Wb/nia/Halöŵö Zinenge/9/Famalalini era-era Zaulo.

FAZA 9

1 I. Ba löʼö na tebato waʼomasi Zaulo, ifetaʼu nifahaö Zoʼaya ba ibunu; möi ia khö ndra ere sebua,

(A. 9, 2—9: F. 22, 4—10: 26, 9—18)

2 iʼandrö khönia zura, nibeʼe ba Ndramaseko ba zekola, enaʼö iböbö na falukha ia zoloʼö huku daʼö, ira matua ba ira alawe, ba iʼohe ba Yeruzalema.

3 Ba ba wofanö, me ahatö ia ba Ndramaseko, ba iʼozumagö ifasui ia haga, moroi si yaŵa ba mbanua.

4 Ba alau tou ia ba danö, ba irongo li, imane khönia: He Saulo! he Saulo! hana wa ögohido?

5 Ba imane: He Soʼaya, ha niha ndraʼugö? Ba imane: Yesu ndraʼo, nigohiu.

6 Ba faoso ba ae ba mbanua andrö, ba laŵaʼö khöu he öwisa.

7 Ba labadugö ira niha andrö, awönia ba lala, lö hede-hede; larongo sa li andrö, ba lö oroma khöra niha.

8 Ba maoso Zaulo moroi ba danö, ba me ifehaga ia, ba lö iʼila hadia ia; ba laʼohe dangania, lafasao ia ba Ndramaseko.

9 Ba tölu bongi lö iʼila niha, lö manga ia ba lö ibadu nidanö.

(A. 9, 10—19: F. 22, 12—16)

10 Ba so ba Ndramaseko nifahaö, Anania döinia, ba imane ba daʼö Soʼaya, ba gangilata: He Anania! Ba imane: yaʼe ndraʼo, Tua!

11 Ba imane khönia Soʼaya: Faoso, ae ba newali andrö, nifotöi ”sadölö” ba sofu zotöi Saulo andrö, banua Dareso, ba nomo Yuda. Hiza sa, mangandrö ia,

12 ba no iʼila niha, sotöi Anania, si möi khönia yomo, sanufa högönia tanga, enaʼö ifuli iʼila niha.

13 Ba itema linia Anania, imane: He Tua, no ato zangombakha niha andrö, nirongogu, iʼabölögö wamakao niʼamoniʼö andrö khöu, ba Yeruzalema, laŵaʼö.

14 Ba ba daʼe, ba no latehe khönia ere sebua, tola iböbö dozi si angaröfi li töimö.

15 Ba imane khönia Soʼaya: Aeʼe, me no fakake nituyu daʼö khögu, ba wolohe ba niha baero töigu ba ba zalaŵa ba ba Ndraono Gizeraëli.

16 uʼoromaʼö sa khönia, ha waʼoya zi lö tola lö göna ia famakao, börö döigu andrö.

17 Ba möi Ganania, möi ia yomo ba nomo andrö, itufa högö Zaulo tangania, imane: He talifusögu Saulo, Soʼaya zamatenge yaʼo, Yesu, sangoromaʼö yaʼia khöu, ba lala nitöröu, enaʼö ifuli öʼila niha, ba enaʼö tehöna khöu Geheha niʼamoniʼö

18 Ba iʼanemaʼö aboʼa ba hörönia zi hulö hunahuna, ba ifuli iʼila niha; ba maoso ia, ifabayagöʼö idanö ia, ba iʼā gönia, fangabeʼenia.

19 Ba so ia maʼifu ba daʼö ba Ndramaseko, awö ndra nifahaö.

20 Ba iʼanemaʼö iʼombakhaʼö Keriso, ba zekola, wa ono Lowalangi daʼö.

21 Ba tobali dödö dozi samondrongo daʼö, ba lamane: Tenga daʼö zamakiko no, ba Yeruzalema si angaröfi li töi andrö, ba si möi ba daʼe, ba wamöbö yaʼira ba ba wolohe yaʼira khö ndra ere sebua?

22 Ba itugu abölö na Zaulo, fawuka dödö niha Yehuda, si fatewu ba Ndramaseko, ibeʼe, wamaʼeleʼö, wa Keriso Yesu.

23 Ba me no ara maʼifu, ba mamagölö niha Yehuda, ba wamunu yaʼia.

24 Ba irongo Saulo dödöra andrö. Ba manaro göi ira ba mbawa göli, bongi maʼṍkhö, ba wamunu yaʼia.

25 Ba latolo ia nifahaönia ba zi bongi, ladada baero göli, ba ragaraga.

26 Ba me no irugi Yeruzalema, ba itandraigö ifaogö ia khö ndra nifahaö, ba aʼoi ataʼu ira, lö faduhu dödöra, wa no nifahaö ia.

27 Ba itolo ia Baranaba, iʼohe khö ndra sinenge, idunödunö khöra, he wisa wangilania Soʼaya ba lala, awö wa no muhede khönia, ba he wisa wamahaönia, wangombakha töi Yesu, ba Ndramaseko, wa lö aiwö ia.

28 Ba faofao ia khöra, ba Yeruzalema, heza möi ira, ba lö aiwö ia, wamahaö, wangombakha töi Zoʼaya.

29 Ba muhede ia göi ba Ndrawa Heleni, fahuhuo ira, ba yaʼira, ba laʼalui wamunu yaʼia.

30 Ba me larongo daʼö talifusö, ba laʼohe ia misi tou ba Kaizaria, ba lafatenge ba Dareso.

31 Ba ohahau dödö mbanua Yesu, ba danö Yudaia maʼasagörö, awö ba Zamaria, itugu aro ira, ba latörö lala Zoʼaya, laʼataʼufi ia, ba fahöna khöra wondrara dödö khö Geheha niʼamoniʼö.

(Halöŵö Zinenge 9:1-31)

Famotokhi ba gahe

Faza 9: Famalalini era-era Zaulo (1-31) | Ifadöhö wökhö Fetero, ba (32-35) | isusugi Dabita (36-43)

Fabaliŵa lala

Fanolo ba wanura: Lala wanura • Fama'oli nösi • Ngawalö templat • Ngawalö kategori

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö