Agko naimano’y peles na igsa
Ta akiontenganak ed saray papanginaen kon
Mataltalag ko la ran kadopong
Inonak si Nanang Iyang
Masulok da lan sitinta
Akalugan ira’d yorongan
Ya nandalig na apatira
Nanopapet ak lan nanopapet
Bengabengat lay agko naokoktap tan natepet-tepet
Oalay maermen oalay maliket
Oalay makapalek oalay siryoso met
Insublay koy Nanang Manang
Mangangganan maesiang
Anggan masulok la ran otsinta
Nalikas mod lupa ray
Dakerakel ya salsali ed bilay da
Patey tan bilay nasisingbatan mi
Lua tan sayaksak nantutuyaoan mi
Sa balet so pusok ya mansusugiri
Nilamiongay ermen so liket kon inioi
Ah, on, no onia ra
Makakailio ak. . .
Singak ira nanengneng di Inang, di Amang, di Nanang Orao. . .
Mailioak ed kindi Inang. . .
Saray leoet na panangaro da. . .
Labay ko komon ya uliten so pilimog kod kindi Amang
Dakel iray kasalanan kod sikara. . .ta malamangak ya apo. . .
Amtak apirdona da ak la
Mailioak ed kindi Nanang Orao, singa ra kumaduan inak. . .
Ah! Ag la ra naulit iraman ya apalabas. . .
Saray bangat da, saray oliran da, saray alimbaoa ra, saray tagaumen da,
Saray aoaoey da, saray bilin da, on pati saray. . .
Pasnok da, Leoet da, Kelyao da, Dagkal da, Mulagat da,
Elek da, Singi da, Aplos da, Lua ra, Sisia da. . .On,
mailioak manaya. . .Mansibsibek so pusok. . .agko namedmeray luak. . .
Onsisinagem so linaoak. . .Ta abayag ko la ran ag anengneng
Sikaran angaro tan amablid siak
Sikaran ametek tan angimansod siak
Sikaran nananos tan nantepel ed siak
On, mailioak. . .makakailioak. . .
Nobimbri la manaya, kampega.
Kataoan min Dios Ama
Kasian yo pa ray kamarerua ra
Pian say sileo tan Gloria
Magnayon komon ed sikara
Komon ta ontan pa!
(4 November 2006)