Unayshi sallqa markachaw allaapa usyañaq, chayshi mana yaku kaptin llapan sachakunapis tsakiyaañaq, mikuyaananpaq imapis kañaqnatsu. Chaynaw llakishqa kaykaayaptinshi yachaqnin huk markaman qamkunawan aywashaq niñaq. Llapan runakuna ayllupakurkur hirka chakinchaw kawayaananpaq aywakuyaañaq. Chaychaw kaykaayaptinpis manashi tamyañaqtsu. Chayshi yachaqqa runakunata qayañaq ayllunakuyaananpaq, tayta Intinchikta mañakushaq tamyamunanpaq niñaq. Chaychaw llapan qunqurikurkur, rikrankunata kicharkur, mashtarkur, llapan runakuna yachaqwan mañakuyaañaq. Intiqa llapan runakunata rikaykur llakipaariñaqshi. Chaynaw kaykaayaptinnashi hanaqpatsachaw illapa pashtañaq. Chayshi llapan runakuna manchakashqa ayqipa wasinkunaman pakakuyaañaq. Chaypita yapay hanaqpatsata rikariyaptinqa chipyaykaañaq. Niykur yapayshi illapaqa pashtariñaq, hirkamanshi rataykuñaq, patsatapis kuyuchirqanshi. Hirkachawshi huk michikuq wamra kaykaañaq, illapaqa washanllachawshi pashtarirqan, hatun uchkutashi rurariñaq. Chaypitanashi michikuq wamra imatapis wiyañaqtsu, hinashpa mana manchakushpa uchkuman qawariñaq. Chaychawshi huk qarapaachu warmi wamrata rikaykuñaq, uchku chawpinchaw alalachikur hamaraykaqta. Chay wamrapa aqchanpis ninanawshi rawrañaq, turumanyay chikanshi kañaq. Chaynash michikuq wamra tapuñaq: “¿Pitaq kanki?, ¿imatami kaychaw ruranki?”, nishpa. Warmi wamraqa kutichiñaq: “Ñuqa Intipa wamranmi kaa, paymi kayman chaachishqa runakunata yanapanaapaq, imatapis rurayta musyaatsu”, nishpa waqar qallarkuñaq. Michikuq wamraqa llakipa ama waqaytsu nir witipaañaq. Intipa wamran allaapa waqaptin, wiqinpis uchkuman wiñakaañaq. Chaynaw waqaykaptinshi wiqin quchaman tikrariñaq, chayllachawshi mana kuyushpa waqarir hamaraykarqan. Intiqa wamranta rikaykur llakiparqanshi. Chayshi huk illapamanna wamranta tikrachiñaq. Chay patsa allaapashi achacharqan quchapapis yakun tsakir qallarkuñaq. Chaypitashi achka pukutayman trikrariñaq. Chaynashi pukutayqa hanaqpatsaman yanayaypa yanayar witsikurkuñaq, niykurnashi tamya qallarkurqan. Chaypitashi chay markachaw runakuna kushilla kawayan. Kanannashi chay uchkuqa hatun quchaman tikrashqa. Michikuq wamraqa Intipa wamranta yarparnashi, imaypis quchaman ashiq aywañaq.