Wb/nia/Mama'anö Taromali Ero Luo Migu/Döfi C/Migu si-25

Famasao

Fatua lö mangandrö ba zi bongi, halö ginötö mato 10-15 menit ba wamondrondrongo Taromali. Andrö khö nösi nomo ena'ö lahalö ua wa'ahono, ena'ö böi moloi-loi dödöra.

Börötaigö faoma fangandrö sadogo-dogo ba wangandrö haga Geheha Ni'amoni'ö.

Aefa da'ö andrö khöra fefu ena'ö lahasugö ira mato sambua menit ba latöröi tödöra gofu hadia zi no latörö ba zi ma'ökhö andre bakha ba wa'omasi Zo'aya. Awena andrö samösa nösi nomo wombaso Taromali andre tou nihalö moroi ba Injil migu fönada.

Mombaso Taromali

Aefa laröi hili, lumalö Yesu ba ira nifahaö-Nia ba Galilea. Ba lö omasi ia na la'ila ira niha, börö me i'ombakha'ö khö ndra nifahaö hadia zedöna alua khönia. Iŵaö khöra, "Edöna tetou'ö Nono Niha andrö ba danga niha; labunu ia; ba tölu ngaluo aefa da'ö maoso ia." Ba hiza lö aboto ba dödö ndra nifahaö niŵaö-Nia andrö ba ata'u ira göi wanofu khö-Nia.

Aefa da'ö isofu khöra Yesu, "Hadia nifadönimi ba lala mege?" Ba lö hede-hedera börö no lafadöni haniha maö zabölö ebua moroi ba gotaluara. Börö da'ö dumadao Yesu tou ba danö, ikaoni ndra nifahaö si felendrua, imane khöra, "Na so zomasi tobali ni'ofönai'ö, si lötolalö'ö ibali'ö ia ua enoni zato." (Mareko 9:30-35)

Mangerönusi

Sofu khöra ya'ira si fao ba gerönua andre: Hadia niŵa'ö Yesu khö ndra nifaha'önia sanandrösa ba gohitö dödöra tobali ni'ofönai'ö ma ni'osatuagö? Hadia wehede si fatöfa ba dödöu moroi ba Daromali andre?

Be ginötö ena'ö ero ösi nomomö so ginötö ba wangotura'ö ösi dödöra, hadia wehede si fakhai ba dödöra, hadia nitörö tödöra moroi ba lala nitöröra me no larongo Daromali andrö.

Mamatöfa

Sabölö moguna molo'ö So'aya, ya'ia da'ö na tafaoma tarorogö nawöda, ta'omasi'ö ira ba talau mböwö si sökhi khöra. Andrö oroma wa'ebua ma wa'asatua ero niha ba wamalua böwö si sökhi khö niha bö'ö.

Sofu khö nono khöu, hadia geluaha mamalua böwö si sökhi molo'ö ya'ira. Heza oroma mböwö si sökhi? Hadia duma-dumania?

Ba hadia göi geluaha sato ma awö ba Daromali no mege? Hadia zalua na ero niha ba mbanua mamalua böwö si sökhi khö nawöra niha ba mbanua? Hamega afuriata öfalua mböwö si sökhi ba nomo ma zui ba mbanua?

Ta'oroma'ö wamatida khö Zo'aya ba ngawalö fefu nifaluada ero ma'ökhö. Angeragö sabata, hadia zinangea öfalua migu fönada andre, he ba nomo ba he ba mbanua, ba wangoroma'ö famati andrö no mege? Hadia zinangea öfalua ena'ö Taromali nirongoda ba luo migu andre tobali mowua ba wa'aurimö migu fönada andre?

Fangandrö

Duhö ginötö ni'amoni'ö andre faoma fangandrö sadogo-dogo. "He Yesu So'aya, no tobali ndra'ugö enoni zato me andrö gohitö dödö-Mö ba wamalua böwö si sökhi ba niha. Tolo ndra'o ba wolo'ö duma-duma andre, ena'ö omoma, banuama, stasima itugu ara itugu afönu lakhömiu. Amen."

Ma zui fangandrö ba zi bongi na mifalua ia ba zi bongi.

Nitöngöni

Lala wangerönusi andre no tehalö moroi ba wednesdayword.org nifa'anö namada P. Henry Wansbrough OSB ni'oguna'ö ba fefu zekola Katolik ba ba paroki ba Konferensi Wali Gereja Inggris ba Wales. P. Henry no samösa zama'anö sura ni'amoni'ö ba li Inggris sotöi New Jerusalem Bible faoma Revised New Jerusalem Bible ba te'oguna'ö ba Gereja-Gereja ba Inggris. Heŵa'ae simanö ha dane-dane zinura andre ia. No sa mufa'anö nisura ba da'e ena'ö faudu ba li khöda ba ba zi to'ölö khöda ba Danö Niha.

Taromali andre yaŵa no musura molo'ö lala wehededa ba li Niha ma'ökhö, ena'ö aoha ia khöda tobali börö wangerönusi, simane göi nifalua P. Henry ba wednesdayword.org ba li Inggris. Börö da'ö tola manö wa fabö'ö ngawua wehede ni'oguna'ö ba hiza lö sa fabö'ö geluahania. Nisura mangawuli ba li khöda moroi khö Sirus Laia, London, Inggris.

Navigasi: Olayama Wikibuku | Mama'anö Taromali Ero Luo Migu