Novela fondrege si föföna ba Li Niha yaŵa ba Wikibuku. Högönia: Si Miki ba Si Kimi nisura zanura somasi sibai mangodödögö halöŵö ba gangowuloa Wikipedia ba Wiktionary Nias, na so ginötöu ba tola fahuhuo'ö khönia ba da'a, Yasanto Lasetalk
Fatua lö utohugö wanura nisuragu ba da'a mitou, si oföna sibai u'owai ami fefu, Ya'ahowu.
Si sambua Fehede edit
Ba Danö Niha fangowai sambua huku si tebai ni'olifugö dozi gofu haniha ia. Asala Ono Niha ia, ba ha ba ni'ilania nifotöi fangowai. Hiza fangowai andre tenga ha ba gangowuloa sebua simane ba walöŵa ba tanö bö'önia. Tenga ha ba da'ö, he ha ba wa'afalukha ba zi ha sabata, lö zi lö mame'e fangowai.
Fangowai sambua fasumangeta ba Nono Niha, si tebai taya. Sisambua fehede ba da'e ya'ia da'ö ba wamaehagö khö ndra ama ba ina sedöna molombase ba gu'ö andre ba wuka, ba wombaso ngawalö si no lasura ira talifusöda sato ba Wikipedia Nias ba Wiktionary Nias si no tumbu me felezara mbaŵa si sara döfi si dua ngahönö a dua wulu a sara (11 Januari 2021) si no fagölö wetaronia ba gotalua li si no so ba Wikimedia Indonesia. Novela nisura ba da'a tenga sindruhu-ndruhu sibai no alua, hiza töinia manö Novela andrö moguna ta'ila ba mbörö andre ena'ö na no tatohugö wombaso ya'ia ba no aboto ba dödöda, wa ha sinörö huo-huo sitobali fa'amohi'a dödö ba wanura ngawalö zifakhai ba Li Niha.
Manura sambua fehede ba Li Niha hulö zanura si sagörö karate ba Li Niha tanö bö'ö. Abua ma'ifu woraka ya'ia. Ba da'a tou, ba no mafa'anö ma'ifu waö-waö lala wa'auri zi sambua ngambatö si so ba Danö Niha. Nisuragu ba da'a, tenga sindruhu-ndruhu sibai simane niŵa'ögu moroi yaŵa, ha ba wogambaraini, hewisa ia lala wa'amarase ba mbanuada Tanö Niha.
Me lala nisura ba da'a fao ba gangolifa Novel Fiksi, ma lawa'ö ia tenga sindruhu salua, ha waö-waö wangera-ngera zanura, ba na öbaso so zi fagölö töi nisura zanura hikaya da'a, ba böi be'e sibai ba dödöu, tenga ni'odödögö ha börö me fagölö. Simanö göi na so döi mbanua si fagölö ba gamaudu nahami, lö sökhi öwa'ö e löhadöi nirongogu da'ö ba mbanuagu. Ya'ia atulö sibai da'ö me nisura zanura da'a ha ba wa'onekhenia wamakhai fehede, irege tola tobali ngawua zura nibaso ndraono dania mitou.
Sanura zura da'a, tenga ba wamatunö hewisa wa'anumana ba khöda ba Danö Niha, hiza i ba wame'e gambara ba ndraono si bohou ebua, ba wangomasi'ö Li Niha andre, me lö aratö na lö sa'ae dania ato zolau Li Niha ero ma'ökhö, ba ara manö tola taya. Börö da'ö andrö wa umane, lau le, da usura zambua, börö me na nisura andre ba da'a ma ba gu'ö andre khöda, ba lö manö alio taya, asala ba naha si sökhi no lafalemba ia. Mibologö dödömi na oya sibai zo'amböta, he ba wanura, ba yamendrua sa'ae ba geluahania. Lö abao dödöma ba ngawalö mbua wangera-ngera si tola möi famanöi fa'omasima ba wanura Li Niha andre khöda.
Fatunö khö mbanuada tanö bö'ö ena'ö labaso göi hikaya simane da'a, ma na lö akao'ö ba be ginötö ba wamazaewe khöra khai-khai zura da'a, ha idugu ato ita zombaso ba ha wa'omuso dödöma na fao ita ba wanura.
Simanö ua zi sambua fehede ni fa'ema ba da'a, ena'ö tabe ginötöda, da tabaso hewisa sibai waö-waö ndra talifusöda Si Miki ba Si Kimi
Famobörö ba zi samuza ma'ökhö edit
"Faoso, ihandro doyou sino, idugu ödöni gambalau na sa."
Fehede, Nama Zi Miki, ba zi bözi fulu, yaŵa luo. Idugu irasoi wanuköu khöda si Miki, imane ba dödönia, ha sa'ae maoso ba no asoso gö nirino ninagu. Fa'amare sa ba mbanua no sa'ae bunga-bunga wa'auri nirasoi ngambatö sotöi Ama Zi Miki. Na ifuli ia ba ndröfi si no numalö ma me inötö ide-ide ia ba no so khönia wa'areu we'amöi ba zekola, heŵa'ae tua zi Miki meluo da'ö edöna sibai dödönia na ononia andrö Ama Zi Miki (Töi sindruhu nama Zimiki, Ka Hufa) tola möi ba zekola, me ba ginötö da'ö tua zi Miki teboka dödönia wamaigi iraono niha bö'ö si no sekola da'ö nihalö ndra niha Balandra ba wohalöŵö.
Ifuli ia baulu Ama Zi Miki, ba Ina Zi Miki no so ia ba naha nawu ba wangehaogö öra gowirio me ba zi dalu luo andre lö hadöi sa'ae böra yomo, ba halasa lö hadöi ulitö sitola mututu si tobali soguna khöra, so ba atö tamböni si toröi göra me'owi.
Asöndru dödö Nama Zi Miki ba wamaigi fo'omonia manihoi gowirio. Ifakhölö ia, ifakoli wangera-ngerania ba lö hadöi lala sedöna mame'e nifiza soguna. Lö itaha, mangona ia khö Nina Zi Miki, mofanö ia ba wangalui diwo. Imane ba dödönia, na so ndriwo ba tola ma'ifu moraso gowirio andrö.
Ihalö mbelewania, idali sabata ba maera sahatö ba naha nawu. So göi mbola-bola, ba lö itaha sa'ae heŵa'ae manoru-noru deu, ba tenga taha-tahania ba we'amöi ba wangalui diwora ba dalu luo andre.
"He Ina Zi Miki, mofanödo sabata ua, möido u'alui ndriwoda."
Ha ifahökö manö ia Ina Zi Miki me no tefaudu tagu wanihoi gowirio. Ba ilau mofanö Ama Zi Miki, ba dödönia lö aetu dötönafö wa lö fanandraigö si tebai mutaha, no oi i'ila wa'amare niha ama ba zorugo. Moroi furinia ba maoso Zi Miki, i'atöni wa'asoso gö nirino ninania. Ifadölö mbu'u-mbu'unia ba möi ia ba hele. Si so ba dödönia no ami sibai gö nirino ninania na ifuli ia yomo. Ba inania lö sitewu'a ba naha nawu, iwusi-wusi galitö gowirio nirinonia.
Mohede khönia Zi Miki,
"He Ina, hezo möi namagu? Hadia no asoso göda?"
Ba wamondrongo fehede Zi Miki andrö ba mo'ala nidanö hörö ninania. Lö manö itema. Ifuli ifahede ia Si Miki,
"He Ina, hadia göda?"
Ilau mozizio inania si no sa'ae kehafö börö wa'atua, imane:
"He nogu, ya'e göda bawu, lö na sa sasoso. Lö ta'a wakhe ma'ökhö me no ahori göda böra."
Ifakuru röngö-röngönia Si Miki. Si so ba dödönia bakha, awai nihökha-hökha me no ihorigö ginötö ba wemörö. Ifahatö ia khö ninania, ba italagui ninania, lö tetaha sa'ae alua nidanö hörö.
Hiza Si Miki mohasu-hasu ia wa'asöndru dödönia. Ba gotalua wotalaguinia inania, mohede ia imane:
"He inagu, no lala khöda wa'anumana andre. Ba tenga u'odödögö wa lö manö mofanödo wangalui fa'auri. Hiza lö omasido fabali khömi. Lau datalau mangandrö ena'ö ibokai lala harazaki khöda So'aya yaita Yesu Keriso."
Si Miki, ono si ha sambua ba gadolu. Lö talifusönia, so ba si sambua ama khönia, töinia Si Kimi, ba hiza no möi murato misiyefo, i'otarai me ide-ide. Taya wa'olofo Zi Miki. Ihalö wakakenia, möi igo'ö namania ba wangalui diwo. Lö ara si'ai i'ofanöi ba irugi naha si so amania. Ba zaröu, i'ila namania, no iböbö högö faoma ladari. Ba ibatogö ia, ba ifahasu ia. Ba dödönia hulö na fönania no so harazaki sebua. Ihalö gönia bago, ba lö sa'ae itaha, itolo namania ba wangohori idanö, me no ibörötaigö amania ba wabönösa ba nidanö da'ö.
Mohede khönia namania,
"He Si Miki, hana wa öfakao'ö we'amöi ba da'a. Lö salania, ha ya'o manö zo mbambaya."
Ifaigi ia Si Miki, ba oroma sibai ba wehede ba he göi ba wamaiginia ononia andre, no fondrege wa'omasi si lö su'a-su'a. Lö itema Si Miki, ihalö manö ginötö ba wangohori idanö. Alölö afo, ilau molombase sabata, ba faoma lalau monganga. Lö aefa göra bago, na lö salado bago laefe me no sambua fanolo ba mbanuara ba wanaha di mböhö ba fa'okafu, andrö la'a mbago. Ba aefa lahalö nafora, ba ibörötaigö wehede Si Miki,
"He magu, bologö dödöu na oya zi lö fagöna gamuatagu khö namagu ba he göi khö ninagu. Tebai usulöni wa'omasimi khögu. Ba hiza tenga lö ba dödögu fefu niŵa'ömi khögu, afökhö khögu tebai uröi ami."
Tokea namania wamondrongo fehede nononia andrö, tenga simane ni'angeragönia. So ma'ifu khönia waniasa hana wa iduhugö wofönu khö nononia. Ba lö iforoma'ö sibai hulö zito'ölö manö, me i'ila göi wa fofönunia si möi ba wanga'azökhi ononia andrö.
Itohugö zui wabönösa ba ilau mohede-hede si fao ihori nidanö,
"He Si Miki, böi be'e ba dödöu da'ö, bologö dödöu khöma daruaga inau, lö ma'ila ma'omusoi'ö dödöu. Me no ebua ndra'ugö ba oi ömöma da'ö ba wangalui soguna khöu."
I'otarai ide-ide Zi Miki no moŵa'a ba dödönia wa'ahatö khö Zo'aya. Ba no fa'asökhi da'ö nifaha'ö zatuania khönia. Me'ubaso da'ö moroi yaŵa, hulö fabö'ö ba lala wa'auri Zi Miki nirongogu ba zi no numalö. Umane ba dödögu, te sifalimo ira khögu wa Si Miki sebua aka.
Ube'e furigu da'ö, ufaigi hapegu, no oya ae zura ndra amada si sambua naha ba gu'ö khögu, so göi zofazaewe video, ba sanura göi ösa. Ubokai video da'ö ba ösinia so ndraono si bohou ebua, molau hendri-hendri ira, hulö zi so ba walöŵa. Hmmm, lö taraso khögu na ba danö zotanö no so ndra'o. Lö mamö'i hörögu wamaigi, ba fefu ngawua wehedera andrö no i'ohe ndra'o hulö zi so ba mbanuama ba Hiligara ba Gunungsitoli Siraya.
Ufaigi no arakhagö labaso ma labokai fefu video da'ö. Uhalö khögu wa'ahono, umane, ha labaso ma ha lafaigi ma göi möi famarou dödöra ba wanura Li Niha khöda. So so dödögu göi khö Zi Miki hadia oya gahuluara ba wabönösa andrö. Arörö ita, no sa'ae talu luo, ba idanö göi no ahori, iada'a hewisa wanusuli ösi nidanö. Fatua lö lasusuli, ba ihenagö mbola-bola Si Miki, ba manaoka-naoka guro, egebua sibai.
Sambua, dombua, so göi mbaeŵa. Me no arakhagö afönu mbola-bolara, möi tou Zi Miki, ba ilului wanga'i ösi nidanö. Lö sa'ae naha ba mbola-bola ba ihalö mbulu lawayö amania ba labe'e ösa ba da'ö. Atage sa'ae ira, ba hulö lö ahori-hori nösi nidanö da'ö.
Molombase ira, ba ifatörö hörönia Si Miki tanö miyöu, ba fakhai ba hörönia so zitaki-takile.
Lö ibe dödönia, imane ma börö haga luo si no tehandro ba gara salösö.
Ifaigi sakalitö, eh idugu afökhö hörönia wotöngö.
So zihede ba dödönia,
"Halö da'ö, fangorifimi."
Idugu abölö wehede ba dödönia, lö itaha ifahatö ia. Meno ahatö ia, ba ilau teu toho sabölö-bölö sibai. Ifadege ba ngöfi gahuluara amania, ba idanö idugu ebua. Ihalö Si Miki zi takile no mege, ba meno ihalö, taya ba dangania, ba alö göi deu.
Ama Zi Miki ba Si Miki, mangawuli ira yomo. Ba so ma'ifu zifabö'ö khöra. Omuso-muso dödöra. Lö la'ila wa no irugi Si Kimi moroi ba danö wangarato. Ba me no sa'ae laröi gulidanö ira satuania, ilau ia Zi Kimi ba nomo namania talu ama Zi Miki.
Falarugi nomo, omuso dödöra me no irugi Si Kimi nahara. Ibe'e khö nina Zi Miki gahulua Ama Zi Miki ba isasai ia, i'ondrasi nononia, simane si to'ölö sa'ae fatabe ba fatalagui ira, safuria Si Miki. Asöndru-söndru dödöra me no arakhagö tölu ngafulu fakhe no fabali ira.
Lö u'ila-ila göi, ahori bateregu. Ubato ua wanura da'a me no göi bözi felendrua yaŵa, mokoro-koro dalugu, ulau ua manga. Ha göi fahuhuo ua ndra Ama Zi Miki, dania zui utohugö.
Fa'atohare Zi Kimi edit
Börö wa'alofogu, uröi sabata wanura da'ö menewi, ba umane, utohugö mahemolu. Hiza lö sökhi-sökhi dödögu me no mubörötaigö.
Tokea Nama Zi Miki me no oya wa'afabö'ö khö Zi Kimi. Mofato mbu mbewe, aefa da'ö no fatandro-tandro mboto. Fa'omuso dödö zi falukha ira ba zi ma'ökhö da'ö, inönö me Si Kimi, sara moto wa'oya bara-bara soguna ba nomo fefu ibe'e khö Ninania talu Ina Zi Miki. Adö'u-dö'u Zi Miki, amania, ba inania, simanö göi Zi Kimi, faoma irugi ira fa'awakhö dödö me no ba ngafulu fakhe lö sifalukha. Tenga hada'ö, Ama Zi Miki lö sa'ae manötöna dödönia wa tola mangawuli nono nakhinia ama Zi Kimi (sotöi Ka Wino.), börö no oya duria zanguma'ö wa Si Kimi no tobali niha sikayo, ba lö ibe sa'ae ba dödönia mbanuania. Hulö da'ö zirugi dödö namania talu sa'ae, börö me lö itörö simane si no lafazaumba duria ira niha mbanua.
Me no alö wa'erege dödöra, he Si Kimi ba he göi ira Ama Zi Miki, ba izara-zara sa'ae inania talu wondrino göra maifu. Ba tokea sibai Nina Zi Miki wa ba gahulua ni'alui ndra Ama Zi Miki faoma Si Miki so maifu zi fabö'ö. Ifahatö ia, ba ikaoni Zi Miki, "Ae bada'a sabata, ua Miki. Hadia gahulua da'a khömi, hana wa no a'usö fefu." Lö itaha sa'ae Si Miki, ihalö fefu gahulua no mege, ba isasai.
Ha mamö'i hörö, hadia zalua? Fefu nilau Lowalangi. Haniha zangila, haniha zanufa tödö wa tola tobali ngawalö hadia zomasi Zo'aya ifalua ba zangata'ufi Ya'ia. Ba hele-hele nisasai Si Miki, fefu nidanö fanasa gahuluara no'a'usö. Tehandro tou Zi Miki, fefu gahulua nomege, no tobali abe'e ba la'a-la'ania a'usö fefu. Ba dödönia imane, hadia da'a, hadia zalua. Me amena darua ira inania zangila salua andre, ba ebua maifu linia wokaoni amania ena'ö möi ia ba hele-hele khönia. "He Ma, hadia zalua ba gahuluada andre!"
Tohare namania ba fao khönia Zi Kimi. Ba tobali sibai dödönia, me fefu gahuluara notobali la'a-la'a (ana'a).
Ba zaröu i'ila Si Kimi, ba hulö na fakhai ba wa'atoharenia andre zi so fönania. Hadia da'ö, wa so ma'ifu dani wa tohare ia, ba wangalui firö ba ana'a moroi ba khöda. Idugu göna idanö, ba idugu takile gahulua no mege. Me takile, amena takana khö nama Zi Miki, wa ahuluara andrö notobali ana'a. Ifaöga ia, ba mangele nidanö hörönia. Ba dödönia, no itema wangandrönia So'aya ba wa'amarase si no lataögö götö da'a.
Fondrino ninada Ina Zi Miki lö sa'ae tatu, börö no taya wa'olofora, me ba dalu wa'omuso dödö so ira me luo da'ö. Ibe'e ba naha silö itörö hörö Ama Zi Miki fefu gahuluara si no tobali ana'a no mege. Ba hiza lafaso manö wemanga, me no göi olofo sa'ae ira. Isou göra Ina Zi Miki, ba lalau ŵa i manga.
Ba gotalua wemangara, ba fahuo-huo ira, lasofu khö Zi Kimi, hewisa duria ngambatö ba iraono zi Kimi. Ba oroma ŵa i ba zikhala ndra amada andrö no so ba wa'omuso dödö.
Ba lö utaha sa'ae möido föna ba so göi zolohe sura moroi ba pos. Me ubokai nösinia, so bakha dofi faoma baru si no la sura Wikipedia 20. Ubato sabata wanura waö-waö ndra Ama Zi Miki ba Si Kimi. Umane, ufaigi dania wa'abölögu. Lö manö göi nibadugu idanö i'otarai sihulöwongi. Uröi manö ira sabata.
Tani Zi Kimi edit
Heŵa'ae no ara sibai sa'ae lö sangawuli Zi Kimi ba mbanuara, ba lö olifu ia wa so danö zatua. Ba so göi mbanua zatua sitebai i'olifugö'ö ia, tanö situmbu ia, tanö ni'omasi'ö, Tanö Niha. No bongi sa'ae, ba lalea-leagö ira. Ba fahuo-huo ira, ba oi sahöli-höli dödö Nama Zi Miki faoma Si Miki ba nidunö-dunö Zi Miki, hewisa wa'asökhi ba danö siyefo. Ba isofu Si Miki, hadia si'ai dani wa'atohare Zi Kimi. Ba me no oya sa'ae wahuhuosara, ba ifatunö wa halöwönia samaha ana'a. Hulö faudu sibai wa'atoharenia, ba harazaki si no lasöndra ira Ama Zi Miki ba nidanö ba no famatörö Zo'aya ia andre.
Me no alau höröra, ba ida'i-da'i Si Miki wangalui hezo ibe'e gana'a da'ö amania. Ba lö i'ila-ila wa amania lö simörö na sa. Hahaha, aukhu namania khönia ba ifindrakö ŵa i ba zi lö lasöndra niha. Fa'omasi ba harato no dozi so ba niha gulidanö ba me fa'atosasa nirasoira ba wa'ara ba ginötö arakhagö sagötö fa'auri, ba imane Ama Zi Miki, lau khönia, ha tobali ia fanga'azökhi ngambatögu, si no morasoi fa'atosasa. Si so ba wangera-ngerania, lö ibe'e khö ga Kimi, i fatenge ua Zi Miki mahemolu ba fasa, ba wanofu na laku lö'ö gana'a da'ö.
So wanizi-nizi khö Nama Zi Miki me so so dödönia, ma lahalö niha. Sara wongi lö i'ila mörö. Mahemolu mbanua, ba maoso ira, ba ahulö sibai maso Nina Zi Miki ba wangukhugö öra idanö aukhu. Irino zinanö si tobali taha-taha nangi khöra ba zihulö wongi andrö. Si Kimi göi ba no to'ölö ia wemaoso ahulö. Ba hiza ba zihulöwongi sakali da'a, fao Zi Miki ba wa'ahulö maoso.
Hiza, inania si no atua, ba no ihaogö kofi, tesi. No so yaŵa ba dete meza. Aefa la sasai mbawara, ba owulo ira ba meza si no alaŵa dambai gahenia andrö, me lö sagu khö Nama Zi Miki wangehaogö ma ba wowöli osö-osö yamendrua sa'ae meza si bohou. Izumaigö no baga göi haga luo. Föna nomo ndra Ama Zi Miki, so kueni ba eu tanö bö'ö.
Ba hiza ba zihulöwongi andrö, ahulö sibai mohede dowi-towi, no osira-sira linia. Ba Si Miki fatöngö ia khö namania, me lö irai larongo dowi-towi da'ö ba ginötö si no numalö. Ba mbawa Nama Zi Miki, hulö na onali iŵa'ö wa towi-towi andrö, solohe turia si sökhi. Ba itaha dödönia, imane na iŵa'ö wa li dowi-towi andre solohe turia, ma ihalö tödönia dania Si Kimi. Itohugö wahuhuosa tanö bö'ö Ama Zi Miki khö Zi Kimi, ba omuso-muso dödöra me oi fa'omasi Lowalangi wa no tola falukha ira.
Alölö afo aefa da'ö, ba ilau mondri Si Kimi ba lö tokea ia me ba wa'a'iraono ia me mböröta ba femondri ba hele no si to'ölö khöra. Tenga ba naha wemondri simane iada'a, so hele si no lakhao idanönia ohahau sibai. Awai mondri ia ba ifagati nukhania, ba no ohau-hau, oroma wa niha satulö tödö, ifa'anö ia, isukhu mbunia si gariti andrö, faoma ifagamöi mbu mbewenia sofato.
Ba me aefa mondri ia mege, ba i'angali'ö ia Si Miki wemondri göi, me edöna möi ia ba fasa, simane niŵa'ö namania me'owi, ba wanofu hadia laku gana'a si no i'amualagö So'aya khöra. Manimba-nimba dödönia, si oföna sibai, na laku atö, ha wa'oya gefe andrö, ba na lö laku, ba wa'atosasa zui nitörö miföna.
Awai mondri, ba i fa'anö ia Si Miki, ba no ihenagö amania gana'a no me'owi. Ba hiza i'abe'e'ö sibai khönia li amania, börö so so dödönia ma ilau nilaunia Si Miki ba wangakali amania.
Ma'igido heŵa'ae ba zaröu so do, me i'ila sibai hewisa mai Zi Miki amania, ba lö sa aombö dödögu me u'ila Si Miki nisuragu da'a tenga simane Si Miki sasese falukha khögu ba zi no numalö, no ibunu kaya, ni i'o simate ia, mai tai tou ba danö. Hiza Si Miki ono Ga Hufa da'a, tenga lö hadöi khönia amuata ba zi no numalö, hiza no möi dohöfa dödönia wa'amarase nitaögö ba ginötö da'a. Lau, da tatohugö wo mbaso waö-waö mitou ba da'a.
Möi ba fasa edit
No awai lafa'anö ira. Ba hiza Si Kimi, omasi ia molambase ba nomo namania sa'a Ama Zi Miki, me talu nasi sebolo nitörönia wondrugi nahia andrö. Ba me i'ila Si Kimi wa no ifa'anö ia Si Miki, imane tödönia, hezo ilau ia Si Miki andre. Lö barani ia ibe'e wehedenia ma isofu, hiza i ha iboho manö. Ba ifahatö ia khö namania sa'a ba wanofu hadia dani Zi Miki we'amöi ba fasa. Amania sa'a, Ama Zi Miki, lö ifatunö, i'o-silö-mangila hezo möi Zi Miki. Ba lö igohi göi Si Kimi, me si so ba dödönia, ilau molombase, ba wangalui ana'a sedöna i'öli, mahemolu ma ba zidua wongi dania. Ibörötaigö i'anöröi bakha mbanuara, ena'ö na no oya dania, ba tola alio mangawuli ia misiyefo.
Me no awai ifa'anö ia Si Miki ba ihalö gureta sebenia. Ba no ilu'i tasi, ösinia bakha ana'a. Ama Zi Miki, furi nomo so ia wame'e-me'e gö manu faoma gö mbawi. Ba i'ondrasi ia Si Miki, mangona ba wofanö ba fasa. No mozaŵa-zaŵa dödö Zi Miki, hulö na onali no irugi naha zamawa ba sowöli ana'a. Ba wangonania khö namania faoma inania furi nomo, ba tohare Ga Kimi, möi ia ba gandra manu khö namania talu. Ba Si Miki, idayu guretania ba mofanö ia.
Moroi furinia ba fahuo-huo Zi Kimi khö namania Ama Zi Miki. Amena ifatunö wa tani wa'asonia moroi siyefo ba wangalui ana'a, i'öli me ba danö siyefo ba naha zamöbözi ana'a mohalöŵö ia. Menewinia gamaudu me irugi nomo ndra amania talu andrö fakhamö fakhai ba dalingania wahuhuosa namania talu khö ga'ania Si Miki, heŵa'ae lö aboto sibai ba dödönia hadia gana'a nifatunöra andrö. Si so ba dödö Zi Kimi wa amania talu andre soya ana'a ondröita duania ba amania.
"He magu talu, hadia halöŵömö?" Itema'ö amania talu, "Ae bale wame gö manu ndra'o."
Fatöngö ira Nina Zi Miki faoma Ama Zi Miki, na ufaigi moroi ba röngö-röngönia, hulö na imane Ina Zi Miki, he Ama Zi Miki, faigi zambua manu andrö tataba diwoda. Ba Ama Zi Miki tenga da'ö zi so ba dödönia, imane:
"Alai na tadoro nina Zi Miki andre wamatunö ana'a khö Zi Kimi."
Lö ihalö tödönia Si Kimi, i'ila wa ira amania talu andrö, so nibini'öra khönia. Hiza ihaogö manö fao fa'ayaki khönia wa amania talu andre, tola ifatunö hezo manö niha sokhö ana'a ba mbanuara andrö.
Ama Zi Miki, möi ia ba naha nawu sahatö ba gandra manu andrö khöra, ba so ba dangania wato. Ba isofu khönia si Kimi,
"Hezo numalö ndra'ugö ba zihulöwongi andre, magu talu?" Ba ifaigi ia Ama Zi Miki itema linia imane,
"He ba nogu, tenga mofanödo, ha ba wohenagö udali manö sabata, me na no dania mangawuli ga'au Si Miki ba möiga wolobö naha gowi khöda siyefo andrö. No awai mabala, hatö fotunga eu si so ba naha gowi andrö. Na baga dania ginötö ba utanö rigi, gowirio, lada, ba tanö bö'önia."
Ba Si Kimi, hulö na awakhö dödönia wamaigi amania talu. Ba dödönia omasi sibai na so ma'ifu wa'atedou lala wa'auri.
Mangawuli Zi Miki moroi ba fasa edit
Arörö ira ba ngai kandra manu, wa oya zi no faoma lafatunö. Ba no alaŵa luo sa'ae ba ba naha nawu morete-rete wiga khö ninada, fefu amena iföfögö, eu galitö ifa'anö ba wulaŵa. Faramisi Si Kimi khö namania talu. Eh... moroi furinia mohede Zi Miki.
"He Kimi, hezo namada?" Ifaigi furi Si Kimi, "He ga'a ya'ugö da'ö, nomöi namada furi ba nidanö sabata. Hewisa wofanömö?" isofu khönia Si Kimi.
Hiza Si Miki, hulö na omuso sibai dödönia, oroma moroi ba mbawania, no baga-baga. Itema imane,
"Ae'e bale si to'ölö manö."
Ba Si Kimi, lö farisayo ia ba wehede ga'ania Si Miki. Ba gotalua wahuhuosara, tohare namania, ba simanö göi ninania moroi bakha ba naha nawu.
"He Si Miki, no mangawuli'ö? Hadia no ö'öli ba fasa niŵa'ögu khöu no mege?"
Ba ihalö Si Miki ba mbagi guretania, so garate angi, ngawalö faramasa, soguna ba wemangara ba dalu luo andre. Me no itaba manu inania, me hulö amena tohare Zi Kimi andre, ba lalau manga sibaga ma'ifu. Ihalö ba ibe'e khö ninania. Lalau ira yomo, latörö naha nawu. Ba no so ba dödö Zi Kimi na hulö so nibini'öra khönia. Ba meno lalau modadao, ba ibörötaigö wahuhuosa Ama Zi Miki.
"Hewisa wofanöu ba fasa mege, MIKI? Hadia no ösofu simane niŵa'ögu khöu?"
Te so mato dua meni, lö hede-hede Zi Miki, hulö zabu tödö ia, ba fanguma'ögu wa ilau mainia Si Miki, oi nifabalia'ö. Hehehe. Idugu ifakuru röngö-röngönia khönia amania. Ba no i'o-sabutödö ia Si Miki. Ba itaria itöngö Ga Kimi. Ba hiza no i'ila mai Zi Miki Ka Kimi, irege ifaogö manö ia.
Ba me u'ila no ma'ifu kamalinga danö khö namania, ubato sabata wanura. Umane, ae ha lalau ua manga, oroma sadania, na latohugö. Ufaigi wa somuso tödö ira ma'ifu tö.
Lö alölö afo, no zui orudu ira föna ba dalu zalo. Möi ninada Ina Zi Miki ba da'ö ba isofu khö Nama Zi Miki,
"Hadia no tola talau manga ba zi laluo?"
Ifaigi Ama Zi Miki, hulö na lö farisayo ia wano asoso göra, ba ifahökö ia tandra wa fao dödönia na lalau manga. Ba dakerania si sa ba so Zi Kimi iboka-bokai tasinia. Lö ta'ila hadia nihalönia. Me no sa'ae i'ohe föna göra andrö Ina Zi Miki, ba fangöngö-ngöngö nama Zi Miki khö Zi Miki. Ha tiu-tiu urongo, si fakhamö urongo imane,
"Hadia so duria si sökhi ba wafanömö, nogu."
Sambua fehede lö itema, hiza i no iboho mbawa. Ba isou göra dongania. Ba ifaehagö, töinia zui nono niha, oi ni hölu-höluni wama'ema si sambua fehede. Ba hiza omuso dödö Zi Kimi me taraso khönia wa hulö si lö simate zatuania so'ono ya'ia.
Me awai sa'ae lalau manga, ba zima'ökhö da'ö lö mofanö Nama Zi Miki ba kabu. I'odödögö ba wahuhuosa khö Zi Kimi. Ba dödönia bakha, ena'ö Si Miki andre tola fao khönia ba wangarato. Ba gotalua da'ö ba ifazaŵa ia Si Miki, ihaogö öra kofi ena'ö ami dödöra wahuhuosa.
"Lau, nogu. Lö ubini'ö wa omuso sibai dödöma daruaga inau, me no tohare ndra'ugö, heŵa'ae fanötönama mege wa ö'ohe wo'omou ba iraono, ba hiza lö salania da'ö, börö oi wa'oya halöŵö sitebai niröi. Inönö na sa ba mbaŵa dungö andre. Simane da'a, böi sa'ae tutunö khögu hadia dani wa'atoharemö. Iada'a nisofugu, hawa'ara mofanö'ö."
Ifaehasu ia Si Kimi, irugi dödönia wehede namania talu, me na lö sa'ae ya'ira ba gulidanö ba ha wa'afökhö khönia wondruginia tanö situmbu ia. Itema li namania talu andrö, si fao fa'asöndru dödö. Ba bangainia no i'osimate ia Si Miki. Afu-afunia na lafatunö wofanö me no ikaraini wa oya anga-angania.
"Simane da'a magu talu, ba yae ba da'a göi ninagu talu ba ga'agu Si Miki. Lö fatimba khögu na ga'agu Si Miki andre fao khögu. Ba danö si so ya'o ba lö hadöi niha khöda, ha wa omuso dödögu na ga'agu andre fao khögu ba wanolo ya'o ba halöŵö sino itehegö So'aya khögu. So khögu fabiri gana'a."
Ba wahuohuosania, ba fatöngö ira Zi Miki namania, ba iboho-boho mbawa Ina Zi Miki me hulö fagöna sibai ba harazaki si no i'amualagö Sokhö khöra ba zi ha'uga ngaluo si no numalö. Sifao ba wamadu göinia kofi, ba i'anema'ö Si Miki moroi sa,
"Simane da'a Ma. Na ba wefao khö nakhigu Si Kimi tenga lala sabua da'ö. Hiza i, hadia lö afökhö khögu ami hatö darua ami inagu ba nomo. Umane dödögu, lö böhö we'amöi misiyefo ba hiza satua marase moroi furi. Na fao atö dödömi ba ulau ua mangowalu, ba mato döfi dania ba amena ugo'ö nakhigu Si Kimi."
No ifaköu ia inania, awakhö-wakhö dödönia wamondrongo fehede nononia andrö. Ba hiza itema'ö,
"Lau nogu, fefu niŵa'ömö andrö ba no lala satulö sibai. Ba umane dödögu, haniha niha sanehe ya'ita ba wamakhai fongambatösa, te no mi'ila hewisa wa'atosasada andre. Lamane niha, wa ya'ita andre niha silö böla tai, ba na da'ö atö gohitö dödöu ba fatunö khöma hewisa mege wofanöu ba fasa, ma da'ö zinöndrania ba wanofumö mege."
U'eraerai no mendrua kali inönö gönia kofi Si Miki. Ba me inania zangandrö turia wofanönia andrö, ba ifazawa ia. Ihalö gana'a si no ibukusi ba nukha safusi, te so ba zi fulu kilo ia andrö.
"Lau, Na. Fofanögu ba fasa mege, ba wanofu hadia laku gana'a andre khöda. Ba hiza Ma, Na, akhigu Kimi, ana'a andre, ba no la'erai haragonia fefu otu milia."
Ba wamondrongo turia da'ö ba awuwu dödö Nina Zi Miki, tehandro ia tou. Ba simanö göi namania. Lö farisayo ira wa simanö wa'ebua. Me no awai ifaehagö ba itema Si Kimi,
"Lau magu talu, fefu gana'a da'a ya'o zowöli, me da'ö dani wa toharedo ba wangalui ana'a simane da'a. Börö me no so iada'a ba mifa'anö ami, möi ita ba naha wangirö'ö kefe (bank) ba da'ö ufa'ohe'ö mböli gana'a andre."
Lö ubini'ö tohafado wamondrongo turia da'ö. Harazaki wa lö ilau mainia Si Miki. Si so ba dödögu umane, alai na ilimo namania andrö Si Miki, me no tehöngö nono da'ö irege labali'ö ia duma-duma ba Danö Niha, lamane aka-aka Zi Miki. Ba hiza lö dozi si no tehöngö andrö atulö, hiza u'ila samösa wa no fondrege wa'omasinia khö ndra satuania.
Me möi ba bank, ilau ia föna Si Kimi. Ba lö iröi za döfa tanö ia Si Miki, me so so dödönia ma itukaini tuka aka-aka Si Kimi. Lö ara ba awai no so gefe ba döi Zi Miki 10 milia, ba lahalö ma'ifu gefe karate ba wangehaogö omo faoma fanabusi kabu si no tegadekö ba niha mbanua.
Mangawuli ira, ba tebai nisura hewisa wa'omuso dödöra. Ya'o manö ba lö sagu khögu wanura ya'ia, irege umane mahemolu utohugö, ba högö zura, waö-waö wa'auri niha si numana. No alaŵa luo göi, uröi ua ira sabata.
Hulö zohafa ndra'o, lö u'ila-ila no mangawuli ira. Ba ngafulu rozi moto frag, zolohe ngawalö zoguna ba wangehaogö omo Nama Zi Miki. I otarai mbalö lala ofeta nomora, sara lala niha. Ahöli-höli dödöra, me la'ila Ama Zi Miki, niha si lö böla tai.
Sanöndra si sökhi ba ya'ira si sökhi tödö edit
Alaŵödo wanötöi lö böla tai. Fehede da'a no fehede sabua sibai ba niha nitandrösaigö fehede andrö. Me lö aoha da'ö, ufaigi sombaso da'a göi fao dödö khögu na umane, harumani sa'ae ia andre, na lö böla tai eluahania mofökhö. Hana wa tai bakha dane-dane ba wanguhuku ya'ia me lö hadöi khönia. Ube'e manö furigu u'o-si-lö-mamondrongo, me utörö föna da'ö, bakha ba dödögu, alai sa'ae ndra niha andre, lau'a bale lö ta'ila hewisa wamatörö Zo'aya ba zi samösa niha. Iada'a me no itolo ira So'aya, hadia niŵa'öu, aila'ö lö? Ba na si sökhi fangera-ngera ndra'ugö, böi tutunö ia, ae wö i ba nomora, ma sa fakhai khöu ma'ifu, ha hulö zimöi manö manörö ndra'ugö, inönö halöŵöu, ha ba lafo ero ma'ökhö. Hulö da'ö zi so ba wangera-ngeragu ba lala numalö ba nomora. Ufatou-tou tödögu.
Usitandra hondra, ba ba zöröu i'ila do Si Miki. Ifahatö ia, ba i'owaido sa.
"Ya'ahowu Pa Lase."
Ara sibai utema, hulö zangifi ndra'o. Umane, hana wa'i'ila madogu Si Miki andre, arörö banuama ia andre. Börö wanofu-nofu dödögu, ba ufadoro we'amöi tou, ba hiza u'owai sa ia,
"Ya'ahowu, Miki, he zo namada." Si fao ituturu gamaudu wetaro namania, imane,
"So furi, Pak Lase, aine möi ita yomo."
Heŵa'ae amena falukhaga Zi Miki ma'ökhö ba hiza hulö zi no ara fa'ila ia khögu. Sökhi si'ai wanema'önia ndra'o. Hewa'ae ba wamörötaigögu turia andrö moroi yaŵa, ba ha hulö ni'angeragö ba wedao-daogu. Hahahah, sombaso iwai sindruhu no falukhaga, hahaha. Simanö sa ia nifotöi Novela, sombaso zotatugöi hadia zi fagöna nihalönia khönia.
Börö wa'akhari-khari dödögu, hewisa sibai Zi Miki andre, ba lö ara, ifatunö khögu wa no so zangombakha khönia wa waö-waö Zi Miki no so zanura ba WikiBuku. Na so ginötö ba tola ae faigi ba höndrögö manö ba da'a -->> Olayama ba wetaro Wiktionary Nias, sanura da'ö iwa'ö ba lö i'ila sibai döi bapa da'ö, andrö wa utolo ufatunö khönia umane ya'e döinia, Yasanto Lasetalk
Hiza lö uzara-zara sa'ae, fahuhuo-huo ndra'aga ba itaria ufakhölödo. Ba idugu tohare niha sato, ba wamaigi hadia zalua. No tehöngö wa so guro sitobali ana'a nisöndra namada Ama Zi Miki. Ba zi tanö'owi da'ö ba afönu tou newali niha. Ba ahöli-höli dödöra hewisa wa'atobali wa'auri niha, simane nifa'ema moroi yaŵa wa no la suli mane manu niha. Ba newali afönu niha, ba lö utahado, ulau mangawuli ua sabata. Ba ukaoni Zi Miki faoma Si Kimi simanö göi namania, mangonado ufulido sa dania.
Samigu aefa da'ö, arörödo, amena itörö tödögu na lö salua möido ba nomo ndra Si Miki. Me luo da'ö so göi rafema ira sanura ba Wikipedia Li Niha, irege olifudo. Lö uzara-zara, ufaigi bakha wanikha hondragu, ba ufaigi tobönö na lasöba'ö wofanö. Ba lö ara aefa ubörötaigö wanura da'a ba so manö halanga, lö mazadi zui, ba umane lau, ube'e sambua töi högö side-ide zui, Fa'afalukha Zi Miki khö Zanura ba Wikipedia
Falukha Zi Miki khö Zanura ba Wikipedia edit
Moroi ba zaröu umane, arörö ifasa khöda Si Miki andre, töinia manö mai Zi Miki. Ba Danö Niha, haniha zi lö mangila mai Zi Miki. Lau tafaigi dania, umanö bakha ba dödögu, lö muki irugi ma'ökhö simanö-manö mainia. Inönö me no oya gokhötara iada'a. Hulö tokea ma'ifu ira me samigu si lalö sa'ae falukhaga. Ba hiza ba ginötö wa'atoharegu andre, ba faudu sibai inötö wofanö Zi Kimi mangawuli ia misiyefo. Ufaigi ba no oya wa'atedou ba nahia ndra Ama Zi Miki. Omo satua no lalau tou, ba hiza te so mato otu niha tuka zohalö-halöŵö. Börö me no irai falukhaga, la'ondrasido. Ba sindruhu wa lö irai u'ila hewisa wa'atobali gulidanö. Lö utibo'ö ginötö, uhalö garate ba fena, u'andrö faramisi khöra wa usura waö-waöra andre ba Wikipedia Nias. Ha lafahökö manö ira niha khöda, oi sebua fa'omasi ba niha sangila huku.
Hahaha, sombaso da'a iboho-iboho mbawa, i'ila wa tenga sindruhu-ndruhu. Ha ba wame'e ma'ifu fondröni dödö ena'ö sombaso lö te'osö ia ba waö-waö wa'auri ndra Amada Ama Zi Miki, ma Ka Hufa döinia sindruhu. Na ladunö-dunö ba Danö Niha, wa Si Miki andre no niha sebua aka ba ginötö wa'aurinia. Hadia no irai So Zi Miki ba wa'auri niha sindruhu. Da'a sindruhunia ahatö ia ba hikaya. Ufakhölödo ba dakera nomora ba samösa zifakhai ba hörögu, onali utötöi döinia ba ata'udo ma sala. Fao uhaogö zörömi hörögu, ba tefaudu sibai amena ukhalaigö ia, töinia Abunaŵa. Manofu-nofu dödögu, hadia gamakhaitara ndra Ama Zi Miki.
Abunaŵa tenga sifatewu ba mbanua da'ö ba zi so ira amada Ama Zi Miki, hiza i lö aboto ba dödögu hadia gamakhaitara, uröi da'ö sabata, me omasido u'ila hewisa duria wofanö Zi Kimi hadia fao khönia Zi Miki?
Ba wa'ato niha, egebua ma'ifu li ma wahuhuosa, no monukha si sökhi ira. Ba Si Miki no ifake mbadagahe si baga, lö aetu ifamökö-mökö gahenia. Fakhamö ikhamödo ma'ifu fa'aiŵö, ba dödögu te solau fohasa ia andre. Lö uforoma'ö sibai göi khöra, u'ohe manö ba wa'igi, umane lau manö khöda, sole baewali niha tou ba gulidanö.
"He magu talu, Ama Zi Miki",
ifaigido sa me ukaoni ia, ba no fondrege wa'aböböinia ba wamazaŵa gama-gama zofanö misiyefo. Ubaranikö wanofu khönia,
"Haniha manö zofanö, Ma" Itema ligu,
"He Pa Lase, sakali da'a ba fao Zi Miki, tenga toröi ia ba da'ö siyefo, ha ba wamaigi manö nahia nakhinia Si Kimi" ,"Aha, lau Ma, baga da'ö ha göi zala ndro Zi Miki sakali da'a",
fao fohehegö wanemagu linia, ba hiza lö abao dödönia, itema imane,
"Ya'ia Pa Lase, barö da'a dania ba toröi khöma ba da'a nono mbene'öma Abunaŵa, gasa-gasa wa lö sangawuli Zi Miki dania."
Sara alölö afo sa wahuhuosama andrö, ba alio sibai no tohare moto samaondraogö ya'ira. Ba fabalisa sitebai mututunö hewisa wa awakhö-wakhö dödö. No italagui manö Zi Miki amania ba inania. Ba me no tola sa'ae mofanö ira, ba hatö tanga so dada ba zandrela moto zoroma. Lö ubini'ö mo'ala göi ma'ifu hörögu. Lö u'ila na sombaso hikaya da'a morasoi sifagölö ya'o? No tola nitahö wa sa'igi ira tola manö lamane, ya'ia khö namada da'a, hezo isöndra-söndra khönia hikaya da'a. Abölö na sa aefa da'a tou dania ma'ifutö, utohugö wa'atoröi Abunaŵa ba nomo zibayania Ama Zi Miki.
Mofanö ira ba ufulido göi ba nomo ba wanohugö hadia manö dania halöŵö Abunaŵa ba nomo zibayania. Na molo'ö famaigigu, no gari-garifö Abunaŵa da'a sebua buranga ha ya'i lö u'ila na ebua göi lawukhonia. Hahaha ta tohugö mi tou ba da'a he ....
Abunaŵa edit
Fahuo-huo ira, ba lö la'ila-ilado. Hulö tohafa ira, ba töinia manö ha sanörö göi ndra'o. Ba no sa'ae ta'ila ba khöda ba Danö Niha, hewisa wasumangeta niha, hiza ibe'e afogu Ama Zi Miki. Ba no fasalatö ndra'o, uhalö manö ba ulau monganga. Ba wongangagu afo, hulö moriri dalingagu, ba fa'itaria oromado ba zörömi zandrela nomo ndra Ama Zi Miki, ufaigi hulö so zi fabö'ö ma'ifu, no oyo dangi-dangigu. Ba hulö zalidafaö ndra'o, hadia zalua bakha ba dödögu. Hemmmm, amena ibe'e ögu nidanö safusi Ina Zi Miki, me ahele böböi ndra'o, ba uduhugö wamadu idanö, me ya'o salimbo'anö.
"Hana Pa Lase, hana no tagoyomö ndra'ugö?" ifahededo Abunaŵa.
Ufaigi ia, ba lö utema, ha uboho manö. Ba hulö mukhölö-khölö khögu danö. Ba lahegö-hegö ira Abunaŵa, so nawönia, me no owulo ira ba fale-fale khö ndra sibayania Ama Zi Miki. Ba i'ila wa hulö uhalö khögu wa'igira andrö, ba ihaogö khögu Abunaŵa. Amena utema linia umane,
"Te salimbo'anö ndra'odo andre, Abunaŵa." Imane khögu,
"Ya'ia Pa Lase, tenga fino sito'ölö la'a da'ö, fino muhua nibidi zibayagu mege. Börö me lö asese ölau monganga ba alimbo'anö. Ha ba zi'oföna da'ö na ölau monganga sakali tö, lö sa'ae alimbo'anö dania."
Lö fa'ahono Nama Zi Miki, so möi föna so möi furi. Manofu dödögu, hadia zalua. Ba no udölö me fakhai ba hörögu hulö no ira'u manu silatao, usangezosi-böböigu ndra'o ba u'amaigi'ö tandra luo. No bözi felezara sa'ae. Takana khögu, ba dödögu te manu meda da'a ni fatunö ndra Abunaŵa, arörö nitawar saribu balö huhuo ndra Abunaŵa da'ö mege. Te la'osindruhugö wanaba diwogu. Ufahatödo, ba mo'agagau samaruka sime ba wanaru'ö döla-döla gehomo nomo Nama Zi Miki. Ba naha nawu ba so mato datölu ndra ina-ina talifusöra, sitengabö'öra ba wamalului halöŵö khö Nina Zi Miki, me fohalöŵö ba nomo andrö khöra, ya'ira zanga'asogö balazo (lataha mbalazo).
Itörö wa manu da'ö lataba, mo'eo-eo, ba u halö lakagu, lö omasido lawalinga simöi mangero ndra'o.
"He magu talu, so zimöido sabata ua, andre uröi ami." Ba ifazaŵa ia Ama Zi Miki ba i'ondrasido,
"He Pa Lase, utötöna na öbaloi sabata, tabadu ua nidanö aukhu."
Sindruhu no fasalatö ndra'o, bakha ba dödögu, hadia zi tola ube'e khöra ba we'asogu ba da'ö. Awai itahö zi so ba dödögu Ama Zi Miki, imane:
"Tenga hada'ia Pa Lase, ma'andrö saohagölö wa no ö fazaewe duria ba zombaso hikaya andre, wa Si Miki ni'ila ba götö danö andre, no sebua fekoro, sebua aka, buayo, ba tanöbö'önia sambö baga."
Itohugö Ama Zi Miki imane;
"Ba hiza me no ötolo wamazawili ma ba wamazaewe turiama ba Wikibuku Bahasa Nias, no so ba dödö zombaso, wa ya'aga simane niha sito'ölö göi. Na ya'o zanura da'ö ma sangombakha turia andre, hezo manö wa farisayo ira khögu."
Da'a ni'andrögu saohagölö. Asöndru dödögu wamondrongo fama'emania huhuo andrö, ba abua gahegu wofanö, heŵa'ae ba dödögu wa tenga sibai börö me no tesura ia bada'a. No inötö ba zombaso hikaya andre, ba wangeheta fandrafe sambö baga zanguma'ö wa Si Miki sebua aka. Aka itaria moguna ba niha ba wanohugö lala wa'auri.
Abunaŵa, itoko-toko mbalö gosö-osö si so ba mbalö geu. Ufaigi no irugi matonga za ibali-bali manö, irege umane, da'a ia zi Abunaŵa, hehehe, mangaga ua he, tatohugö dania. Awai mangaga, ba ihaogö kofi Ina Zi Miki, fefu zo halöŵö oi mamadu kofi. Awai ndrohu-ndrohu wamelege ndra Ama/Ina Zi Miki andre ba zo halöŵö khöra. U'ila moroi ba zaröu so ma'ifu ndra sifaola omo andre, ira alawera ba wanolo Ina Zi Miki ba wombambaya halöŵö. Awena sibai u hofo gögu idanö, moroi furigu, hulö moroi ba ngai lala sebua, so zondröndrö hulö za toru. Tokea sibai ndra'o.
"Hadia da'ö", "Mohededo khö Nama Zi Miki."
Niha föna döinia, fa'ofetu ba no ofeta ia, awai angi wagohisania ba gamaudu li da'ö. Ufazawado, ba ugo'ö ia me no tobini ba ngafu gae fetaro li sabölö sibai da'ö mege. Ofetado, ba Abunaŵa no teköröbu, alau ia ba nohi.
So ma'ifu khögu wa'ata'u ba ubaranikö manö, me no i'osimate ia Abunaŵa. Lö maliŵa, ba sibayania Ama Zi Miki, isalogoi ba me ifedadao, Abunaŵa ba sindruhu no ileuni. U hekhe ma'ifu mbo'ö khönia, me lö hadöi sesokho ia. Ihalö nidanö Ina Zi Miki, ba ibadu sa Abunaŵa, ha ya'i awai ni totogö bulu nohi ia, hulö zawuwu tödö. Ubabaya dangania, no kafutö, ba ba dete meza bangai mbawa ndruhö, u'ila so afiso ba ösö u goso ba hulunia, ba so ba zi fulu menit, ileagö ia, ba hulö awena mangawuli hanu-hanunia. Sibayania Ama Zi Miki ibidi afoma ba ifazaumba khögu wehede imane;
"He Pa Lase, ufaigi Abunaŵa andre, no kafutö, tolo ndra'o kaoni khögu ma'ifu matiri, ha lasuti ia."
Tohafa ndra'o, Abunaŵa, no modadao hulö zi lö fökhö. Usofu khö zibayania, hadia ukaoni matiri so suti? Ba ilau ma'igi sibayania, imane ilau mai tai Abunaŵa andre ba simanö göi niha bö'ö, u'anema'ö umane,
"ya'ia da'ö,Pa. Ha lasofu ua haniha zibayania", heheheh hiza mahehegö, ba no wa'i abölö khöda Abunaŵa.
Me no alawa sa'ae luo, ba ufaigi so duria ba WA Grup, wa dania tanö'owi so rafe ba wanohugö si no labörötaigö ba wamanöi fanura ba wikipedia ma wiktionary Li Niha.
Lö utaha, u sura wa ya'o fao ba rafe andrö, me na tenga ya'ita haniha nasa ni döna-dönada. Lö anau sibai wanuragu, ha ufatunö manö wa fao ndra'o. Ba wanuragu turia andrö, ba amagu Ama Zi Miki no i'agö ngai mbörö nohi föna nomo, fahuhuo ia khö Zi Miki ba telefo. Lö ara, ba awai fahuhuo ia, ba ifatunö wa na lö halanga, mahemolu mangawuli Zi Miki moroi siyefo.
Mangawuli Zi Miki edit
Me no fahuhuo ira ba telefo Zi Miki faoma amania ba hiza no mazaŵa dödö ninania hulö na tohare ya'i ma'ifutö. Lö auli no ba isofu khö Nama Zi Miki, hadia hari ma'ökhö. Töinia manö ono zisambua ba gadolu, no fondrege wa'omasira khö Zi Miki andrö, ba simanö göi Zi Miki khöra, he no maulu wa asana zifalukha ia ba danö ndrawa, ba lö famaedo masi-masi zatua. Sambua famahaö ba zombaso sura andre, na iraono atö ita, böi tafalua wangabu dödö zatua, tafalua zi sökhi simöi fangomuhua döi ngambatö, ba na satua atö wetaroda iada'a, böi angelifi ba ndraono, fahaö ia ba lala satulö si no lafakhoi ba mbuku gamabu'ula li ma taromali Lowalangi. Na ölaŵa zatua ba lö faya zi no tesura ba zura wa tola simate fandru ba dalu zogömi-gömi, tabayaisi wofanö, lö ta'ila lalada, andrö fatua so ginötö, fosumange ira, omusoi'ö dödöra ndrege wa'abölöu. Böi baloi wa'atohare waniasa khöu nano lö ya'ira sa'ae ba gulidanö. Fatua so ginötö si sökhi, falau wa'abölöu ba wamalua si sökhi khöra. Tebai nisulöni wa'omasi zatua ba ndraonora.
Dua ngaluo aefa fatelefo Zi Miki ba irugi mbanua ni'omasi'ö, Tanö Niha. Ba hiza tenga u'odödögu we'amöi ba da'ö, so ma'ifu halöŵö ni babayagu khö Nama Zi Miki, ba wangahaogö khönia gambara danö, ba tefaudu sibai ba wa'atohare Zi Miki göi, me moguna so dandrotangania ba zura andrö. Gambara danö naha nomo Nama Zi Miki faoma ha'uga nga'örö kabu si no te'öli barö ginötö me so ma'ifu harazaki moroi ba nifolala Zo'aya khöra.
Si sökhi tödö, i'ila Yehowa lala ba wanolo, oi si lö ikhamö fangera-ngera niha, ba me So'aya zamalua ya'ia, haniha zi tola manaha? Fa'atulö ba fa'asökhi tödö sambua duma-duma ba niha sato. Tenga balazi so niha ba dadaoma salaŵa awena mangi'ila si sökhi, ma zui ba wa'amokhö, oi tenga sitobali dane-dane khö Lowalangi wame'e harazaki ba niha. Tödö nifaigi Yehowa.
Irugi mbanua ni'omasi'ö Si Miki fao fa'omuso dödö me omo nifababaya'ö ba tuka no musindro ba awakhö-wakhö dödönia. Fatua lö irugi zinata nomora, ba newali ba i hasugö ia, hulö zangifi, lö farisayo ia wa tola latema wa'ebua dödö Zo'aya andrö khöra, tola la'iagö nomo simane niha bö'ö, tenga sa'ae ba nose. Ba hiza i zazi bakha ba dödönia, wa lö iröi Danö Niha ni'omasi'ö ba simanö göi ba wa'afarisayo khö Yesu Keriso, me aboto ba dödönia walö fangefa baero Yesu, lö lala we'amöi ba zorugo baero farisayo khö Zo'aya Ya'ita Yesu Keriso. Hewa'ae ha badödönia fefu alua da'ö, ba tola ubaso moroi ba zikhala wa'iginia, wa hulö naso zedöna idöna-döna. Meno sa'ae alö wa'erege dödönia, ba fahuhuo-huo ira ndra amania ba inania, ba zima'ökhö da'ö, Ama Zi Miki i'ondrasi ndra zi fatuka khönia, ifatunö wa ha matonga ngaluo ua ma'ökhö wohalöŵö.
"He, Nade. Ma'ökhö ha matonga luo ua ita he, me awena irugi Si Miki andre, ba tatu fahuo-huo ua ndra'aga". Nade, kafalo tuka zangahaogö omo ndra Ama Zi Miki, ifahökhö ia, ba hiza moguna sibai khönia göi gefe ma'ifu, ma no sa'ae tölu waŵa lö mubai ua sekola nono khönia, ba börö wa'alaŵönia, hulö awai ni kusi mbawania. Laföfögö wakakera, ba hiza Ka Nade, abua sibai gölönia wofanö. Ba ha ya'i fa'iŵa'ö gefe khö Nama Zi Miki, ba no tohare Nama Zi Miki, ba no igölugu gefe.
"Lau Nade, ya'e gefe andre, simane si no öfatunö khö ga'au Ina Zi Miki, wa moguna sibai khöu, ba fake ua". Ufaigi Ga Nade, asöndru sibai dödönia, ba tokea ia me tenga ha fa'ebua ua sekola nono khönia, no ebua sibai nitema nia andrö. Hiza lö sagu khönia wehede hewisa wa'omuso dödönia andrö, me ha fatuka andre zi tola lala khönia wanöndra kefe. No oya zimöi ba nomo khönia wangandrö ono andrö khönia la sekolakö niha, ba hiza lö itehe me lafaha'ö ba zekola ndrawa, khö ga Nade andre, ha lö i'a nagole asala lö i'amawa wamatinia. Ilau mangona, ba no aoha sibai mbekania wofanö.
"He ga'a Ama Zi Miki, Ina Zi Miki ba Si Miki, hulö uröi ami ua, mangawulido ba nomo, ba si'oföna u'andrö saohagölö wa'omasimi khöma, lö sulö si oroi ndra'aga".
Ba itema Si Miki, imane: "Lau, magu talu, bologö dödö lö hadöi ole-ole moroi khögu". Si Miki ihalö sambua mbarunia ba ibe'e khö namania talu Ka Nade.
Ufaigi yaŵa dalu mbanua, sindruhu-ndruhu no'ogömi, imane tödögu, "hadia bade ia andre, ma ha fangalu manö, tandra wa alua deu?". Lö uhalö fökhö högögu, umane lau da ilau ua molombase Si Miki ufulido zui mahemolu. Edöna ulau mofanö, me u'ila ka Nade na ibekai lakania ba no mangona ia. I'ondrasido Ama Zi Miki.
"He Pa Lase, "ba tokea do sibai me tenga ba da'ö so dödögu, hulö zohafa ndra'o me ikaodo." " Utemasa umane,Hadia ga'a?"
Ufaigi so ba dangania garate angi, ifahatö ia, ba imane khögu; Bologö dödöu pa Lase, löhadöi ole-ole zi Miki, sawena ö'ila khöda nono andre, wa'areunia wolohe hadia ia. Uboho ma'ifu mbawa khönia, ba umane ;
"He ga'a Ama zi Miki," "No ebua sibai mbualamö andre, khogu tenga börö wa'ebuania, sabölö moguna khöda andre, wa ato ndra talifusöda sombaso wangawuli zi Miki andre, ba tola möi famaedo ba dödora ena'ö lafalua zi sökhi si no mibörötaigö bada'a. Na ya'o samösa lö uröi ami, ha ngawua waö-waö wa'aurimi andre, zi tola ufa'anö ba Wikibuku, ba ututunö dania khöndra awöda sedöna göi fao ba wondrou'ö ngawalö hikaya si so ba Danö Niha"
Utema garate no mege, ba ufaigi so ma'ifu garate so wuge'e ba soyo, so khönia misa numero. Hulö no tara hörögu wamaigi da'ö, lö sa'ae ubaloi ba wa'ara ba u'ondröni'ö baero garate andre, ba tokea sibai ndra'o fao fa'asöndru dödö,... umane ; "lö sulö moroi khögu, mbuala moroi khö ndra Ama zi Miki"
Mofökhö Nama zi Miki edit
Meno sa'ae ahono dödöra ba harazaki nitemara, omo no awai lahaogö, Si Miki no awai mangowalu, ba so khönia naha wangahaogö ngawalö mbotoŵa soguna ba nomo, simane meza, kurusi, baku-baku, lamari, farate, btn. Naha watukasa andre khö zi Miki fatahö sibai ira nomora ya'i. Lö ara sibai meno aefa mangowalu ia, ba ibokai lala wangalui andrö ba me utörö menewi föna nahiara ba u'ila ato niha simöi wamaigi lamari si no tola ifamawa si Miki, ba ibörögö tebai i'ohalöŵöigö samösa me oya zamamazökhi'ö ngawalö mbotoŵa khö zi Miki. Ba börö me no göi ara lö sifalukhaga ba ulau molombase ma'ifu ba naha andrö, ba hiza atulö sibai zinahö dödögu wa no ato sa'ae zanolo zi Miki ba wombambaya halöŵönia. Lö arado sibai, me aösö-aösö ndra'o so göi nifalukhaisigu. Me urugi naha andrö, ba omuso dödögu, me i'ondrasido si Miki. Lö fa'afabö'ö galakua, i'otanedo wahuhuosa. Hewa'ae no ma'ifu so wa'amokhö, ba lö fa'afabö'ö. Amuata zi Miki andre, sambua duma-duma khöda, me lö eluaha wa'asiliyaŵa ba nawö. U'andrö gönia afo zara, ba lö arado sibai, ba me edöna ulau mofanö, ba fakhamö usofu hewisa duria ndra amada. Tokeado sibai, me ifatunö khögu wa amania Ama zi Miki no tebai mowawaö börö me no göna ia simalapari barö ginötö andre. Ufahasudo, mangandrö dödögu umane; "He So'aya, Ya'ugö zamadöhö ngawalö wökhö dalifusöma ama zi Miki andre." Börö me'alio-lio göi ndra'o, hiza lö oya nifa'emania khögu. Ba zi lö ara andre, ufasolisi ginötö wamalukhaisi si Miki zui, oya zedöna usofu, simane haniha lakaoni khönia, alaŵödo wanötöi töinia inönö me no mangowalu ia, faoma ba wanofu hadia no lafareso namania Ama zi Miki ba rumasaki? Oi da'a zedöna usofu.
Me no ara lö simöi ndra'o ba naha ndra Ama Zi Miki, inönö me so wökhö si göna ba mbanua si so ya'aga. Molo'ö famareso ndra matiri, lamane fökhö moroi ba dungö. Irege lö aetu ma'oguna'ö lumbawa (balu-balu mbawa) lö u'ila sibai hadia so ba nahiami wökhö andrö. Lö uzara-zara sa'ae, ba zihulöwongi meluo da'ö, möido ba fasa wo wöli soguna khöma, hiza u'o dödögö wanörö naha ndra Ama Zi Miki. Moroi ba nahama, mogaözö-gaözö ndra'o, irege, urugi ba nahara,bözi 9.30 Wib.
U folombase, hondragu, ba moroi ba ngai lala föna perabot ma panglong Zi Miki, ufaigi ato ae zohalöŵö ba naha Zi Miki. Ufahatödo, ba moroi ba zaröu, u'owai ira.
"Ya'ahowu yomo". Ba tokea sibai Zi Miki, ba itema ligu,imane; "Ya'ahowu, Pa. No ara sibai lö sifalukha ita".
Ifahatö ia Si Miki, möi itabe ndra'o. "Hadia duria,Pa". Utabe sa ia, ba hiza no alaŵö-laŵö ndra'o. "Turia sisökhi, le Miki". "Hewisa duria mbaliou?". Sifao mozizio Zi Miki, möi ia wanguma'ö wangahaogö kofi khö wo'omonia, ba itema imane; "Turia sisökhi,Pa"."No moföna misiyefo sabata, me ono Zi Kimi, lahalö, ba omasi sibai na baliogu möi ia wamaigi fangowulo nono khö Zi Kimi". "Lau, bale omuso dödöda fefu na simanö löhadöi so'amböta khöda inönö ba mbaŵa wökhö dungö andre"
Ba zi lö ara sibai ba ofeta göma kofi, ba so ma'ifu zonönö, wa no so nono sawuyu khö Zi Miki. Ba ifatunö khögu Si Miki wa fökhö mbalionia, no döhö hewa'ae tenga ha dalu-dalu moroi ba rumasaki so ma'ifu dalu-dalu mbulu ndru'u nibadunia. Omuso dödögu wamondrongo turia da'ö, hiza umane ba dödögu, hadia aefa da'a zedöna usura, sifakhai ba waö-waö ndra Ama Zi Miki andre.
Lö ara sibai ndra'o me so nasa zedöna ufalukhaisi inönö me lö nasa mu öröba (vaksin) simedölu ndra'o. Ufazaŵado, ba u'angonaisi Zi Miki.
Omasi Fao ba Wikimedia Nias edit
Ba zi tanö'owi, aefa sibai ulau mondri, awena sibai ulau mudadao föna TV, eh moriri hapegu, ufaigi, so wogaoni moroi khö Zi Miki. Lö utaha sa'ae, uhalö hape ba utema linia: "Ya'ahowu, Pa Lase", "Fehede si'oföna moroi khö Zi Miki" Oya kese-kesema, ba hiza ofeta ba nösinia ya'ia da'ö, omasi sibai Zi Miki fao ba gangowuloa zanura Li Niha ma Wikimedia Nias. Lö ubini'ö na omuso sibai dödögu, böhöi ua manura sambua zinura, fa'omasi ba wefao awö manö no sambua fohi'a dödö si lö su'a-su'a. U'osindruhugö khönia wehede wa teboka mbawandruhö me sambua zi lö irai taya ba dödögu, wa halöŵö andre ya'ia da'ö halöŵö nifalului zato. Hiza awai fahuhuoga ba u'anohugö'ö ba gangowuloa zanura ba Wikimedia Nias, wangombakha wa Si Miki, edöna fao khöda ba wahasara dödö ba wondrou'ö halöŵö sanandrösa ba Li Niha, ba hasara dödö oi fao dödö.
Ufaigi ba meza no so kofi saitö ni haogö niha nomo, ba u sifi ma'ifu, ba no adöni dödögu wamaigi TV me so duria sahöli-höli dödöda ya'ia sa'ae zohalöŵö ba wamareta faoma lalau khöra dangara, umane ba dödögu, alai na aekhu ami ba wamakhömi. Hiza lö aetu no ufaigi hapegu, ma so zöndra moroi khö ndra talifusö sifakhai ba wa'afaböbö Zi Miki. Olifudo mege wanofu khönia, hadia tabe'e töi wogaoni ba wiki soguna ba döi zangoguna'ö.
Ba wa'atoheragu ma'ökhö, lö sibohou sibai, ha ba wamatuna na si Miki no sa'ae fao ia ba Wiki, hiza ibalazigu ginötönia ba wombaso ngawalö zi no la sura ba Wiki Nias. Lö ubini'ö na omuso dödögu, me idugu ato zo baso, ba monönö wangerai zombaso ba mbolokha gu'ö. Lö ara sibai wa'atoharegu, ba so göi zedöna usura danöbö'ö.
Fehede Fangasiwai edit
Sanura da'a Yasanto Lase
Molo'ö fa'atumbu, ya'ia da'ö ba
Hilimböwö — Desa Hiligara
Kecamatan Gunungsitoli Selatan
Kabupaten Nias
Iada'a toröido ba
Batam