Wb/nia/Natalia

< Wb | nia
Wb > nia > Natalia
Samösa zanunö moroi ba Swedia

Me ŵalu fakhe nasa ndröfinia, ha isöndra wa'ohahau dödö Natalia na möi ia ba gereja.[1] Hulö na so zondröni ya'ia we'amöi ba da'ö, ba ero so ia bakha ba gereja irasoi hulö na so ia ba zinga galitö same'e anaukhu-naukhu ia. Börö da'ö oi i'anöröi gereja si fahatö khöra. Möi ia manörö ba gereja kota, ba möi ia ilau mangandrö bakha ba Gereja Paroki, ba asese möi ia mangondrasi Fangowasaini Misa[2] ba biara[3] ndra suster.

Desa, heza toröi Natalia, no manuge yaŵa ba dete sambua hili-hili. Ba ero ifatörö hörönia mitou ba ndraso Natalia, owua-wua sibai dödönia, hulö na oroma zi sagörö ulidanö fönania. So göi sambua biara ndra suster yaŵa ba hili-hili andre, andrö asese lafotöi desa si toröi ya'ia "Bukit Suci". Hili-hili ni'amoni'ö. Ba ba naere-naere hili oi muzawili nomo niha mbanua irugi tou ndraso sebolo.

Akhinia, si döfi awuyu moroi khönia, no ono'alawe si sökhi sibai bawa. Faudu sibai labe'e töinia ira satuania Dewi. Me ide-ide ia nasa no lamane niha wa edöna tobali Dewi ono'alawe si baga-baga dania. Akaeŵa-kaeŵa ia ma'ifu, atarö nono hörönia ba na fahuhuo ia oroma khöda wa ono sonekhe ia.

No fabö'ö sibai Natalia. Itaria laŵa'ö si faola omo khöra wa hulö bebe ia. Ba aila göi ndra satuania wangoroma'ö ya'ia ba niha. Na ha mena'ö ikhunia zabila, ba no mena la'ohe ia ba "klinik"[4] si tola mamalua "operasi plastik", sambua operasi sangadölö'ö ikhu. Ba na zui ifönia zakaole, ba tola mena la'ohe ia khö dokter spesialis, samasa fangadölö nifö nifotöi brace, sasese ta'ila la'oguna'ö iraono si bohou ebua ma'ökhö. Bahiza töra moroi ba da'ö khö Natalia. Hulö ŵa'i na gofu hadia ia no oi fabörö manö. Lö ahöli dödöda wa tobali fama'igi niha ia.

Heŵa'ae no i'elifi khala-khalania Somböi ya'ita, no sa'atö ibe'e khö Natalia howu-howu si töra moroi ba niha bö'ö. Onekhe ia manunö. Na manunö ia, terongo hulö na ira mala'ika samösa zanunö. No göi la'ila da'a niha mbanua me fao manunö Natalia ba zekola wanunö. Oi akhari dödö niha ba Gereja na larongo linia, hulö oroma khöra nidanö sohau-hau. Itugu ebua-bua Natalia, itugu sökhi nasa linia. Börö da'ö oi labe'e khönia zinunö "solo" ni'anunöisi ba Gereja. Ba na so ia ba Gereja, na manunö ia, ohahau sibai dödö Natalia. Hulö na irasoi wa ba da'ö nomo sindruhu khönia. Bahiza baero Gereja, no aila-aila sibai, börö me i'ila wa si lö sökhi bawa ia.

Ba zekola ato sibai nawö Dewi, akhinia. Onomatua ba ono'alawe, oi omasi ira lahatö'ö ira khö Dewi. Omasi ira fawude khönia, omasi ira fao khönia ba lala. Lakaoni ia na so zalua ba nomo khöra. Ha Natalia zi lö lakaoni.

Ba Dewi, aila sibai ia me si lö sökhi bawa ga'ania ira'alawe. Itaria ata'u ia ma la'o'aya ia niha börö ga'ania alawe andrö.

La'omasi'ö Natalia ira satuania. Lö lafabö'öni wolau khönia. Bahiza oroma sa'atö wa Dewi sa ono omasi'ö khöra. Da'ö zi lö isöndra Natalia: fa'omasi.

Ono solo'ö khö zatua Natalia, i'odödögö wangomusoi'ö tödö he ira satuania ba he niha bö'ö. Onekhe-nekhe ia ba zekola. Oi i'ila ngawalö wamahaö ba sejarah, biologi, matematika, btn. Ba oi ahakhö dödö ndra gurunia khönia. Ba no irai irongo zifaola omo sanguma'ö kö namania, "No wö arörö dödö Zomböi ya'ita me iwöwöi Natalia andrö."

Ha ba Gereja isöndra wa'omasi Natalia. La'omasi'ö ia ira Pastor, ira Bruder ba ira Suster. Ba i'omasi'ö ia Yesu. Ero sihulöwongi möi ia i'ondrasi misa ba kapel ndra suster, ba ero luo Zumaha ilau mangandrö lala röfa.[5] Ero ituhi danö bakha ba Gereja, irasoi wa so Zo'aya ba zingania. Ero manunö ia, irasoi wa so khönia wanötöna. Irasoi wa edöna alua khönia zi lö mudöna-döna. Ha da'ö zi tola mangefasi ya'ia moroi ba wa'abudödö andre.

Lö irai itura'ö gabuladödönia andre khö ndra satuania Natalia. Lö omasi ia ibusi nasa dödöra. Itandraigö wanguma-nguma'ö ba dödönia wa i'omasi'ö Zo'aya ba wa i'omasi'ö ia So'aya.

Ba i'omasi'ö sibai göi nakhinia Dewi. Na fahokha ira, ba lö aetu ibe'e ena'ö möna nakhinia. Asese möi ira manörö ba mbenua ma zui möi ira ba fasa ba wamaigi-maigi ngawalö gamawaö niha ba lafo.

Me larugi ndröfi afosu ira, oi itörö niŵa'ö niha ba mbanua. Itugu sökhi mbawa Dewi. Lö aetu lahatö'ö ira khönia onomatua. Ba Natalia? Ba nomo toröi ia. Ilau mamözini omo, managu nukha, ma zui mombaso buku.

Samuza ma'ökhö irongo fahuho-huo ndra satuania Natalia.

"Edöna tobali ira'alawe satua saleu ia, si lö möi nihalö."

"Böi ŵaö zimanö. Isöndra sa dania zangai ya'ia Natalia."

"Haniha nonomatua sedöna manofu ya'ia? Ma'ökhö andre, ha ono'alawe si sökhi bawa ni'alui nono matua, ono'alawe si tola mangomusoi'ö tödöra na möi ira ba wöröma."

Me irongo da'ö Natalia, ilau moloi ba mbenua ba ilau mege-ege.

Fao-fao göi Natalia ba zekola wanunö. Ba samuza ma'ökhö so göi Bu Darmawati ba gotalua niha si so ba Gereja. Bu Darmawati andrö no ga'a Pak Lius, direktur stasiun radio.

Aefa Wangowasaini Misa, i'ondrasi Natalia Bu Darmawati imane, "Sökhi sibai limö, nogu. Zaya-zaya gölö na lö ö'oguna'ö ia."

"No u'oguna'ö ia ba –"

"Tenga da'ö niŵa'ögu," itema Bu Darmawati. Ifakhölö ia ba niha sato bakha ba Gereja. "Niŵa'ögu, silötolalö'ö ö'oguna'ö limö tobali sanunö 'profesional'. Ufahuhuosi dania khö Pak Lius, ena'ö tola ibe'e ndra'ugö manunö ba radio. Hadia omasi'ö?"

"Lö – lö u'ila, Bu." Ata'u Natalia wo'angeragö da'ö.

"Na simanö ba fatunö khö ndra satuamö."


"Molo'ö ya'o faudu sibai niŵa'ö Bu Darmawati andrö," ibörögö wanemali inania.

"Simanö göi ndra'o. Fao göi dödögu," inönö amania.

Ha Dewi zambö fao tödö. "Tenga sanunö profesional ndra'ugö," imanö Dewi. "Öbali'ö aila manö ita dania." Bahiza tenga sa da'ö zi so bakha ba dödö Dewi. Si so ba dödönia, ata'u ia na tehöngö dania döi ga'ania. Ya'ia nono'alawe si sökhi bawa, nigohi-gohi ndraono matua ba mbanuara. Ya'ia zinangea tobali tehöngö. Ba imane tödönia, Hadia sa'ae kö Zomböi ya'ita, wa ibe'e li simane da'ö khö Natalia. Hewisa na tobali tehöngö ia dania? Silötolalö'ö la'olifugö dania ndra'o niha.

Ba i'alui lala Dewi ena'ö böi latandraigö Natalia ba stasiun radio.

Bahiza ba luo Migu aefa da'ö so zui Bu Darmawati ba Gereja. Ba iŵa'ö khö Natalia, "No fahuhuo ndra'o khö Pak Lius. Fao dödönia. Edöna itandraigö ndra'ugö. Ae ba stasiun radio bözi tölu tanö'owi ba luo Rabu."

Ba ba luo Rabu irugi stasiun radio Natalia. Gasa-gasa wombaloi direktur, aböböi ia ba agabasö dangania.

"Ya'ahowu." I'owai Natalia Pak Lius. "Ha ube'e khöu ginötö lima menit."

Me i'ila zikhala Natalia tobali ahöli dödö Pak Lius. Hana ifa'ohe'ö khögu ndra'alawe si lö karua andre?

I'o'ö Pak Lius Natalia lumalö ba studio.

"Hadia no irai manunö'ö profesional?"

"Lö'ö, Pak." Irasoi mböböi sokafu sangele mitou barö mbarunia Natalia. Hana wa u'o'ö manö li Bu Darmawati? Tobali so wa'ata'u khö Natalia, omasi ia ilau moloi mena'ö.

Ifezizio Natalia föna mikrofon Pak Lius. "Lö samoli kibord ma'ökhö. Börö da'ö anunö manö ha ya'ugö. A capella. Hadia ö'ila hadia geluaha a capella?"[6]

"U'ila, Pak."

"Lau, sökhi na simanö." Abao dödönia khö ga'ania alawe, Darmawati, me ifa'ohe'ö khönia nono'alawe si lö nga'öla andre.

"Uröi ndra'ugö ba da'a. So ndra'o ba ruang kontrol. Lima menit. Sambua sinunö." Oroma wa lö ibe'e tödönia Natalia Pak Lius.

"He, Pak – Hadia zinunö – ?" Bahiza lö fakhamö irongo wanofunia Pak Lius. No iduhö mbawandruhö sa'ae.

Toröi ha samösa Natalia bakha. No itöngö mikrofon si so fönania. Lö i'ila hadia zinunö sedöna i'anunöisi. Silötolalö'ö uröi stasiun da'a. Ufuli ndra'o ba khöma.

"Börögö. Alio'ö. Lö inötögu." Terongo li Pak Lius ba loudspeaker.

"Bologö dödöu, Pak. Lö –"

"Gofu hadia manö zinunö." Ibörötaigö mofönu ia. "Ubaloi." Ifadölö hulunia ba gurusi.

Ba i'anema'ö irongo manunö Natalia. Ba tokea sibai ia. Lö irai irongo li simane andrö. No ohahau sibai, hulö na ifaigi tou nidanö sohahau sibai irege i'ila narö namö sabakha. No awakhö-wakhö li andrö, hulö li samösa niha si no iröi tuho tödönia, hulö wengu-wengu niha safatö tödö, niha si no mangifi fangifi sata'u ita.

Ibörötaigö alu daŵa hörönia. He So'aya, hana awena iada'a irugi stasiun da'a li andre?

Me itörö studio andrö samösa insinyur, i'anema'ö tebato ia ba wa'ahöli-höli dödö. Ba oi tohare niha bö'ö sohalöŵö ba stasiun radio andrö. Lö hede-hedera, hulö no isafoi ira sinunö andrö.

Me ahori zinunö andrö, lö la'ila muhede niha. "Gofu haniha zanunö andrö, böi mitehegö mofanö manö ia. Silötolalö'ö manunö ia ba radio khöda." Iŵa'ö samösa niha.

I'alio'ö we'amöi wangondrasi Natalia Pak Lius. Ilau moloi mena Natalia.

"Bologö dödöu, Pak. Lö u'ila manunö –"

"Dadao ua Natalia. Ero bongi Sabtu so siaran musik."

"U'ila, Pak. Asese ufondrondrongo da'ö."

"Hadia omasi'ö manunö ba siaran musik?"

Itöngö Pak Lius Natalia, lö aboto ba dödönia hadia niŵa'önia andrö. "Hadia ötema ndra'o, Pak?"

"Tebörögö migu andre. Sökhi ena'ö tola ö'oroma'ö ba niha wa sökhi manunö ndra'ugö."

Edöna labe gazigu. Omuso sibai dödönia, irege lö i'ila hadia zinangea iŵa'ö.


"Lagazi ndra'ugö? Ha'uga?" isofu akhinia Dewi.

"Lö u'ila ha'uga." Lö salania ha'uga. Asala wö'i so niha same'e khögu halöŵö, imanö ba dödönia Natalia. Arakhagö iŵa'ö da'ö khö nakhinia Dewi, bahiza itaha ua.

"Omuso sibai dödöda. Eluahania manunö ndra'ugö ba radio lö?" ibörögö amania.

"Ta'ombakha'ö dania khö ndra talifusöda ba khö ndra si faola omo khöda, ena'ö lafondrondrongo siaran radio ba ginötö manunö ndra'ugö," inönö inania.

Ba ifakhölö ia khö nakhinia Dewi. Ibaloi ena'ö imane khönia, Lö moguna talau da'ö, na. Sindruhu sökhi wö li Natalia. Bahiza lö hede-hede Dewi. Imane sa tödönia Dewi, Edöna tobali fa'aila lua-lua da'a dania.

Salatö lö itörö nitötöna Dewi andrö.


Ba bongi Sabtu andrö ihawui Natalia fa'ata'u.

"Böi mangiwa dödöu," iŵa'ö khönia Pak Lius. "Oi alua göi zimane khö ndra artis tanöbö'ö. Tobali tehöngö ndra'ugö dania."

"Tobali fangaila khögu!"

"No irugi inötö. Ba zi dua menit!"

Ba zi tanö'owi mege so latihan faoma orkestra. Ba owua-wua dödö Pak Lius. Fefu niha si fao ba latihan, oi ahöli dödöra wamondrondrongo fanunönia. Faduhu dödöra wa no tohare samösa bintang sibohou. Samösa artis si tehöngö turia dania.

"Alimagö me lö sökhi mbawania," imanö manager panggung. "Bahiza lö salania. Lö sa'atö la'ila mbawania niha samondrondrongo radio. Ha larongo li zanunö."

Ba zi bongi andrö manunö Natalia ba radio. Wa'asökhi zinunönia. Ba i'ila göi Natalia wa lö irai manunö ia simane fa'asökhi wanunönia ba zi bongi andrö. Manofu-nofu dödönia, hewisa lua-lua da'a dania. Hadia tobali tehöngö ia dania? Hadia oi falali so dania ndramatua sedöna mamohu ya'ia, simane nilaura khö nakhinia Dewi?

Hulö na i'ila hadia ni'angeragönia andrö Dewi, imane khö ga'ania, "Omuso dödögu me no tola manunö'ö ba stasiun radio, ga'a. Bahiza böi wö omuso sibai dödöu. Lö ara tö ba labatogö ndra'ugö."

Lö sa tebatogö da'a. Edöna tetohugö, iwa'ö ba dödönia Natalia. U'andrö ua saohagölö me no tobali niha ndra'o.


Ba zihulöwongi luo Sinaya so telefon moroi ba zaröu silalö khö Natalia. "Te niha sedöna mangomai'ö ya'ita ia andrö," imanö amania ba ibe'e telefon khö Natalia. "Iŵa'ö Suwarno ia, direktur stasiun radio ibu kota." Stasiun radio fondrege tehöngö ba ibu kota.

Ihalö telefon andrö Natalia, mangiwa sibai dödönia, "Halo?"

"Natalia?"

"Ya'ia."

"Natalia Laia?"

"Ya'ia, Pak."

"Suwarno ndra'o moroi ba stasiun radio ibu kota. No urongo me manunö ndra'ugö me bongi Sabtu. Ya'ugö zanunö si no u'alu-alui götö da'a."

"Lö – Lö aboto ba dödögu, Pak."

"Abölö sökhi na manunö'ö ba siaran musik ba ibu kota. Irugi ma'ökhö u'alu-alui samösa zanunö si sökhi li wanunö ba lö nisöndragu. Sökhi sibai wanunöu. Haniha agen khöu?"

"Agen? Lö – Lö khögu agen wö, Pak."

"Na simanö möi ndra'o samösa ufalukhaisi ndra'ugö ba ta'osara'ö hadia ia fefu."

"Pak Suwarno – lö – lö wö sökhi mbawagu." Hulö nifahö falölöŵa dödönia me iŵa'ö da'ö. Bahiza imane tödönia, abölö sökhi uŵa'ö ia iada'a moroi na afatö dödögu ba zi so föna. Ena'ö böi möi ia ba da'a na andrö ni'aluinia.

Ilau ma'igi Pak Suwarno. "Böi busi dödöu. Edöna sökhi mbawau ba ginötö ölau manunö. Ba da'a ato zonekhe wamasa mekap."

"Bahiza –"

"Falukha ita mahemolu."

Töra moroi ba wangifi fefu da'a khö Natalia. Edöna manunö ndra'o ba stasiun radio ibu kota!

"Da ya'o zama'anö ba sotandratangani kontrak, Natalia." iŵa'ö amania. "Silötolalö'ö mangenanö ita ba zimane andre."

"U'öli dania khöu mbaru sibohou. Ba urino göda khö Pak Suwarno."

Lö hede-hede Dewi. Tebai itaha tödönia zalua andre fefu. Fatuwu khönia wa ka'ania zedöna tehöngö. Da'ufaigi lala...

No ihaogö ia Dewi fatua lö tohare Pak Suwarno. Ba me irongo tohare ia, i'aliogö wamaondragö Pak Suwarno ba mbawandruhö. Me i'ila ia, manaoka dödö Pak Suwarno. Ono'alawe si sökhi bawa, ba si sökhi baru, ba si sökhi fa'igi. He Lowa, iŵa'ö tödönia, Sökhi li wanunö ba sökhi göi mbawa. Edöna tobali ia "bintang" si tehöngö.

"Omuso dödögu no falukha ita," iŵa'ö Pak Suwarno.

"Omuso dödögu me no örugi khöma, Pak. No asese urongo döi Bapak. Oi la'ila niha ba da'a."

"Lau. Na simanö da tabörögö wamahuhuosi halöŵöda. So ba da'a sambua teks zinunö. Sinunö sanandrösa ba wa'omasi –"

Tohare Natalia baulu. Barunia baru sibohou, bahiza lö faudu khönia mbaru andrö.

"Bologö dödöu, Pak. Lö u'ila wa no örugi."

Ifaigi Dewi Pak Suwarno.

"Ka'agu ira'alawe da'a, Pak," iwa'ö Dewi. "Natalia."

Ba i'anema'ö la'ila ba mbawa Pak Suwarno wa hulö zafatö tödö ia.

"Hadia ya'ugö zanunö?"

"Ya'ia."

Ba ifaigi Dewi, "Ba ya'ugö –"

Ihekhe mbo'ö Dewi, "Akhi Natalia."

Ifaigi zui Natalia Pak Suwarno ba ihasugö ia imane, "Bologö dödöu, Natalia. Awuyu-wuyu sibai ndra'ugö nasa – töra awuyu ndra'ugö wanunö ba ibu kota. Bologö dödöu. Toröi ami, he."

Ba la'ila iröi ira.

Saohagölö, Lowa, iŵa'ö tödönia Dewi. Omuso sibai dödönia. Itörö zi no ifakhoi tödögu.

Afatö sibai dödö Natalia. Börö da'ö iböhöli göi manunö ba stasiun radio ba mbanuara. Ha'uga kali möi khönia Pak Lius, ba lö alulu dödönia. Sindruhu afatö sibai dödönia.

Gofu haniha zi no mamaigi akhigu, imane tödönia, silötolalö'ö omasi ira ia. Si lö sökhi bawa ndra'o.

Salagu samösa wa no manötöna ndra'o, iŵa'ö ba dödönia. Andrö ibözi ndra'o So'aya.

Aefa da'ö ha omasi manunö ba Gereja Natalia ba itugu ara itugu ibini'ö ia moroi ba niha.

Fulu fakhe aefa da'ö no tobali ira'alawe ira. No ha'uga sa'ae zi no mamohu Melina, bahiza lö samösa nitehenia. No möi khönia nono zalaŵa, ono doto, ono zohalöŵö ba bank, ono zogale. So zawena mangawalisi sekola salaŵa, so niha so'okhöta, so zawuyu-wuyu ba so göi zabölö atua. Ba lö samösa somasi Melina.

"Haniha nasa ni'alu-aluimö?" isofu khönia amania.

"Lö samösa zadöni tödögu. Te andrö so ia ni'alu-aluigu ba ibu kota."

Ba itehegö khönia amania möi ia manörö ba ibu kota mato döfi wa'ara.

Gasa-gasa we'aso Melina ba ibu kota, toröi Natalia ba nomo. Ero möi ia ba Gereja, ilau mangandrö ena'ö isöndra ndramatua somasi ia ba ibu kota akhinia Dewi.

Ba samuza ma'ökhö ifondrondrongo wangandrönia So'aya. Bahiza tenga ena'ö isöndra nihania akhinia, bahiza ena'ö isöndra nihania samösa.

Me luo Migu andrö möi ba Misa ba Gereja Bazatulö, heza manunö Natalia. Ba me irongo linia wanunö, imane tödönia Baza, da'a zedöna tobali sinofugu. Silötolalö'ö ufalukhaisi ia iada'a.

Me falukha ira iŵa'ö, "Hulö li mala'ika."

"Ha – Hadia, Bang?" Hulö mulimba dödönia bakha.

"Sindruhu sökhi wanunömö. Sindruhu adöni dödöda wamondrongo."

Ifaöga ia Natalia ba i'anema'ö mangulu mbalöduhinia. No akaeŵa-kaeŵa ia, baga-baga na ma'igi, ba hulö omasi sibai Natalia wamatörö tuturunia bewenia andrö na fahuhuo ia. "Sa – Saohagölö." Lö i'ila hadia zinangea iŵa'ö.

"Lö – Lö irai u'ila ndra'ugö ba da'a, Bang. Heza moroi khöda khömi?"

"Moroi siyefo khöma. Si möi manörö khö namagu sakhi ba da'a."

Ba itugu ara itugu larasoi wa faoma omasi ira nawöra. Ba lö la'ila labatogö wahuo-huosa. Lalau ma'igi, lalau manutunö zi no latörö ba wa'aurira. I'otarai da'ö lö aetu i'angeragö Baza Natalia ba simanö göi Baza, lö aetu itörö tödönia Natalia.

Samuza ma'ökhö möi ira manörö-nörö ba fasa. "Hadia no so zinofumö?" isofu Natalia. Ba ihawui ia fa'atau'u, me ha omasi iŵa'ö ia ba dödönia, bahiza no alua ia yaŵa ba mbewenia. Ata'u ia na tobali afatö zui dödönia.

"Lö nasa nisöndragu," itema linia Baza.

Edöna ösöndra nono alawe fondrege sökhi bawa, iŵa'ö tödönia Natalia. Na mangawuli Dewi moroi ba ibukota. No i'ila Natalia wa so dödönia khö Baza, bahiza lö omasi ia afatö zui dödönia dania. No siga-siga ia. Faudu ba zingania Dewi, ifulö-fulö dangania Natalia. Tobali ia dania la'ogu, tenga fo'omogu.

"Salöfo usöndra ia ba mbanua andre," no iboho mbawa ba ifamötö hörönia khö Natalia.

I'osilömurongo wehede Baza andrö Natalia. "Lö ara tö mangawuli nakhigu Dewi moroi ba ibukota. Hadia omasi'ö falukha khönia?" isofu khö Baza Natalia.

"Hana wa lö'ö, ba nakhi," ihekhe mbo'önia Baza. Edöna ira'u danga Natalia, bahiza i'anema'ö idönia dangania Natalia.


Lö ara aefa da'ö mangawuli göi Dewi moroi ba ibukota.

"Hadia no ösöndra samösa zi tobali umönögu," isofu khö Dewi amania.

"Lö nisöndragu. Ato sa ira zi tola mena'ö, bahiza lö si tola mangomusoi'ö tödögu," itema linia Dewi.

No ifakhoi Sokhö wa lö isöndra ia ba Jakarta. So ia ba da'a. Baza, imanö ba dödönia Natalia. "Aine fao khogu. So nono matua somasi falukha khöu," iŵa'ö khö Dewi. Ba möi ira lafalukhaisi Baza.

Ba me larugi khö Baza, ihasugö ia Natalia. "He Bang, da'a nakhigu Dewi."

"Ya'ahowu," iŵa'ö Dewi khö Baza. Ba irasoi mulimba bakha dödönia. Hana mulimba dödögu? No ha'uga nono matua si hino döla si no falukha khönia, ba lö irai alua wa mulimba bakha dödönia. I'otarai da'ö lö aetu i'alui lala wamalukhaisi Baza ba zi lö ka'ania Natalia.

Migu aefa da'ö falukha ira Baza ba Natalia. "He nakhi, edöna mofanödo ba khöma. Bahiza mangawulido zui dania ba wanofu ya'ugö khö ndra satuamö."

Tokea Natalia. Hadia lö omasi ia khö Dewi? Lö i'ila hadia wanemali khö Baza. Ba na sindruhu ya'o nifilinia, te sindruhu nifatenge Zo'aya ia andrö. Te no ifondrondrogo wa'anumana dödögu?

"Lö – Lö aboto ba dödögu, Bang." Arakhagö lö böla linia me no fasösö sibai dötö'ania.

"Omasido khöu, nakhi. Omasi ndra'o na tobali ndra'ugö awögu ba wa'auri." Ira'u dangania Baza.

Ba sakali da'a lö fakhamö idöni dangania Natalia. Lö i'ila hadia niŵa'önia. Ha itöngö manö hörö Baza, ba irasoi hulö zanösö botonia moroi yaŵa irugi mitou. Lalau manö fabali, lö hede-hedenia. Hulö zangifi ia. Saohagölö So'aya. No öfondrondrongo we'ao dödögu.

Tanö'owi da'ö mangawuli Baza ba khöra. Iröi furi Natalia, safönu fa'omusodödö, sodöna-döna zalua ba zi so föna. Ba tebai itaha wombaloi irege mangawuli zui Baza, simane niŵa'önia ba wanofu ya'ia.


Mato ha'uga hari aefa da'ö irongo fahuhuo Dewi khö namania. Edöna mofanö Dewi möi misefo. Hadia möi ia zui ba ibukota wangalui niha? manofu-nofu dödö Natalia. Ba alua, ilau mofanö Dewi ba danö sefo.


Lö ara aefa da'ö, me ibalo-baloi manö duria moroi khö Baza Natalia, terongo duria moroi siyefo, wa no lalu moloi ira Baza ba Dewi. Me irongo da'ö Natalia, mu'otu sindruhu-ndruhu dödönia. He Sokhö. Hana zui öfakao ndra'o? Ba afatö sibai dödönia irege taya khönia gulidanö iŵa'ö.


Lafatörö bakha nidanö infus ba mboto faoma falölöŵa

Me ibokai hörönia, ahöli dödö Natalia, me lö i'ila heza so ia. I'ila so infus[7] nitawi ba zinga mbate'e si so ya'ia. "Heeeei... heza so ndra'odo andre?"

Ihatö'ö ia samösa ira'alawe so baru safusi. "Ba nomo zofökhö. No mesokho dangau kambera. Oya sibai aduwa ndromö. Ta'andrö saohagölö, me auri ndra'ugö nasa."

Ibörötaigö i'ila mangera-ngera Natalia ba itörö tödönia, wa ba wa'afatö dödönia no ifahö dangania kambera faoma ononekhe satarö.

Me no döhö Natalia, mangawuli ia ba nomo. Ba lö sa'ae hede-hedenia. Abölö sökhi na no mate ndra'o mena'ö, iŵa'ö tödönia.

No wö arörö dödö Zomböi ya'ita me iwöwöi Natalia andrö.

Edöna tobali ira'alawe satua saleu ia, si lö möi nihalö.

Böi ŵaö zimanö. Isöndra sa dania zangai ya'ia Natalia.

Tebai sa'ae itaha wamakao andre Natalia. Lö omasi ia manga. Itugu ara itugu afuo göi ia.


Ira suster Kapusines sangandrö me'önö ma'ökhö

Samuza luo möi ia baero, ilau manörö. Ba ba zi lö i'ila sibai no irugi mbawandruhö Gereja, heza to'ölö manunö ia bakha ba zekola wanunö.

"Ya'ahowu, Natalia," irongo li Pastor sihede khönia.

"Ya'ahowu, Pastor."

"Meföna lö aetu möi'ö ba Gereja ba fao ndra'ugö wanunö ba zekola wanunö," no ihaogö wanguma'ö Pastor.

"Lö moguna sa'ae khögu Gereja. No iröi ndra'o So'aya." ifaigi lahe zokho ba mbö'ötönia Natalia.

"Ba dödögu lö niröi So'aya ndra'ugö. Sofu manö khönia. Itema dania liu." No i'ide-ide'ö sibai linia Pastor, arakhagö lö irongo Natalia. I'anema'ö iröi Gereja Natalia, ilau moloi.

Mahemolunia mangawuli zui ia ba Gereja andrö. Irasoi Natalia wa so khönia wa'aila. Tenga So'aya zondröi ya'ia, bahiza ya'ia zi lö mamondrondrongo li sihede ba dödönia.

Ifakifu hörönia, "Bologö dödöu So'aya. No horö khögu da'ö. Tolo ndra'o, So'aya." Me ifaöga hörönia i'ila Pastor si so ba zingania.

"Lö u'ila hadia zinangea ulau ba wa'aurigu," no ide-ide linia arakhagö lö irongo Pastor.

"Hewisa na möi ita khö ndra suster ba Bukit Suci ba talau fahuhuo khö Abdis Yuliana ba da'ö?" Lö i'ila hana Natalia, bahiza fatema dödönia niŵa'ö Pastor andrö.


Ba mbaŵa si'önö ndröfi andrö iröi nomo ndra amania Natalia ba isaŵa biara ndra suster Bukit Suci. Iröi gulidanö si no mame'e khönia ngawalö wa'abudödö. Möi ia itou'ö wa'aurinia ba wangandrö ba ba wanunö khö Zo'aya, bongi ma'ökhö. Lalau mangandrö me'önö ma'ökhö simane si to'ölö bakha ba Gereja i'otarai meföna.[8] Ba ero ilau manunö irasoi zui wa'ohahau dödö si no irasoi na fao-fao ia ba zekola wanunö.


Famotokhi ba gahe

edit
  1. Inspirasi nihalö moroi ba novel The Sands of Time nisura Sidney Sheldon.
  2. Lafotöi Fangowasaini Misa halöŵö fangandrö ba fanunö heza latörötödö wemanga safuria khö Yesu, me ibali'ö boto ba donia roti awö nagu. Lafotöi göi gowasa da'a ba Gereja Katolik Ekaristi ba ba Gereja Protestan "Femanga Gö Ni'amoni'ö".
  3. Lafotöi biara nomo ndra niha si fao ba wa'awösa fa'alowalangi, heza laröi gokhöta gulidanö, lö mangowalu ira ba ha la'o'ö wamatörö Zo'aya bakha ba wa'aurira. Ba Danö Niha so oya biara simane, he biara ndra pastor, bruder, frater ba he göi biara ndra suster. Ba Telukdalam so biara ndra suster ba pastor ba Bintang Laut, ba Gunungsitoli so ba Laverna, yaŵa pelabuhan, btn.
  4. Lafotöi klinik sambua nahia si hulö gödo zofökhö, bahiza ide-ide ia. Sito'ölönia ha lafalua sambalö halöŵö ba sambua klinik, duma-dumania ha ifalua wamareso hörö klinik mata, famareso wökhö guli klinik kulit, btn.
  5. Fangandrö lala röfa no sambua tradisi satua sibai bakha ba Gereja. To'ölö lafalua ia nasa niha bakha ba Gereja Katolik. Bakha ba wangandrö lala röfa, latörö'ö niha zi-14 nahia ibatogö ia Yesu, i'otarai me te'etu'ö hukunia föna Fondrio Filato, irugi me lako'o ia ba Golgata.
  6. Lafotöi a capella zinunö si lö la'o'awöni faoma fakake simane gitar, kibord, ma fakake tanö bö'ö. Ha li niha zanunö.
  7. Lafotöi infus idanö ni'asoini nifahele bakha ba mboto niha faoma falölöŵa suti. Moguna da'a ena'ö böi oköli mboto niha ba ginötö mofökhö abölö-bölö ira, börö me lö nasa la'ila manga.
  8. To'ölö mangandrö ba manunö ndra niha Keriso meföna me'önö ma'ökhö (fakhili ba wangandrö si lima kali ma'ökhö ba gotalua ndra talifusöda niha Islam). Ba irugi ma'ökhö latohugö tradisi andre bakha ba biara-biara ndra fa'awösa fa'alowalangi si so ba Gereja Katolik, Gereja Ortodoks, Gereja Anglikan, ba so ösa ba Gereja Lutheran. To'ölö lafotöi ia ofisi. So biara samalua fefu me'önö, bahiza abölö ato zamalua ha öfa kali. Fangandrö ba fanunö si'önö andre: Laudes (fangandrö sihulö wongi ba zi bözi önö), Terce (fangandrö ba zi bözi siŵa), Sext (fangandrö ba dalulaluo), None (fangandrö ba zi bözi tölu tanö'owi), Versper (fangandrö ba zi bözi önö tanö'owi), Matins (li Indonesia: ibadat bacaan) ba Compline (fangandrö fatua lö mörö). Fangandrö si me'önö andre lafalua ira suster si so ba Biara Santa Klara, Gunung Suci, Gunungsitoli. Fangandrö si öfa kali lafalua ba biara-biara tanö bö'ö, he biara ndra suster, simane ndra suster OSF si so ba Laverna, Gunungsitoli, ba he ba biara ndra pastor simane si so Bintang Laut, Telukdalam.

Fabaliŵa lala

edit

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö