Ah! Bilay kon alenleneg
Aned ta ni supoksupoken mo?
Anta nipalioaoa lad sika’y
Nagnap ya kabaliksan mo
Antam la’y sengega’y inkioalam
Tan malineo la’d sika’y pansumpalan mo.
Akin balet ya siansian
Napekla’y bonek mo
Ed saray paklap ya karakpa’y
Bengatlan naseleng na matam
Tan aamingao na layag mo.
Deen ka pan magano. . .
Yorong ka pad kabukoran mo
Omameng mo pa’y ipeget mo
Nemnem mo pa ra’y aoaoey mo--
Lakao mo pa’y onnengneng
Ed saray bengatlan ag naseleng
Salim pan ontalineng
Ed saray tanilan ag narengel
Ilolot mo pa’y mansalita’y
Ag natalabitib na anggan siopan pinmatarem ya dila—
Ibalap mo pa’y bakal!
Ya esaesa’y eyagan to,
Linget tan lua alioan dala so ipatedter to,
Ta say pitulotan to
Saray maraoal tan marangal
Ya kakabusol
Ya amotamot tan iporipor ira’d mapalien tan naklepa’y lioaoan
Sokosokong na pusom.
On, ibalap mo’y bakal ya andi tantan
Ed saray maaoang tan mainget
Ya kalaoakan, kapasolan tan kaumaa’y kalakal mo
Ag mo ibabagan ag mo amta
So sara’y agamil ya nepeg mon ikana:
Say kinlong mo
Say oklop mo
Say gayang tan barang mo
Say bekang tan panam
Say sapin na salim
Say samper na pageo mo
Tan say eyag na bakal ed sangim
Say manalingaseo ya sebeg na pusom
Say bonebonek na linaoam. . .
lapud ta
nabagbag mo’y kabusol mo’d kapaabebaan,
nayarak mo’y kabusol mo’d aron sankatooran,
narasag mo’y kabusol mo’d abig na linaoam
ta sigput kan manalonggaring
diad pikoman mo’d samay kimmalab ed Parepan
nansasalipongponga’y bogas na kabayanian
tonma’y Toon anakbat na sansinakuban!
Ah! Balap bilay ko ag ka ontalao, ag ka mantantan!
Kurang ka! Mantagilaki ka!
Kapegleya’ni bakal!
Kaplesa’ni bakal!
Say manalioekoek tan manalimpokapok ya bakal
Na maong tan maoges!