Wb/nia/Mama'anö Taromali Ero Luo Migu/Döfi C/Migu si-26

Famasao

Fatua lö mangandrö ba zi bongi, halö ginötö mato 10-15 menit ba wamondrondrongo Taromali. Andrö khö nösi nomo ena'ö lahalö ua wa'ahono, ena'ö böi moloi-loi dödöra.

Börötaigö faoma fangandrö sadogo-dogo ba wangandrö haga Geheha Ni'amoni'ö.

Aefa da'ö andrö khöra fefu ena'ö lahasugö ira mato sambua menit ba latöröi tödöra gofu hadia zi no latörö ba zi ma'ökhö andre bakha ba wa'omasi Zo'aya. Awena andrö samösa nösi nomo wombaso Taromali andre tou nihalö moroi ba Injil migu fönada.

Mombaso Taromali

Imane Yohane khö Yesu, "He Pak, ma'ila samösa niha samoloi angi si lö sökhi ba döiu. Börö me tenga awöda ia no maŵa'ö khönia ena'ö böi ilau zimanö." Ba hiza itema linia Yesu, "Böi miba'agö ia. Tebai ifalua zahöli tödö samösa niha na i'obousi göi döigu. Ero niha si lö molaŵa ya'ita no si fahuwu khöda ia. Na so niha same ömi idanö börö me ya'ami andrö no fao awö Keriso, uŵa'ö khömi, si lötolalö'ö latema zulö." (Mareko 9:38-43, 45, 47-48)

Mangerönusi

Be ginötö khö ero zamösa nösi nomomö ba wanguŵa'ö hadia wehede si tokana ba dödöra moroi ba Daromali andrö.

Hana wa tokhai ba dödöra ia? Hadia itörö dödöra sambua zi no latörö ba zi lalö?

Sofu khöra heza la'ila alua so niha solau amuata si sökhi ba niha bö'ö?

Hadia no ilau da'ö khö Keriso samösa simane niŵa'ö-Nia ba Daromali andrö yaŵa?

Mamatöfa

Iŵa'ö amada Paus Fransiskus, "Databokai dödöda khö Lowalangi ena'ö ifo'ösi faoma si sökhi moroi khö-Nia."

Oroma wa ta'omasi'ö Lowalangi, wa talulu khö-Nia wa'aurida, na tabe'egö tödö wamalua si sökhi, na tafoloi nangi si lö sökhi moroi ba gotaluada, he ba nomoda, ba stasida ba he göi ba mbanuada. Ena'ö itugu omuso dödö nawöda ba tola larasoi göi wa'omasi Zo'aya ba wa'aurira.

Faigi-faigi ba migu andre, ba eregesi tödö wame'e ena'ö lasöndra wa'omuso dödö ya'ira niha si falukha khöda. Ondrasi niha sabu tödö migu andre ba o'awögö ia ena'ö ihagaini dödönia So'aya.

Tohugö faoma fangandrö ba zi bongi.

Fangandrö

Duhö ginötö ni'amoni'ö andre faoma fangandrö sadogo-dogo. "He Yesu So'aya, no tobali ndra'ugö enoni zato me andrö gohitö dödö-Mö ba wamalua böwö si sökhi ba niha. Tolo ndra'o ba wolo'ö duma-duma andre, ena'ö omoma, banuama, stasima itugu ara itugu afönu lakhömiu. Amen."

Ma zui fangandrö ba zi bongi na mifalua ia ba zi bongi.

Nitöngöni

Lala wangerönusi andre no tehalö moroi ba wednesdayword.org nifa'anö namada P. Henry Wansbrough OSB ni'oguna'ö ba fefu zekola Katolik ba ba paroki ba Konferensi Wali Gereja Inggris ba Wales. P. Henry no samösa zama'anö sura ni'amoni'ö ba li Inggris sotöi New Jerusalem Bible faoma Revised New Jerusalem Bible ba te'oguna'ö ba Gereja-Gereja ba Inggris. Heŵa'ae simanö ha dane-dane zinura andre ia. No sa mufa'anö nisura ba da'e ena'ö faudu ba li khöda ba ba zi to'ölö khöda ba Danö Niha.

Taromali andre yaŵa no musura molo'ö lala wehededa ba li Niha ma'ökhö, ena'ö aoha ia khöda tobali börö wangerönusi, simane göi nifalua P. Henry ba wednesdayword.org ba li Inggris. Börö da'ö tola manö wa fabö'ö ngawua wehede ni'oguna'ö ba hiza lö sa fabö'ö geluahania. Nisura mangawuli ba li khöda moroi khö Sirus Laia, London, Inggris.

Navigasi: Olayama Wikibuku | Mama'anö Taromali Ero Luo Migu