Wb/nia/Laowömaru

So samösa niha si tehöngö sibai me föna, molo'ö nidunö-dunö ndra satua, ya'ia zotöi Laowömaru, börö me abölö ba mo'öba ia soroi dalu ninania. Töi namania Lahari Sofusö Kara ba töi ninania Iwowatonasi. Mangowalu Laowömaru andre khö zotöi Sihoi, ba mo'ono ira, onomatua.

Ba dögi gara ba Mbalöwodo toröi ia, ahatö ba mbewe nasi. So khönia manu silatao simiwo na so nudu sangondrasi tögi gara andrö. Ba no nasa i'ölini hao-mbitaba zi fasui nahia andrö.

Mate nononia

Samuza ma'ökhö  me no ebua khöra nonomatua andrö, ba omasi Laowömaru na ifo'öba. Ifasisi ba mbawa nononia andrö ni'ogasö.

Me ifalua da'ö, hiza göi zifatiu-tödö khönia, la'alui lala wama'ala. Ba wamo'öba andre, imane khö nononia, "Böi manö fakhölö ndra'ugö, fa böi aetu mbagiu!".

Itema lasölaisi niha sato no mege, lamane we'ao, "Hiza ngawawa gi'a!" He irongo da'ö ba lö maliŵa nono andrö, ida'i-da'i manö.

Me arakhagö ahori ibadu, tema lamane zui khönia, "Hiza nowo soloyo!" Ha irongo da'ö, i'anema'ö ifakhölö ia wamaigi. Hiza khöu i'anema'ö göi aetu mbaginia, mate.

Famalua si lö sökhi

No i'iagö dögi gara barö hili sahatö sibai ba mbewe nasi. Idaro-darogö na so mbazo ba nasi. I'ondrasi da'ö, ilau fatele-tele khöra, i'alani ira, ihalö khönia gokhötara.

Simanö göi na so nowo soloyo ba nasi, owo zaniaga. I'olangisi nasi i'oroi mbini-mbininia wogamö owo andrö. Lalau fatele wolaŵa ya'ia, ba ha sambalö simöna ia. Irabu gama-gama zaniaga andrö, ibunu zaniaga, ba na mangalulu ira khönia, ifofanö ira, lö ibunu.

Me no oya gokhöta orabutania, mangelama ia ma so zanagö sangendröna morabu okhötania. Borö da'ö itatanö hao-mbitaha fasui nahania andrö. Ata'u niha we'amöi ba naha andrö börö ndroi hao-mbitaha.

Mamata'ikhö dödö niha soloyo khönia, faharu-harumani ira. Simanö göi niha si so fasuinia. Oi zara la'alui lala wamunu ya'ia. No irai lafazawili gefe firö föna nahania.

Me möi i'ozaragö, ba latunu ngafu hao andrö, lara'u ia, laböbözi, lafahö ia, ba lö to'ila khönia, lö abao nösinia, lö i'a ia balatu, laböbö ia lafanawua kara, latibo'ö ba nasi.

Ifangewe-ngewe gara tambuania, aetu zinali, fakabi gara andrö, ba ahöndrö gara andrö ba dalu nasi sabakha.

Me molangi-langi ia ba nasi, so haria, ulö sesolo, idou ia mena'ö, alio ia, ira'u haria andrö, ibunu. Anönö gulinasi do haria andrö, royoitö gulinasi. Do haria andrö mbörö wa modulu nasi irugi ma'ökhö.

Me no mangawuli ia, lafuli lahuwu ia niha sifasui ia. Omasi ira faguru khönia ena'ö lasöndra wa'abölö. Me no ifahaö ira ba wa'abölö andrö, la'andrö khönia, ena'ö ifa'ila'ö khöra wa'abölö si no ifahaö andrö.

Imane khöra "Da tadöni hili da'a, ena'ö fatöfa Danö Niha andre ba danö sebua si so yefo nasi. So i gamonita, tebai tafuli furi laheda. Dalima ira te'oli, la'olembai mbalö-balö gara solemba ba hili andrö, la'erogö hili ba mowaö-waö manö ira, latöngö manö föna.

So i samösa zanufa tödö. Imane ba dödönia, "Hemawisa mangawuli dania na no aröuga ba dalu nasi, no atagega wondröni tanö andre, da utandraigö uwuwu furi lahegu."

Ha ilau sibai da'ö, ahono danö no mege, awai nisao, tebai sa'ae todege ira föna. Lö alua fatöfa ira Danö Niha hulo siyefo nasi. No atö mangoro-ngoro mbalö danö nidönira andrö, iada'a si so ba Laowömaru, Ture Lambaru.

Abu dödönia, i'ila wa so zafökhö tödö awönia. Ba wa'abu dödö andrö irara dödönia fo'omonia. Me no terara dödönia, isofu khönia fo'omonia hadia mbörö wa'abölonia andrö.

Famakao wo'omonia

Lö i'ombakha'ö mena'ö, ba iforege fo'omonia, irege imane khönia, "Te lö afönu wa'omasiu ndra'o wa mangelama'ö khögu". Ba börö wa'omasinia wo'omonia, i'ombakha'ö khönia imane, "So siŵa rozi mbu kaŵe ba högögu, na aheta da'ö ba taya wa'abölögu." Awena ahono sibai ba dödö wo'omonia.

Samuza ma'ökhö me no möi Laowömaru milo, möi molokhoi baero wo'omonia. Ohahau sibai dödönia wangila simoluo mbanua, yomo-yomo manö so so ia barö zi lalö.

No iwai la'ila ia niha. La'ondrasi ia, lafakao, lafeta'u. Lamane khönia, "Na omasi'ö auri ba ombakha'ö khöma hadia danömö wa'abölö wo'omomö andrö," Börö wa'omasinia wo'omonia lö i'ombakha'ö, mangandrö-ngandrö dödönia, ena'ö na iwalö ma i'anema'ö alio so Laowömaru, ba hiza'i lö i'ila so.

Me tebai itaögö wa'afökhö wamakaora ya'ia, i'ombakha'ö manö mbini'öta andrö, heŵa'ae afökhö. I'ombakha'ö mbu kaŵe andrö si so ba högö Laowömaru. Mamagölö ndra niha no mege, ba faoma mamakhölö ira, faduhu dödöra wawakhaöta ma dunöŵa nifaehagö womonia no mege. Laröi ia, lalau mofanö.

Famunu ya'ia

Me mangawuli milo Laowömaru, abu sibai dödönia, me lö ahulu ia, erege dödönia. Gasa-gasa wombaloi gönia idanö aukhu moroi khö wo'omonia, alau-hörönia, mörö sibai ia.

Ba nawu nasa so wo'omonia, no iwai tohare ndra niha no mege. Lö lafambadu-mbadu. La'ololohe'ö mbunia, ba latöwö faoma fanöwö satarö sibai. Taya sa'ae wa'abölö, moloi wa'abatua Laowömaru. Labunu ia.

Wa'atokea dödö wo'omo Laowömaru, me so ia moroi si bakha wolohe gö wo'omonia idanö. Fa'alai ia, atoru tou naha nidanö, aefa manö moroi ba dangania, osauta gulidanö ma hulö mosimbo ba oya zau khomia, atata dölania, ba alau manö ia tou, lö liŵa-liŵa sa'ae, no alele ia.

Asao Laowömaru, borö me tebai irorogö mbiniŵö andrö fo'omonia. Ba börö wa'afökhö khönia wa'asao zabölönia, Laowömaru, ba aetu göi noso Zihoi.

Ba wa'amate zi darua andre, mate göi ŵa'ara ba danö ba atöfi ma adudu lehera ba mbanua, lö nga'ötöra. Ha tö turiara nidunö-dunö, tobali famahaö ba tohöfa ba danö. Lahe waö-waö wa'aurira andrö ta'ila na möi ita ba Dögi Laowömaru site'ata andrö.

Nitöngöni

• No mufaudugö wanura molo'ö EYD.
• No lö mufaogö wamo'eluaha, ena'ö lö aetu manö-manö ia ba tenga tobali famotu niha.
• No göi mu'alösö'ö ma'ifu wanutunö ya'ia.

Umbu

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö