پیراسائیکالوجی edit
لکھت:الشیخ خواجہ شمس الدین عظیمی
نانواں:
روحانی طالب علماں دے ناں
ناشر دی عرض edit
ممتاز روحانی اسکالر مرشد کریم حضرت خواجہ شمس الدین عظیمیؔ نے ویہہ سال پہلے نوع انسانی کوں پر سکون زندگی توں آشنا کرݨ کیتے ہک تحریک دا آغاز کیتا ہئی۔ ایں سلسلے اچ انہاں نے قومی اخبارات اچ کالم لکھے، کتاباں تصنیف کیتے۔ روحانی ڈائجسٹ کراچی،پاکستان تے روحانی ڈائجسٹ انٹرنیشنل اردو، انگلش برطانیہ توں جاری کیتا۔
پاکستان دے چھوٹے وݙے شہراں تے برطانیہ، امریکہ، کینیڈا، فرانس، بھارت، متحدہ عرب امارات دے ٹیلی ویژن، ریڈیو تے انٹرویو نشر تھئے۔ وݙے وݙے ہالاں اچ تقریراں کیتے۔
ہک مربوط تے منظم روحانی پلیٹ فارم تے پاکستان تے بیرون پاکستان ممالک اچ مراقبہ ہال دے ناں نال خانقاہی نظام قائم کیتا۔ ایں وقت پاکستان تے بیرون ممالک اچ ۸۳ مراکز (مراقبہ ہال) خدمت خلق وچ مصروف ہن۔
میݙے مرشد کریم تے حضور قلندر بابا اولیاءؒ دے فیض تے سیدنا حضور علیہ الصلوٰۃُ والسلام دی رحمت نال اللہ تعالٰی دا خصوصی کرم ہے کہ انہاں دے پیغام کوں نہ صرف اللہ دی مخلوق نے سݨا بلکہ ایندے تے عمل وی کیتا۔ نتیجے وچ لوگاں دی ہک بڑی تعداد پر سکون زندگی گزریندی پئی ہے۔
حضرت خواجہ شمس الدین عظیمی دے مرشد کریم حضور قلندر بابا اولیاءؒ دی رباعی دے مطابق:
ساقی کا کرم ہے میں کہاں کا مے نوش
مجھ ایسے ہزارہا کھڑے ہیں خاموش
مے خار عظیم برخیا حاضر ہے
افلاک سے آ رہی ہے آواز سروش
عظیمی بھیݨ بھرواں دے شب و روز سرور و کیف نال مامور ہن۔
مرشد کریم خانوادہ سلسلہ عظیمیہ نے 1980ء توں 1982ء تک روحانی اسباق تے پیغمبرانہ طرز فکر نال متعلق جیہڑے لیکچرز ݙتن انہاں وچوں چند لیکچرز ‘‘پیراسائیکالوجی‘‘ دے ناں نال قارئین دی خدمت اچ پیش کیتے ویندن۔ میکوں یقین ہے کہ موجودہ تے آوݨ والی نسل کیتے ایہ لیکچرز مشعلِ راہ بݨسن تے انہاں نال نوع انسانی دے علم اچ قابل قدر ذخیرہ تھیسی۔ میݙا مشاہداتی تجربہ ہے کہ ایں علمی ورثے کوں اگر یکسوئی تے ذہنی تفکر دے نال پڑھا ونڄے تاں قاری کیتے ماورائی دنیا دے دروازے کھل ویندن۔
کتاب پیراسائیکالوجی دی ودھدی ہوئی مقبولیت دے پیش نظر ایں کتاب دی اصل کوں جیہڑی کہ مرشد کریم نے تجویز فرمائی ہئی برقرار رکھا ڳئے۔ امید ہے کہ کتاب دا ایہ نواں ایڈیشن تہاکوں پسند آسی۔
میاں مشتاق احمد عظیمیؔ
روحانی فرزند
حضرت خواجہ شمس الدین عظیمیؔ
مراقبہ ہال۔ ۱۵۸ مین بازار مزنگ لاہور
تندیر
تکوین تے ارشاد edit
جیہڑے ویلے اساں کہیں علم دا تذکرہ کریندے ہیں تاں اوں علم کوں سمجھݨ کیتے ݙو ڳالہیں اہمیت رکھدن۔ پہلی ڳالھ ایہ ہے کہ علم دی تھیوری ساکوں معلوم ہووے تے اوں علم دی تکمیل ایہ ہے کہ اساں علم دے اوں شعبے کوں مظاہراتی خدوخال نال ݙیکھوں۔ مطلب ایہ تھیا کہ علم، تھیوری تے پریکٹیکل دے مجموعے دا ناں ہے۔ دیگر علوم دی طرح روحانی علوم وی ہیں بنیاد تے قائم ہن یعنی علم دی تھیوری اچ قاعدے، ضابطے، فارمولے تے انہاں فارمولیاں کوں جانچݨ کیتے پریکٹیکل کرایا ویندے۔ علم ݙو طرح نال سکھا ویندے۔ ہک طریقہ ایہ ہے کہ پہلے تھیوری معلوم کیتی ونڄے تے اوندے قاعدے تے ضابطے معلوم کیتے ونڄن تے اوندے بعد اونکوں پرکھا ونڄے۔ ݙوجھا طریقہ ایہ ہے کہ براہ راست تجرباتی عمل شروع کیتا ونڄے۔
مثال:
ہک آدمی استاد دی زیر نگرانی درکھاݨ دا کم سکھدے تے اوہ کرسی بݨا گھندے۔ ایندے برعکس ݙوجھا آدمی پہلے ایں علم دی مبادیات توں واقفیت حاصل کریندے تے ول کرسی بݨیندے۔ اوں ݙوجھے آدمی کوں ایہ ڳالھ معلوم نی ہوندی کہ کیہڑے درخت دی لکڑ کتنی اچھی ہے۔ اوں لکڑ دے اندر پاݨی دا کتنا تناسب ہے۔ لکڑ دے اندر رڳاں تے نساں دا ڄال کتنا ہے۔ لکڑ دے ہک مربع فٹ اچ کتنا وزن ہے۔ اگر ایں لکڑ کوں پالش کیتا ونڄے تاں کتنی چمک آسی۔ رنگ کیتا ونڄے تاں کیہو جیہی صورت نکلسی۔ لکڑ دی طبعی عمر کتنی ہے۔ اینکوں کیڑا لگدے یا نئیں وغیرہ۔
بہت سارے ڳالہیں ایسے ہن کہ براہ راست تجزیہ کرݨ والے شاگرد کوں معلوم تھی ویندن۔ علم دی مبادیات کوں سمجھݨ والا انجینئر سݙیندے۔ کرسی درکھاݨ وی بݨیندے تے کرسی انجینئر وی بݨیندے لیکن انجینئر دی حیثیت بہرحال اپݨی جگہ اہمیت دی حامل ہے۔ علم دی تریجھی شکل ایہ ہے کہ ہک آدمی تھیوری وی جاݨدے لیکن اونکوں کوئی تجربہ نی۔ ایں صورت وچ او آدمی جینکوں تجربہ ہے، اوں آدمی توں زیادہ باصلاحیت قرار پاندے جیہڑا تھیوری تاں جاݨدے لیکن اونکوں تجربہ نی۔