Wb/qwh/Atuqwan kuntur

< Wb‎ | qwhWb > qwh > Atuqwan kuntur

Unay, unayshi huk atuq, hirkapa pirikanqanchaw, huk kunturwan tinkuriyaanaq. Tsaychawnash atuqqa llutankunata rimanaq kunturta:

  • Nuqanaw manam maychawpis kantsu, nuqaqa purii hirkakunapa, rahukunapa mayukuna kuchunpa, quchakuna kuchunpa, Nuqaqa allaapa kallpayuqmi kaa!, manam imatapis mantsaatsu.
  • Kushikuumi, wawqi - ninaq kunturqa - munaptiykiqa rahu hananchaw waraarushun.
  • Munaptiykiqa ari tayta kuntur.
  • Itsanqa ras chaarinapaq aparikurkur apashqayki - ninaq kuntur.
  • Aku, aku, kaychawqa allaapanam achachan - nishpa yaskirinaq atuq.

Tsayna kunturqa atuqta aparikur, paarir hiqarinaq rahu hanankama. Niykur tsaychaw pampalla rahuman yarpurinaq. Tsaychawnash kunturqa shaakurinaq tsururu hananman, atuqna hina paypa nawpanmanman taarinaq chupanta qurirkur. Unayllatanash atuqqa alalaatsikur qallaykunaq, itsanqa alli tukur kunturta ninaq:

  • Wawqi alalaatsikunkiku ?
  • Awmi alalaatsikunam.- ninaq kunturqa
  • Nuqaqa manaraq alalaatsikuuraqtsu - ninaq atuq, katataykarpis

Unayllatanash, atuqqa yapay katataypa katatar kunturta tapunaq:

  • Alalaatsikunkiku, wawqi ?
  • Allaapam alalaatsikuykaa - ninaq kuntur.

Tsayta wiyarnash atuqqa, qatataypa qatatar, paqway tsururunaw tikrar, haqraq! nishpa, hiqarpunaq rahukunapa ruriman. Tsayna kunturqa ninaq.

  • Kay upa atuqqa uusha suwakuqllam. Nuqam paypita alli kaqnin kaa.

Tsayta nirir shumaq tapsipaakuriykur paarir hiqarinaq rahu hanankunapa.