Wb/skr/میم کریم

شاعر

حافظ واحد بخش جوگی

جھوک پبلشرز دولت گیٹ ملتان

0308-7385765،  061-4511568

سبھے حق ہتھیکڑے ہن

ناں کتاب  : :میم کریمﷺ

شاعر.  : :حافظ واحد بخش جوگی

اَہر اشاعت : :قاری رفیق سعیدی،قاری عبدلستارخورشیدی

چون  : :قاری یامین فیضی،ڈاکٹرعبدالقدوس،حافظ شمشاد فیضی

ترتیب  : :حافظ سرفراز،عبدالستار خان چانڈیہ،محمد شکیل سیرانی

               :محمد باقر،وقاص احمد

کمپوزنگ  : :سرائیکی کمپوزنگ سنٹر نور شاہ(واجدؔتھلوی)

ٹائٹل  : :واجد ؔتھلوی

سنِ اشاعت: :2018ء

تعداد  : :1000

مُل  : :20 روپے

چھاپہ خانہ :  : جھوک پرنٹرز ملتان

== شاعر دا تعارف ==

اصل ناں  : :حافظ واحد بخش

قلمی ناں  : :حافظ واحد بخش جوگیؔ

ولدیت  : :اللہ بخش

جمݨاں.  : :1971ء

ڄم پل  : :چک نمبر 524TDAنزد دربار نور شاہ

آغاز ِ شاعری: :1996ء

استادِ شاعری: :سئیں مشتاق سبقتؔ

کتاب  : :میم کریمﷺ

پیشہ  : :قرآنی درس و تدریس

فون نمبر  : :03447960274

جاہ پتہ  : :چک نمبر524TDAنزد دربار نور شاہ

               :تحصیل کوٹ ادو (مظفر گڑھ) 

انتساب

اپݨے ولدین

تے

وݙے بھراء ہزارہ خان عرف محمد افضل (مرحومین) دیاں 

روحاں دے ایصالِ ثواب واسطے

دعا

اُنویں تاں شعراء ڈھیر سارے ہن جیڑھے اپݨے اپݨے شعور دے دے مطابق مختلف موضوعات تے اشعار لکھدے پئے ہن۔تے ہمیشہ لکھدے رہسن۔مگر اساں سب توں بہتر مقام اُنہاں شعراء کوں ݙیندے ہیں جیڑھے جو

سرکارِ ہر دو عالم،نورِ مجسم حضرتِ محمد ِمصطفےٰ ﷺدا شان لکھدن۔

تے ݙوجھے نمبر تے اوہ شعراء دل کوں ٻہوں بھاندن جیڑھے کلمہءِ حق آہدیں ہوئیں دھرتی دے سُتے ہوئے لوکیں کوں جڳیندن۔ساݙی مراد جیویں قلندر پاک حضرت علامہ محمد اقبالؒ سئیں ہن۔خیر اڄ دی ایں تحریر دا موضوع سئیں واحد بخش جوگی ؔ دی شاعری ہے تاں اے ڳال اساں پہلے کر چکے ہیں جو سرکار دی نعت لکھݨ آلے شعراء عظیم شعرا ہوندن دعا ہے اللہ کریم اپݨے پیارے حبیبؐ دے طفیل اُنہاں دی سوچ، فکرتے شعور وچ اضافہ فرماوے تے کامیابی اُنہاں دے قدم چُمدی رہے۔آمین ثم آمین!

حمد

تیݙی حمدلکھیندیں لطف آندےتیݙی حمدحمید، قدیر لکھاں

تیݙی ذات لکھاں اسرار بھری الغیب، علیم، بصیر لکھاں

توں ہر دا نعم المولا ہیں تیکوں نعمت دان کبیر لکھاں

ہر حرف اچ یکتا ذات تیݙی،تیݙی وحدت دی تفسیر لکھاں

شہکار ہن تیݙی قدرت دے اے بھوئیں تیݙی اَسمان تیݙا

توں خالق،مالک،رازق ہیں ہے جوگی جُمل جہان تیݙا

٭٭٭

(ہِک)

ہک دی سینے سِک رکھ جیویں ہک ہے ہک انمول

ہک دے ناں کر ہر شئے اپݨی ہک توں جندڑی گھول

ہک دے ٻاجھ نی ݙوجھا کوئی جمل جہان پھرول

ہک دے ݙیکھݨ کیتے اپݨے دل دی تاکی کھول

ہک دی ہِکّا جاہ اے سوکھی پھِر نہ مسجد مندر

ہک کوں جوگیؔ ڳولݨ کیتے پھول توں اپݨاں اندر

٭٭٭

(ݙوہڑے)

ہے اکھیاں عکس مدینے دا ودے اپݨے ذوق اچ جھُمدے ہیں ایویں جھُمدیں جھُمدیں مستی وچ ونڄ روضے پاک کوں چُمدے ہیں

ول گنبد پاک دی چھاں تلّے بے فکرے تھی کے سُمدے ہیں دل جوگیؔ شہر مدینہ ہے ودے شہر مدینے گھُمدے ہیں

٭٭٭

ہا وقت سحور سوار دا ڈینہ سئیں ؐ گھر مطلب دے آیا ایویں آندیں کرم کریندا اَئے عبداللہ پاک دا جایا گئے کفر اندھارے مِٹ سارے ہر پاسے نور سمایا واہ جوگی سئیت حلیمہ ؓ دے جئیں پاک نبیؐ کوں چایا

تیڈی شان بیان کرن کیتے میں لفظ گولیندا رہ وینداں لَبھ ہک ہک لفظ دے موتی کوں ہر سطر سجیندا رہ وینداں کئی قافیں نال ردیف ملا گنڈھ تروپ کریندا رہ وینداں میکوں جوگی بیا کم کئی نئیں تیڈی نعت لکھیندا رہ وینداں

٭٭٭

ہک تیڈی یاد ستیندی ہے بیا اصلوں فکر تے غم کائینی تیڈی دید دیدار دی سک ہے بس بیا دل اچ درد الم کائینی تیڈی نعت لکھن دے باجھ کتھائیں میڈا چَلدا محض قلم کائینی جتھ آوے جوگیؔ ناں تیڈا، میڈا چُمن سِوا بیا کم کائینی

دل اَہدے اکھیاں ٹھر پوون جُل سئیں ؐ دا در دربار چُموں ہک وار چُموں نہ سِک لہوے ول رج رج کے کئی وار چُموں راہوے ہوش نہ بالکل کہیں شئے دا تھی مستی وچ سر شار چُموں جِند نکلے جوگیؔ ہوں ویلے جڈاں جالی پاک دی تار چُموں

٭٭٭

سر سجدے نیر ہن اکھیاں توں اج کر منظور دعاء سئیں ؐ آں پُر عیب ہیں معافی منگدے ہیں ساڈی کر ڈے معاف خطا سئیں ؐ آں تھک پئے ہیں جگ دے رولیاں توں ساکوں اپنے کول سڈا سئیں ؐ آں سِک جوگی ؔ دل وچ ڈاڈھی ہے ساکوں در دربار ڈِ کھا سئیں ؐ آں

دِل ڈُسکیاں بھر کے اَہدی ہے میکوں گھِن جُل یار مدینے وچ میں منظر پیارے ڈیکھنے ہن او پُر انوار مدینے وچ جِتھ پڑھن ملائک سلام آندن نت جوڑ قطار مدینے وچ اِتھ تہوں نئیں جوگیؔ دل لگدا میڈا ہے دلدار مدینے وچ

٭٭٭

کچھ گودڑی ہتھ وچ کاسہ چا میڈا دل اَہدے اج خیر پِنّاں تھیوے عشق نبیؐ وچ حرص ایجھاں میں حد توں ودھ کے ڈھیر پِنّاں ہر گلی کوچہ نئیں پنناں نہ پھِر پھِر چار چوفیر پِنّاں بس جوگی در محبوبؐ اُتے اَڈ جھولی شام سویر پِنّاں

نہ شکل شعور نہ گُن پلے بے عملی تے بد کار ہِمّی ہاں چیز ناکارہ دنیاں دی ہر کار کنوں بے کار ہِمّی بس پھول نہ میڈے عیباں کوں میں اصلوں اوگن ہار ہِمّی ہتھ جوڑ کے جوگیؔ آکھساں میں سئیں ؐ بخش ڈیوو گنہگار ہِمّی

٭٭٭

منگ منگ جیویں منگ منگتا بن نہ کر کئی محض غرور توں منگ منگ منگن دا جے چج آندائی اج سمجھ،سوچ، شعور توں منگ منگ منگ نہ دنیاداریں توں اونویں جوگیؔ خیر ضرور توں منگ تیکوں زندگی بھر نہ تھوڑ آسی ہک واری ڈیکھ حضوؐر توں منگ

سئیں ؐ سڈ مارن میں بھج پوساں نہ ڈیکھساں ٹبڑے ٹوڑھے توڑے کنڈے لگسن پیریں کوں سب جھاگساں لانگھے لوڑھے نہ رہسن یاد اے بھُل ویسن میکوں ہجر فراق دے چوڑھے جڈاں جوگی ؔمِل محبوبؐ پوسی اوندے وصل دے گاساں ڈوہڑھے

٭٭٭

میں پننی پنّن دے کیتے نت کر ترلا چار چودھار پُنی ہر در تے دستک ڈے ڈے کے اَڈ جھولی کئی کئی وار پُنی کچھ گودڑی ہتھ وچ کاسہ چا میں رو رو ہکلاں مار پُنی ہوں ڈینہ توں جوگیؔ رج تھی پئے جڈاں سئیں ؐ دے در دربار پُنی

بھانویں دُر دُر کر میں نئیں ویندی تیڈے در تے ول ول پئی رہساں ہک زندگی دا پل نِبھ ویسی ایں سوچ تے پل پل پئی رہساں تھیوے خَس خیرات دا دان متاں میں جھولی جھل جھل پئی رہساں نی چھُٹدا جوگی در تیڈا دہلیز کوں مل مل پئی رہساں

٭٭٭

ایں ظلم تے جبر دی منڈی توں کائنات دا چونواں گُل گھن اَئے کر سودا نال اُمیّہ دے ایہو عشق معطر پھُل گھن اَئے رکھوالا پاک شریعت دا اسلام دی قیمت کُل گھن اَئے تھیا جوگیؔ خوش محبوبؐ بیٹھے صدیقؓ،بلالؓ کوں مُل گھن اَئے

جیکوں یمن دے لوک نہ جاندے ہن او شکلو ں کملا بھولا ہا ہا محض فقیر، ہس حال زہیر اوندے گل وچ عشق دا رولا ہا محبوبؐ دی جوگیؔ یاد دیوچ بہہ روندا کر کر اولا ہا چلو مونجھ اویسؒ لہا گھنسی اوندو بھیجا مدنیؐ چولا ہا

٭٭٭

ماء ہوندیں عید دی بئی چس ہئی ماء باجھوں عید گزردی نئیں میں ہر سوں دید بھنوائی ہے ماء میکوں مول نظردی نئیں بِیاں مانواں بنن لکھ توڑے ماء اوپری محض پکردی نئیں ماء موئیں جوگیؔ کئی سال لنگھیے میکوں ماء ہے یاد وسردی نئیں

قرآن مجید کوں سینے لا تیکوں یار دہر وچ کم ڈیسی جڈاں ویلھا وقت اخیر ہوسی تیکوں وقت سکر وچ کم ڈیسی قرآن کوں پڑھ پڑھ سُتّا کر تیکوں عین قبر وچ کم ڈیسی ڈیکھیں جوگی شان قرآن دا توں تیکوں روز حشر وچ کم ڈیسی

٭٭٭

ہر خوف کنوں محفوظ میڈا ایمان قرآن دے نال اے پڑھ پڑ ھ کے ڈاڈھا لطف آندا ہر آن قرآن دے نال اے اے میکوں رب دی رحمت کُل تھئی دان قرآن دے نال اے میں جوگیؔ شخص آوارا ہم میڈی شان قرآن دے نال اے

جے کلمہ پڑھدیں مدنی ؐ دا ہک گال تے ول اقرار توں کر نہ کہیں دی کَو تے کن جھلوا کہیں نال نہ شر تکرار توں کر ہوسی پُچھ گُچھ ذرے ذرے دی قرآن اُتے اتبار توں کر ڈے جوگیؔ چھوڑ فساداں کوں بس موت دا انتظار توں کر

٭٭٭

اساں ڈیکھیں ریت دے ڈِلھ وانگوں تھی بھورا بھورا بھُر ویسوں لا جھورے اپنی زندگی کوں ایویں جھُر جھُر جھورے جھُر ویسوں ساڈی مِٹّی جتھوں چوّی ہئی اوہا جاہ کرن اساں پُر ویسوں نئیں رہناں جوگی ؔ دنیاں تے اے دنیاں چھوڑ کے ٹُر ویسوں

اے رستہ ازل توں جاری ہے کئی آندا پئے کئی ویندا پئے اِتھ جتنے ڈینہ ہن زندگی دے او ہر کئی ڈیکھ کٹیندا پئے اِتھوں پیر پیغمبر لڈ گئے ہن اَئی واری ہر کئی ڈیندا پئے اے جوگیؔ دنیا فانی ہے ایکوں ہر کئی ڈیکھ چھوڑیندا پئے

٭٭٭

ایں پیٹ دی پوجا کرن لَو کہیں رسم رواج تے ریت ویچی توڑے ڈاڈھا ہا گئے ہار مَنّی اوں جان کے اپنی جیت ویچی اُڈوں بانبھن مندر ویچ ڈتے اِیڈوں ملاں پاک مسیت ویچی گل بُکھ گڑدھال جو پئے جوگیؔ کہیں پت ویچی کہیں پیت ویچی

ہے بُکھ دی گھُٹی بوکھڑی کوں ڈے بُکھ بھگتاون جاندا ہے ایندی جمدیو لا دی عادت ہے اے کھِل الواون جاندا ہے ہے ہیلک صبر تحمل دا اَئی سر تے چاون جاندا ہے ہر صدمہ سہہ کے دل جوگی ؔ الحمد الاون جاندا ہے

٭٭٭

اساں نانگاں والے جوگی نئیں اساں جگ جہاں دے جوگی ہیں جیندے پیار اچ تھئے معمور ہیسے اساں صرف اُنہاں دے جوگی ہیں ہے علم اُنہاں کوں مم مچلن اساں یار جنہاں دے جوگی ہیں ہے جوگی ؔ جوگ مقدر دی فی الحال تاں ناں دے جوگی ہیں

مسدس

پڑھ کلمہ تیڈا حق بندے ہر مسلمان کوں سینے لا نہ گال ایمان دی دولت کوں ایں پاک ایمان کوں سینے لا اوندے سڈ دی کَو تے بھج پو توں پنج وقت اذان کوں سینے لا آ تھی مشغول نماز دیوچ اَتے پاک قرآن کوں سینے لا

نہ رُجھ توں روز موبائیلاں وچ کجھ بخشش دا سامان بنا کم کر کے جوگی نیکیاں دے راہ مشکل دی آسان بنا ٭٭٭

مسدس

اے فتح مکہ دے موقعے اُتے نبیؐ پیارے اعلان کیتے صحابہؓ میڈے وضو بناوو حضورؐ جاری بیان کیتے میں اپنی طرفوں وی اَہدا پیاں تے حکم ایویں رحمان کیتے نماز پیشی دا ٹائم تھی گئے بلال آوے اذان کیتے

جو مرتبہ ہے بلند ایندا ڈکھا اج اپنی اے شان ڈیوے تے آکھو کعبے دی چھت تے چڑھ کے بلالؓ حبشی اذان ڈیوے

٭٭٭

خموش کعبے دی چھت تے کھڑے نی کجھ الیندا بلالؓ چُپ ءِ ہے محو سوچاں دیوچ مسلسل کھڑے سوچیندا بلالؓ چُپ ءِ پئے لُڑھدے اکھیں توں نیر ہینس اذاں نی ڈیندا بلالؓ چُپ ءِ صحابہؓ پچھے خموش کیوں ایں نی کجھ ڈسیندا بلالؓ چُپ ءِ

مگر سوال ہا اے اوندی چُپ دا میں کر اے قربان جان ڈیواں جو کعبے اُتے میں چڑھ تاں گیاں تے کِنتے منہ کر اذان ڈیواں

٭٭٭

آہا، جوگی ؔ جو اتنے تونیں بنا کے وضو حضورؓ آگئے تے پاک حرم دے وچ ڈھلکدے او اللہ سوہنے دے نور آگئے او سین زہراؓ دے بابا جانی تے سب دلاں دے سرور آگئے صحابہؓ آکھیے جو سارا مسئلہ مُکیسن آقاؐ ضرور آگئے

حضورؐ بولین بلالؓ میڈا نہ فکر توں کر اذان ڈے چا چڑھایا کعبے دی چھت تے میں ہے توں میڈو موں کر اذان ڈے چا

٭٭٭

قطعے

بے شک ماضی دَور توں پچھ گھن

کر کے فکر تے غور توں پچھ گھن

جیکر پچھدیں شان نبیؐ دا

ونڄ کے غارِ ثور توں پچھ گھن

٭٭٭

کئی نہ کئی نذرانہ منگداں

میں ہک جوڑ بہانہ منگداں

پاک نبیؐ دے صدقے جوگیؔ

رب توں رزق روزانہ منگداں

٭٭٭

ساری زندگی جُکھ نئیں مردا

ہاں کوں لا کے ݙکھ نئیں مردا

منگتا جوگیؔ سئیں ؐ دے در دا

رب دی قسمِ بُکھ نئیں مردا

٭٭٭

عمرا ہے گزری سدا لکھدیں لکھدیں

اوں دلبر دی سوہݨی ادا لکھدیں لکھدیں

ایہا میݙی خواہش ہے ساہ نکلے جوگیؔ

محمد ؐ دی پیاری ثناء لکھدیں لکھدیں

٭٭٭

آر میلاد ہے۔۔۔۔۔۔۔۔۔۔۔۔۔۔،پار میلاد ہے

ݙیکھ تاں سہی چودھار میلاد ہے

دنیاں تے ہے ۔۔۔۔۔۔۔۔ سئیں ؐ دی آمد

اڄ ہے وار۔۔۔۔۔۔۔۔۔۔۔۔۔ سوار میلاد ہے

٭٭٭

اڄ میݙا پیغام توں سُݨ گھن

ڳال اے سرِعام ۔۔۔توں سُݨ گھن

میں میلاد منیساں سئیں ؐ دا

جوگیؔ صبح،شام توں سُݨ گھن

٭٭٭

اے بغض تریڑے ۔۔۔نئیں مُکدے

آ کون نبیڑے ۔۔۔۔۔۔۔۔نئیں مُکدے

توں جوگی۔۔۔۔۔۔۔ پاک میلاد منا

ملاں دے جھیڑے نئیں مُکدے

٭٭٭

شالا جڳ تے عزت ڈھیر ہووی

ہر دشمن سڑدا۔۔۔۔۔۔۔۔۔ زیر ہووی

ماء ݙیوے۔۔۔۔۔۔۔ روز دعا جوگیؔ

جِتھ پیر ہووی،اُتھ خیر ہووی

٭٭٭

پلوتے نئیں۔۔۔۔۔۔۔۔ کݙاہیں ݙیندی

ہے آغوش اچ۔۔۔۔۔۔ پناہیں ݙیندی

اونہی کوں رب ہے بخشیندا

ہے جیکوں ماء دعائیں ݙیندی

٭٭٭

پیوء تے ماء دا ۔۔۔۔۔۔۔۔۔۔رشتہ پیارا

مِٹھا نِسری۔۔۔۔۔۔۔۔۔۔۔۔ وانگوں سارا

وت اے جوگی کیوں کر گئی ہے؟

پیوء، ماء توں ۔۔۔۔۔۔۔۔۔۔اولاد کنارا

منقبت

اوں تے راضی۔۔۔۔۔ رب رحمان ءِ

پڑھیا جیندا ۔۔۔۔۔۔۔۔۔۔پُتر قرآن ءِ

پُتر کوں جئیں۔۔۔۔۔ قرآن پڑھایا

اوں ہے اعلیٰ ۔۔۔۔۔۔۔۔۔۔۔۔۔رتبہ پایا

جڳ تے اوندی۔۔۔ وکھری شان ءِ

حافظ جاں قرآن۔۔ کوں پڑھدے

جنت دیاں او ۔۔پوڑیاں چڑھدے

میݙے مدنیؐ ۔۔۔۔۔۔۔۔۔۔دا فرمان ءِ

ویسی حشر اچ۔۔۔۔۔۔ بازی جیتے

حافظ اپݨے ۔۔۔۔۔۔۔پیوء ماء کیتے

بݨسی بخشش دا ۔۔۔۔۔۔۔سامان ءِ

حافظ دے ماء پیوء کوں جانی

رب بخشیسی ۔۔۔۔۔۔۔تاج نورانی

ݙیکھیں محشر دے۔۔۔ میدان ءِ

جوگی ؔدی نہ۔۔۔۔ ڳالھ بھُلا توں

اپݨے پتر کوں ۔۔۔۔۔حفظ کرا توں

دنیاں تے نہ۔۔۔۔۔۔۔۔۔۔۔۔۔بݨ نادان ء

پڑھیا جیندا ۔۔۔۔۔۔۔۔۔۔پُتر قرآن ء

قطعہ

نہ ݙکھ ݙیسی۔۔۔،۔۔۔نہ غم ݙیسی

نہ اصلوں درد۔۔۔۔۔۔۔۔۔۔ الم ݙیسی

توں جوگیؔ پاک قرآن کوں پڑھ

تیکوں روز حشر وچ کم ݙیسی

سئیں اکرم ؒ شاہ جمالی دے حضور

ہے شمع دین۔۔۔۔۔۔۔۔۔۔۔ دی ٻالی

سئیں اکرم ؒ ۔۔۔۔۔۔۔۔۔شاہ جمالی

میݙے پیر دا ۔۔۔۔۔۔۔ فیض نرالا

تھیا تھل وچ ۔۔۔۔۔۔ ݙیکھ اُجالا

جݙاں نظرِ کرم ۔۔۔۔۔۔ ہے بھالی

سئیں اکرم ؒ ۔۔۔۔۔۔۔۔شاہ جمالی

سئیں دین دا ۔۔۔۔جھنڈا چایا

حق سچ دا ۔۔۔۔۔۔۔ راہ ݙکھلایا

کر کر۔۔۔۔۔۔۔۔۔۔۔۔۔۔۔ تقریر مثالی

سئیں اکرم ؒ ۔۔۔۔۔۔۔۔ شاہ جمالی

تیݙی دید دیاں۔۔ کر کر دیداں

تھل بر دے ۔۔۔۔۔۔۔۔ڈھیر مریداں

تیݙے عشق اچ ۔۔۔عمراں جالی

سئیں اکرم ؒ ۔۔۔۔۔۔شاہ جمالی

ساکوں سئیں۔۔۔۔۔۔ دیدار کراوو

چا خواب اچ۔۔۔۔۔ شکل ݙکھاوو

لجپال کرو ۔۔۔۔۔۔۔۔۔۔۔۔۔۔۔ لجپالی

سئیں اکرم ؒ ۔۔۔۔۔۔۔شاہ جمالی

تیݙا جوگی ؔ ۔۔۔۔۔۔۔۔۔ بردا باندا

تیݙے ناں دے۔۔۔۔۔۔ ڳانوݨ ڳاندا

ہے تیݙی ۔۔۔۔۔۔۔۔۔۔۔۔ شان نرالی

سئیں اکرم ؒ ۔۔۔۔۔۔۔شاہ جمالی