Andukey so pila; nankakanat ya lupa
Andeket, amputi, kayumanggi, ambalanga
Makakaimis, akakuliseng, akasibangot, manmumura
Manaalagar na flight ompian makasempet kami la.
Guyur-guyur ya bagahe, agay lay belat
Ansakit lay taklay; say bikking mankelat
Ta agay lay kaarawi na gate ya pianap
No ag labat pawit, bagahe lay itilak.
Cancelladon itekyab makapasakit na ulo
Pati connecting flights, amin atrasado
No agko labat labay ya ompawil ed trabaho
Agak ni onsempet, aruman ni bakasyon ko.
Petang ed Florida tan saray kakaaro
Agko ni isalat ed ambetel ya tiempo
Anggano say "sign-on bonus" so samplun libo
Dia ak lad Sunshine State ya kawalaan ko.
Kasabi-sabik nin tuloy, say computer lay arap ko
Ta makakailiw ak lan mituyaw ed sikayo
Nen abasak iray ula-ula ya insulat yo
Nakal so sakit na layag, eras, tan kesaw ko.
Agko akalab may tori; agko abangga may ari
Sinmempet ak dia, anggapoy naumman ni
Kulang amoy duay simba pian siak so makapili
Na ikabat ko ed saray atateng kon pinabli.
Nalilikas kon say silew ko so mankuyep
Pati saray payak ko naeekal lay dakep
Ompan agla nanengneng no onsabi lay bilunget
Kankantin melmelag kaskasian yo pa met.