HOHO SANANDRÖSA BA MBARU LUO BARU MBALUGU NDRUNDRUTANÖ.
Haewö Mbalugu Ndrundrutanö Langi,
Mbalugu Ndrundrutanö Banua.
So'aya mböwö oroisa langi,
so'aya mböwö dema-dema.
Ya'ia zi no fahöna barasi,
si no fahöna bari gana'a.
Ya'ia zo'aya baruluo walangi,
ya'ia zo'aya baru sotöra.
Khönia mbaruluo sihandro tanö,
baru lou sihandro ölia.
Baru da'ö ele'ele Mbalugu,
ele'ele wa'asalaŵa.
Ba data'osisi'ö tanehesi,
data'osisi'ö ta'ila.
Gatumbukha mbaru si handro tanö,
khönia mbaru si handro ölia.
Da'ö khönia mbaru ni'indrö'indrö,
da'ö khönia mbaru nila'a.
Ni'indrö da'ö me akhömi danö,
nila'a me lö haga zibaya.
Ba ha zola'a samo'indrö'indrö,
ha zanua same la'ala'a?
Ya'ia ninada Siwaria Walangi,
ya'ia ninada Siwaria Mbaŵa.
Da'ö nina si bidöyö lö hörö,
da'ö ninada hörö no au'a.
Bidöyö ia na no humaga danö,
lö i'ila ba haga zibaya.
Mangila sa na no akhömi danö,
faoro khönia, na bongi lö haga.
Samuza mbongi me ogömi danö,
me lö ae faoro haga zibaya.
Ituyu wamola'a famo'indrö,
ituyu wamola'a fanua.
Wola'a baru Ndrundrutanö Langi,
baru Ndrundrutanö Banua.
Fola'a mbaruluo sihandrö tanö,
fola'a mbaru sihandrö ölia.
I'owuloi khönia mböna walangi,
i'oratu khönia mböna mbaŵa.
I'owuloi walölöŵa ana'a,
i'owuloi walölöŵa balaki.
I'oni wofo'usö wangowulo,
ira waruwaru zangozara,
khönia mböna soya,
fangoya gindrö,
mböna khönia soya la'ala'a.
Ibe tane'a zotöra walangi,
da'ö zotöra sawai ana'a.
Sotöra sa'usö, mo'uli mbowo,
sotöra sa'usö sobowo zösa.
Tane'a hulayo, sowua gasumbo,
töla hulayo, ibe gorona.
Fanuriaigö mifuri ba ndraono,
ba wangombakha mitou ba raha.
Wa oyo wö ae zikhala Zi'ulu,
tagoyomö zikhala Zalaŵa.
Na no fahöna gana'a barasi,
na no so yomo dalu nindrandra.
Na so ba haya mbawi dele-dele,
na so ba haya mbawi sebua.
Na lö i'ulo mböwö faolomasi,
na lö ifohu wame lahina.
Ena na la'ila si bohou tumbu,
fa la'ila si bohou sumöla.
Na no tobali niha fongambatö,
na so ngambatö na no modonga.
Ba kasumbo dane'a wamohiro,
tane'a hulayo gorona.
Ibe wo'indrö hulayo satarö,
ibe hulayo sofalölöŵa.
Famadumana nono mbarahao,
famadumana ba zowanua.
Maedo wauru so ba danga zi'ulu,
maedo aya zalaŵa ndriala.
He na ahenia a'oi sumaewe,
ba arutu no so ba danga.
Maedomaedo da'ö niha ngahönö,
ba ha samösa zame aetula.
Oi maedo gangetula zi hönö,
maedomaedo gangetula zoya.
Wa oi satarö ia molöndru go'o,
asuo da'ö mane falölöwa.
Na tenga ngambatö lö sangowalu,
enaö na lö si faöli modonga.
Ba tane'a hiro zo'arö mbulu damo,
tane'a hiro mane betua.
He ia na ono si'alawe,
he na khö zibolowua.
He na ia khö nono sila'i,
he na khö nono matua.
Tola ae hiro ni'ozuzu mbari,
tola ae hiro ni'ohalasa.
Me lö na si fao wame'e ngaetu,
lö si fao ba gaolo zatua.
Ba ha zamene Siwaria Walangi,
si'amene'ö Siwaria Mbaŵa?
Ya'ia Gere Malio sibaya luo,
ya'ia Malio sibaya mbawa.
Da'ö gere solaya bauwu nangi,
solayalaya bauwu mbara.
Me afusi wali, ahatö moluo,
ahatö zui humaga zibaya.
Mamahasu Ziwaria Walangi,
mamahasu Ziwaria Mbaŵa.
Ifuli zui ia mane bidöyö,
ifuli ia zui hulö zau'a.
Ifuli ia ba Gaekhula Luo,
ifuli ia ba Gaekhula Mbawa.
Italingaigö mene-mene gere,
isofu wanuturu mbesoa.
Wanohugö famo'indrö baru,
wanohu famo'indrö nukha.
Sarawu Mbalugu Ndrundrutanö Langi,
Balugu Ndrundrutanö Banua.
famenesi Malio Sibaya Luo,
famenesi Malio Sibaya Mbawa.
Ba me no bongi taya haga luo,
me lö oroma haga zibaya.
itohugö Siwaria Walangi,
itohugö Siwaria Mbaŵa.
Ibira hulayo songenge nue,
ifakhai zongenge ge'ea.
Famadumana na fakhai zi'ulu,
famaedo na fakhai ndra salawa.
Na lafaböbö danömö zi sökhi,
famakhai tönu si öna'öna.
Wa oi fahatö hili sagaröu,
oi farege hili si no faefa.
He awöni he göi ewo böra,
fahare mbulu, fahare ndraha.
Maedo ndra Si'ulu ira salaŵa,
na no fakhai, fala'o' fa'iwa.
Ibira na ni'ongenge magai,
ifali ni'ongenge lambana.
Maedo da'ö niha ba danö,
maedo da'ö zowanua.
Mamahalö tanömö zi sökhi,
na mamakhai tönu zi öna'öna.
Wa oi fakhai ba dönu zi sökhi,
faböbö göi ba dönu mbukala.
Ibe ba doto mafi ba gambölö,
ba gete'ete zusu zalaŵa.
maedo zi sandroto ngenge magai,
soku'öi bola nafo balaota.
Fangombakha da'ö möi holi-holi,
so yomo zaota mbola lahina.
Ina da'ö si lö fa'oto böwö,
soböwö wame afo liwua.
Ba dua rozi mbu gi'o zasai,
isu'a ba doto mafi gabera.
Te'u'u zi tölu duhi-tuhi wondrakö,
afore, lauru ba fali'era.
Andrö zasai, famaedo wotuwusö,
sangöni barahao fobanua.
Si möi bele zi hönö ba mbaloho,
sanimba emali wobanua.
Mamene na malio sibaya luo,
mamene malio sibaya mbaŵa.
Ba hulu musua wangerai mbosi,
awö haohao wa'asalaŵa.
Mube wamaedo Zigaru dora'i,
famaedo zigaru dora'a mbaŵa.
Fa böi olifu mitou ba nga'ötö,
ena'ö mamatohu ba raha.
Wanöngöni bosia Wa'asi'ulu,
wamae'ö bosi nono salaŵa.
Si no aro me ba wondrakö nöri,
aro gōi ba wondrakö mbanua.
Ba fitu bongi ba zogömi-gömi,
fitu bongi ba zi lö oroma.
Ninada Siwaria Walangi,
ninada Siwaria Mbawa.
Wola'a baruluo sihandro tanö,
baru luo sihandrö ölia.
Khö mbalugu Ndrundrutanö Langi,
khö Ndrundrutanö Banua.
Awena awai me böröta dohare,
awena awai me böröta mbawa.
Andrö molombase Ziwaria walangi,
molombase Siwaria Mbawa.
Ibaloi ba mbawa wa lö faoro,
ibaloi mbawa lö oroma.
Awena ifatohu wamo'indrö,
awena ifatohui wamola'a.
Nukha Ndrundrutanö Langi,
nukha Ndrundrutanö Banua.
Mombase fa'ogömi danö,
mombase gaekhuta mbawa.
Ifakoniaö Malio Sibaya Luo,
ikaoni Malio Sibaya Mbawa.
Wanofu wanohu famo'indrö,
ba wanohugö fola'a nukha.
Famalali mbaru luo,
famalali mbaru nila'a.
Ya'ia zaombö soya fanali,
öndröra soya fanaeta.
Me irugi bawa no akhömi,
no irugi bawa ba gaekhuta.
Itohugö Siwaria Langi,
itohugö Siwaria Mbawa.
Wamo'indrö famafali,
wola'a saombö oroma.
Khö Mbalugu Ndrundrutanö Langi,
khö Ndrundrutanö Banua.
Bakha ba dalu zogömi-gömi,
bakha ba dalu zi lö oroma.
Ifo'indrö zaombö walangi,
ifo'indrö zaombö oroma.
Ibe famo'indrö zowua honu,
ila'a sowua zukhu ta'awa.
Famalalinia zobowo gundre,
ibe hulayo zobowo zösa.
Ba sara tö zaombö nifali,
sara tö zaombö öndröra.
Ibe'e tane'a zowulu rai,
da'ö zotöra tari humaga.
Ibe'e famalalinia gasumbo,
ibe hulayo zawai orona.
Ibira zinga, sowulu nesitö,
ibira sowulu laeguara.
Ibira mbalö songenge magai,
da'ö zotalinga nadi hara.
Itumbo ngai ifohambula,
ibönö böna ana'a.
Ba sara tö zaombö Zi'ulu,
sara tö zaombö zalaŵa.
Da'ö zotöra sowulu lagaene,
sotöra da'ö sowulu ndrima.
Oi ihure, oi ifohulayo,
za'oi ila'a ifobakola.
Oi ihure, mbe zawai baluri,
ifohambula sihaga-haga.
Ibe fohure mbowo mali-mali,
ibe fo'indrö zobowo ndrima.
Da'ö zaombö si tölu ba wamae'ö,
saombö nifali, tölu endronga.
Hiza Mbalugu me no mama'anö,
hiza Mbalugu me no monukha.
Humaga galizuzu ba mbalaki,
humaga gamu'u ba gana'a.
No göi i'anoho mburusa,
ibe ba högö zaembu ana'a.
No ibe ba mbagi ni'owua dawuo,
ba dete hadoli dötö'a.
No i' obaru mbaru Zi'ulu,
no ifae'ö mbaru Zalawa.
Da'ö mbaruluo Sihandrö Tanö,
baruluo Sihandrö Ölia.
Samösa manalugu hörö zaombö,
samösa mangonoro göndröra.
Ibe ba dumbo mafi ba gambölö,
gaule nifotambua gela-gela.
No ifae'ö ba mbagi mbö'ötö,
döla gasa, aya Zalaŵa.
Ba lafoyo, ifae'ö mböbö talu,
ana'a felendrua me mutimba.
Nahia wanondrö garinia hanakha,
ba ngai göri ana'a zalaŵa.
Ba sara na sa rosö fanarösi,
sara khönia rosö fanaba.
Oi ifohiro-hiro böna luo,
oi ifohumba böna mbaŵa.
Ba me no oi ifae'ö ba nukha,
me no ifae'ö ba gama-gama.
Ba hulö gawöni solu'u töla,
hulö gewo sowaru laeguakha.
Hulö zulu nifalizo-lizo, hulö zulu
nifarömba-römba.
Tola sulu ba zogömi-gömi,
tola sulu ba zi lö oroma.
Da'ö wö mbalazi ila'ila,
wa'a'ono Zi'ulu Zalaŵa,
wa'a'ono zarara tuha.
Zi lö samalalawa niha bö'ö,
zi lö samaewuawua niha soya.
Da'ö Mbalugu Ndrundrutanö Langi,
da'ö Ndrundrutanö Banua.
Donga ninada Barasi Mbalaki,
donga ninada Barasi Saota.
Sanaisi sanörö wonganga afo,
sanaisi sikoli wame lahina.
Ina si lö mangulo faolomasi,
si lö mamodombua fa'iwasa.
Wa lö mendrua ia sindruhu nina,
duhu wa ina, sarara ina.
Saohagölö..
Moroi khö zatuada
Ama Pasca Telaumbanua
Nisura ba FB (Akun: Ama Pasca Telaumbanua) me 9 Agustus 2022
Fabaliŵa lala edit
Fanolo ba wanura: Lala wanura • Fama'oli nösi • Ngawalö templat • Ngawalö kategori
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö