کوں پتھر دل پئے بݨیندوں جیرھے ٻالیں کوں اساں ہݨے ری  کہیں انسانی پتلے دیاں لتاں ٻہیں تروڑݨ  اوندی کچی مروڑݨ  یا اوکوں آپݨی خوراک بݨاوݨ دا ہیلکا کریسوں او وݙے تھی تے کیا کریسن ہنیں وچ احساس اتے انسانی ہمدردی کتھوں آؤسی؟

کاش میں اینجھیاں فیکٹریاں بند کرا سڳدا ـــــ