Huk punchawshi naanichaw intiwan wayra tinkuyaañaq, chayshi ishkan parlaraykar aywayaañaq, chaynaw parlayanqanchaw intiwan wayraqa ishkan llallinakuyaananpaq churakaayaañaq, mayqanchikshi llallishun nir, chaypita apustayañaq, chaynaw kaykarnashi tapunakuyaañaq ¿Imanawtaq rikaashun mayqanchikpis llallinqanchiktaqa? nirnin, chayshi huk runata minkakuyaañaq, runaqa awnir naanipa yarquñaq. Naanipa aywar qallaykuptinnashi, qallaykuyaañaq ishkan qichunakuypa, ñuqaraq ñawpata ninakur. 135 Wayraqa, ñuqami chukunta punchunta qichurishaq niñaq, llapan kallpanwan puukayta qallariñaq, chaynashi runaqa chukunta, punchuntapis achkukurkur aywakullaañaq. Wayraqa kimsa kuti llapan kallpanwan puukañaq, runataqa chukunta, punchuntapis qichuyta atiñaqtsu; chaynashi inti kananqa ñuqatanami rikaamanki niñaq, runapa chukunta, punchuntapis hurquchishaqmi nirnin llapan kallpanwan hinchi achachar qallaykuñaq, runanashi chukunta, punchuntapis, chumpantapis hipipakur qallakuykuñaq. Chaypita, huk sachapa chakinman aywar hamakuykuñaq, punchunwan humpintapis pichakurnin wayrata mañakuñaq wayrapaykunanpaq, chayshi wayraqa ullqushqa kañaqnatsu, chaynaw intiqa wayrata llalliñaq.