ASELENG NA INAWA nen Eufemia Villamil
Asabi so wedding anniversary di sanasawan Bernardo tan si Melba ed inpakarapat day samploy taon ya maong dan olupan. Diad bayag dalan sanasawa ya manaamong, anggapoy bengatlan siblangan da no ag ingen manaari lawas so kaliketan ed loub na maawang dan ayaman. Si Bernardo ya abangonan to’d bilay to so maong ya arowan tan maong a pantalusan, nanengneng so ontan lan panamabli to ed kapisag na puso to tan ontan met ed saray anemiran anak da.
Diad saman a mablin agew walaran dinmagup so atatagey ya oked na totoo laut lad saray maaro tan malugor ton ateng nen Bernardo tan ontan met na saray agi tan kakanayon to.
“Mabuhay! Long Live!” So maliket ya nibelyaw day totoo ed saray sanasawa.
“Salamat ed sikayon amin!” So nikuan day sanasawa ed saray sankaili ya aki-ambegya.
Alimbos iray liket so totoo ed saman a labi. ANdi lay ginawa ra say nansayaw, nanpalek, naniinuman na alak tan angan. Baleg ya tanol so agawa ed dalem tan paway na marakep dan ayaman. Diad paway na kosina balet, nanengneng so ag manondan kimey tan oras na ikakana ran baso, plato, kutsara, tenedor tan arom nira. Si Bernardo ya maimano lawas ed saray totoo, adatngan ton anengneng so sanina ya dingan met lay yakar dala. Saraya nengneng day nababaingan tan atawag so imano nen Bernardo lapud nalikas ton singa mamapasnok si asawa to ed saraya.
“Akin, Melba? Siopa raman? Angan lara?” So nantotombukan ton tepet.
“Saraman so totoon ayaman day abong. Labay day onloub ya igaganggan. Mamapasnokak ta onlaradia amta maringdingot ira. Inablog kora laingen!” Ebat nen Melba.
Lapud niduman ingal so nangel ed kawalaan day sankaili, kanian atawag so imano ray sanasawa. Tampol dinmago ra ed simpok day sankaili ya atiptipon.
Labi lan maong nen nasungpal so saman ya ayayam. Saray totoo kinalkalnaan da met lay nanpatanir ed satay sanasawa. Ag nibalikas so kaliketan ya alikna na baling sakey ed saray dinmagup.
Saray sanasawa, saray anak da tan saray igaganggan dara baleg met met so inkabanalan da. Asakbay iran nalaan na inpakaugip. Andi kita-kitaw ed abong kayari na inpanliliket da.
“Sakay kan bin andi sibeg! Agko inilaluan ya ontan so ugalim! Kaonungan mo lan mangipanengneng itan a walna ed sika?” So nikuan nen Bernardo ed asawa to.
“Akin et ontan so ibagam! Iner so nanggawaan koy makapoy ed sika?” Masebesebeg ya inebat nen bii.
“Anggapoy makapoy ya ginawam! No amtak labat ya ontan so ugalim, dakel ni bin agko ni anengneng,” masiadoy pasnok nen Bernardo.
“Ibagam ed siak no antoy kinolangan ko ya asawa. Niinter ko met so kanepegan kon sakey ya asawa tan sakey ya ina. Kaonugan mon mangibaga tan ed siak!” So nangisan ya ebat nen Melba.
“Taboy kadia! Taboy kadia! Agko labay a nanengneng so lupam! Diad bayag talan manaamong, anggapoy nibagam ed panangarok ed sika, balet diad anengneng kon kalamngan mo ed dilin ateng mo, sikato tan so ugalim agko nitepel!” Mabakat ya paliwawa nen asawan laki.
“Sikatotan so pamatabuyan mo ed siak ya asawam! Agak met nanlamang ed sika! Antoy pibibiang mo no malamangak ed ateng ko! Sikatotan so agmo nepeg ya louban!” Paliwawa nen Melba.
“So kuanmo, Melba. Balet diad siak a mantalus ditan mapatnag so petepeteg ya inkatoom. No nayarian mon lamangen so ateng mon dili ya akautangan moy nagnap mon bilay, siopa ak nin agmo lamangen!” So maingal ya nibaga nen Bernardo.
Lapud mapalaloy nangis nen Melba, kanian agto agawaan lay onebat ed si asawa ton singa oolamen so laman to ed kabaleg na pasnok to.
“Taboy kadia! Taboy kadia ed sayan ayaman! Agko naako so ginawam ya kalamangan. Agak ni akanengneng na sankaugsan a too, no agmo bukod! Malamang! Malamang! Taboy kadia! Taboy ka!” So maingal ya baga nen asawan laki.
Lapud manponiti tan maingal si Bernardo kanian narengel met si Melba ya maingal.
“Daddy! Daddy! Akin? Antoy kokogipen yo? Akin et maingal kayo?”
Si Bernardo ya naksawan ed gaway pasnok to, sansansakey so balikas to.
“Salamat! Salamat! Kugip ko labat manaya. Salamat!”
Diad biek tonian agawa, si Melba alikna to so niduman liknaan nen asawa to. Nanlapu lad saman, naaralan ton arowen si inato, tan lapud wala man a kinugip nen Bernardo kanian anonutan tomay akulaw ya anengneng ton nanpasnukan nen asawa to. Intepel ton inbaga ed si asawa to ya sman ya akulaw, et dilin ina to fan lapud duka ed kipapasen, inbaing to ya inkabat ed si asawa to.
Anggaman mairap tan duka si katulangan nen Bernardo, siansian inpanengneng toy luor tan panangaro to ed si akulaw a dilin ateng na kapisag na puso to.