KAONORAN YA BILIN: TONGTONG A TUGTUWAN AGAWA nen Maria Magsano
Nandorongo ran mangoto sa sanina tan sanbabai a di Maria tan Cornelia tan saray aapo na onor ya ngaran. Ven so sankamelagan ed saray apo to tan sikato met so napapalabiay aro. Walad abay ton sipor kapag no mangan ira, kanian kanawnawa toy manguray, manestilo tan manlampay no maminsan ed panangan. Kapag no onla met ya onorong ed ngarem, mapanaynay ay agto ni ombuat ya ondago ya anggad itdan nen bai toy sakey a centimes ya isaliw toy kanen. Diad labi no kasakbayay idokol to, si bai to met so mangipanunot ed pandasal to no bilang ta alipatan to yan gawa to. Diad kautlay labi no isisipen nen bai ya ompan nakalay ules, bangonan ton ulesan. No si ugaw et sinmabi pakasisirit to anggapoy bangonen ton arum noag si bai to.
Diad peles dan mangakan, sayay Maria ya anak, lapud anggapoy arum ya pandaleman to ray bengatlan irirap odino erermen tod bilay aya noag si inaton kaibiba ton nanlapud inlesay bilay to, agto apokpokan so inpanbaga to ray kaonoran iran noticias ya sinmabid layag to tan puron nipaakar ed sikaton dili. Agaylay makapasinagem ed agto impakanunot ya si maaro tan malagak ton ina et walay sakit tod puso tan diad saraman ya agew, mabetbet so isigi betbet na paruk na asalita lan puso to. Say destino anti no sikatolay aasabi, dakel ya baraan ya onsabi, dakel ya lingong nagawa ya agnaamamtaan no say palar lay ontawag.
“Ina,” kuay mapalnan talima nen Maria, “saray mangiitap na linawa ed siak agni ran siansian napda.”
“Akin, anto ta tan lamet anako so pangiirapan day linawad sikaa? Isip kono tinmonda lara ta ayadyari met lay fiesta. Anto tan lamet konoy kuandan nipaakared sika?.” Kuay ina ya singa taruk na sibeg so tanila tan expression na lupa to.
“Eh, nanbabangil lamet ya ipapalsa rad siak-ya pati nipaakar ed basinkawel ed politica ya linmabas la. Say kuanda ta si Dona Victorina ibabaga to konod si Apo Gobernador ya sinmungpaak ed candidature to nen peles na basinkawel ed sayay kaonoran ya eleccion. Agko kono makapanburi ta walay inopaan ton secreta ya oonlan inagewagew ya mansisiim ed amin ya kiwas ko. Ontan met nen Don Tasio kono nanbabangil so labir-labir ton nipaakar ed siak lapud agko pangipaonong na pilak na karaklan ed ag onkatunongan ya panbayaran. Sani makapadpaermen, ina, ta saramay profetas nen saman ya angikuan ya aliwliway kasungpalay fiesta tan agda labay so mibiang et sikara natay makakaonan mannununot ya mangalay kuartan nakdaan ya agni agastos,” kuay anak ya singa nanaermenan.
“Anto met lay irirap mo anako ed sayan bilay? Polim ira lambengat tan agmo panermenan o paningongotan iratan, tan isaklang mo lan amin ed Dios a Kataawan ta pian payabolan to ka komoy biskeg, dunong tan lalang ya manakbat niran tan ya amin. Inunot mo la anako ed saray irirap nen Katawan tin Jesucristo ipasen mo lan signa pisasakbat mo ed belat na cruz ya sinakbat to sengeged kasalanan tin pinalsa to. Agmo ra bobosolen noag ingen sikaray pikasim t apian komon nabirbir daray lingo tan kasalanan da et oniarain panpataolian da,” kuay maoyamon bili ina.
Ameneng ya agano si anak, insane inebatan toy inato: “On, ina, agkora bosolen ni irapey linawa, balet agdaak napiluk ed agonkatunongan. Ipatron ko rad Dios a katawan, balet ikanak met so tudio ya inter tod siak a mamakal ed saratan ya kaisipan dan agmatunong. No akowen yon amii panamairap na sakey a maruksa inta walad sikayoy sekder tan pakayarri ya mamaat, maong la inay agyoak inanak t apian nabawasay bilang na aripen ed sayan bansa. Paolian yoak lambengat inan onebat ed papel tan pluma ta sikarra raya so ayurran inter na Dios ed siak a pangiagel kod inkasiak a dili tan say kaparak ya too. Alanang lay kiknaan kod sarayan amin, ina, kanian agki lambengat mapaga ta agko ra paningongotan t apian agda deraley laman tan nunot ko.”
“Maong sirin anako no ontay kaisipan mo ta say papagaan ko wari so say kasakitan mo, ta no sikay nasakitan, ompatey kami met lan amin…” kkuay ina kasakbabayay pamilin tod Apo ton Ven.
“Ven, agmo sumsumlangey baim ta no sikatoy ompatey la, kaskasi ka ta angapolay pialaan moy sakey a centimes no onorongka, anggapo lay mangoles ed sika no labi, anggapo lay bangonen mo no makasisirit ka, anggapo lay manbangat ed sikay dasal, mangipanunot na pandasal mo t apian lawas kasian kay Dios.”
Balibali so impangogto ran sanina tan sanbabai ya singa anggapoy onsabin bigla ya mangerep na arowan tan likeliket da.
No panoy biskeg na kirmat tan karol ya mangatot ed sakey a kiew, ontan met so impamakbak na mauges a dagem a kuan ti ngola ed si ina nen apaleenay masudsulok a kapalduay horas ed kaonuran ya inpanbilin to. Sikatoy atumba ed dilin silir to tan say kaonoran a balikas to, “Dios ko, ilaban moak.” Agla akasalita ya anggad inkoyos na bilay to ed komalabintalon agew ya indokol to ed agew na Miercoles fecha 19 ed Enero ed horas n alas 9:45 ed kabuasan. Say kaonoran ton bilin so lawas agamiley anak ton ataynanan to, tan amin ya kimey to ed bilay aya ya laut lad lingkor ed baley tan kaparan too so lawaas ibagat tod mablin ngaran na mapaaro tan malagak ton ina ya nibokor a natawag toy kien ton dili ya nanlapud inkaugaw to.