Wb/pag/ALAMINOS (anlong)

ALAMINOS

Amianen a sagur diad luyag na Pangasinan

nandoroipo rayan karakel a katooan

Pangasinansi, Ilokano, kaZambalisan

nantutugyop lanti ra’n pinaleta’y paknaan.

Lega’y impilamanan da’d kabangon a baley

sipan da’y maong a pilimug ed balang sakey

anggaman nandoroma ra’d ugali tan aoey

ag ya’n balot akasbel ta aro’y amasakey.

Ag naulit, ag nabilang so kasinagman da

saray atateng min nankasakey nen immuna

pool, okol, eras tan sibletan ed linaoa

analonggaring ira’n anos so impangaya.

Mareen tan maliket so bilay da nen saman

kasumpalan na intetepel dan kasinagman

ateng mi’y makokoli’d anto man a kimeyan

matdem ya impanutek, maong ya mitambayan.

Irap man no inaoa no sikato’y kiratngan

taoir mi so anos tan linaoan sangkatpelan,

pananisian malmalet ed Aman lapua’y bilay

tan mabintan isip ya inteneb’d kairapan.

No anto ma’y kisagmaka’y bilay min taga-dia

et sungdoan min ilalo’y benbenbena’d linaoa

palapuen mi’d ugagep na bilay a maadia;

narateng mi komo’y kipasen a magayaga.

Onsulming ma’d sikami’y lames tan kalamangan

tan ikaindan mi so baley min inkianakan

dayeo o pilak ma’y itabon ed kalamanan

isempet min isempet, baley mi’y pangyapayan.

Sibeg, aro tan pankaoana’d sika, baley mi

so mamapabiskeg na linaoa tan nonot mi

Alaminos kan sempena’y dayeo tan galang mi

diad mablin akkualan mo’y bilay tan pateyan mi.