Hino wa'esolo Zabölö Gaŵöni föna, ha ya'ia zesolo geu ba danö. Atö döfa lö ibaya mbanua mbalazi wa'alaŵania. Ba me i'ila da'ö balugu Luo Mewöna, ba imane dödönia: Na tedou ia ma'ifu tö, ba ibaya ndra'o yaŵa ba Dete Holi Ana'a andre, ba adudu ibe'e dania.
Andrö dania ha samuza ha ma'ökhö khö mbalugu Luo Mewöna, mu'ao ia khö Zabölö Gaŵöni, imane: "He Sabölö Gaŵöni! He ŵa'ae esolo sibai ndra'ugö, ba so sa khögu danömö wamunumö dania, ba angongo ndra'ugö, irugi ŵa'a tou, ba obou mbotou."
Ba isofu Sabölö Gaŵöni khö mbalugu Luo Mewöna imane: "Hadia dandraŵa wamunugu andrö khöu, balugu Luo Mewöna." Ba imane balugu Luo Mewöna: "Ya'e khögu nga'ukhu zi'öli, saukhu moroi ba galitö, ba ulau ia ba dölamö, ba asila ndra'ugö, irugi ŵa'a tou. Faya sa wa'ebua hogumö; atata sa da'ö dania ube'e, na ulau nga'ukhu zi'öli andre khögu, moroi yaŵa."
Ba me irongo da'ö Sabölö Gaŵöni, ba mege-ege ia. Siŵa luo siŵa mbongi, i'era-era tödönia wa'amatenia, na ilau da'ö balugu Luo Mewöna. Andrö dania oi ibali'ö fege-ege Sabölö Gaŵöni: he uwisa ena'ö wangorifigu, fa lö mate ndra'o ba nga'ukhu zi'öli andrö khö mbalugu Luo Mewöna? Ha niha ena'ö zangorifi ya'odo andre, ena'ö lö angongo mbotogu? Awena so Zabölö Ge'o, awö Zabölö Zinarikhi, awö Zabölö Manawa, awö Zabölö Nue, awö Zabölö Gafoa, awö Zabölö Ŵeŵe, ba fefu manö geu ba danö, ha wa'oya ira, ba owulo tanö föna Zabölö Gaŵöni.
Ba lasofu khönia: "Hana wa mege-ege ndra'ugö, hadia mbörö?" Ba imane Sabölö Gaŵöni: "No urongo li mbalugu Luo Mewöna, yaŵa ba Dete Holi Ana'a, imane: Faya sa wa'esolomö andrö, angongo sa ndra'ugö ube'e; na ulau nga'ukhu zi'öli andre khögu, ba mate'ö, irugi ŵa'a tou."
Ba imane Sabölö Ge'o: "Böi busi dödöu da'ö, Sabölö Gaŵöni, ya'e ndra'aga bele-beleu moroi baero da'utendro'ödo ba dölamö, ba ubalugö mbulumö bulugu." Ba imane göi Sabölö Zinarikhi: "Ba si manö göi ndra'o, Sabölö Gaŵöni. Ufaedogödo göi ba dölamö, ba ubalugö mbulumö bulugu." Ba imane Sabölö Manawa: "Da'uremö mbörö ndrahamö, Sabölö Gaŵöni, ba ubalugö mbulumö bulugu. Ba fefu, ha wa'oya geu ba danö, ba oi si manö wehedera khö Zabölö Gaŵöni, ba he göi Zabölö Nue, awö Zabölö Ŵeŵe, fefu. Oi labalugö Zabölö Gaŵöni bulura, ena'ö lö oroma ba zamaigi mbulu Zabölö Gaŵöni andrö.
Ba me no mo'ahonoa labalugö mbulunia fefu ngawalö geu ba danö, awö ngawalö ŵeŵe fefu, ba lamane khö Zabölö Gaŵöni: "Andrö tou nga'ukhu zi'öli andrö khö mbalugu Luo Mewöna. Akha aukhu ia, moroi ba galitö, böi ata'ufi."
Ba i'andrö Sabölö Gaŵöni nga'ukhu zi'öli, saukhu moroi ba galitö, imane: "Lau tou, balugu Luo Mewöna, khöu nga'ukhu zi'öli andrö!"
Ba ilau balugu Luo Mewöna ba dödö galizuzu khö Zabölö gaŵöni; ba lö atoru mbulu sahurö, lö'ö na'i mangarö, Zabölö Gaŵöni no mege; ba imane na: "Lau na, balugu Luo Mewöna, khöu nga'ukhu Zi'öli andrö, saukhu moroi ba galitö, lö'ö sa ata'udo!" Ba meziŵa ilau zi ma'ö-ma'ökhö balugu Luo Mewöna khö Zabölö Gaŵöni, ba ma'ifu lö atiho döla, lö atoru mbulu sahurö khö Zabölö Gaŵöni, börö me no orudu ira fefu, ba wangabe'e ya'ia, ena'ö lö mate.
Umbu edit
Heinrich Sundermann, "Amaedola ba Manömanö" bakha ba Niassische Texte mit Deutscher Übersetzung, 's-Gravenhage, Martinus Nijhoff, 1905, nga'örö 32-33.