Wb/nia/Halöŵö Zinenge/20/I'angonasi zatua mbanua ba Nefeso ba Mileti
17 III. Ba moroi ba Mileti, ba infatenge ba Nefeso, ifakaoniʼö zatua mbanua.
18 Ba me no möi ira khönia ba imane khöra: Miʼila, he uwisa ba khömi, ero maʼṍkhö, iotarai luo me uhundragö danö Azia. [1]
19 Enoni Zoʼaya ndraʼo, maʼifu lö si fayaŵa ndraʼo, mowöi daŵa hörögu, ba so wanandraigö, si göna ndraʼo, ba wamagönaisi niha Yehuda yaʼo. (A. 3).
20 Miʼila he uwisa, wa lö nitahagu soguna khömi, si lö uʼombakhaʼö khömi, si lö ufobawa lala khömi, ba zi so niha sato ba yomo göi,
21 wamaduhuʼö ba niha Yehuda ba ba Ndrawa Heleni famalalini eraʼera khö Lowalangi, awö wamati khö Zoʼaya yaʼita, Yesu Keriso.
22 Ba hiza iadaʼe, usaŵa Yeruzalema, amaedola zi so ba wesu dödögu; hadia zi göna ndraʼo ba daʼö, ba lö uʼila, [2]
23 baero nifaduhuʼö Geheha niʼamoniʼö khögu, ba mbanua misa, iŵaʼö, ibalobaloi ndraʼo böbö ba famakao. [3]
24 Ba lö ba dödögu nosogu, lö itörö ligu na i, ba wangoʼozui lalagu, awö halöŵögu andrö, nitemagu khö Zoʼaya, Yesu, famaduhuʼö turia somuso dödö, turia waʼebua dödö Lowalangi andrö. [4]
25 Ba hiza sa, uʼila, löʼö saʼae faʼila bawa ita, dozi ami nitörögu, wangombakha banua Lowalangi andrö.
26 Andrö ufaduhuʼö khömi maʼökhṍ andre, lö horögu ba ndrora fefu.
27 Löʼö sa nitahagu, fa lö uʼombakhaʼö khömi geraʼera Lowalangi fefu.
28 Andrö mifaigi-faigi dödömi, ba mifaigi-faigi nikubaloi andrö fefu, ba nifataro Geheha niʼamoniʼö yaʼami samaigi-maigi, ba wokubaloi banua Zoʼaya andrö, nihölinia khönia donia. [5]
29 uʼila, na no mofanö ndraʼo, ba so moroi baero nasu gatua samaraʼu, si möi khömi, ba lö alimagö khöra nikubaloi andrö. [6]
30 Ba so göi niha si otarai khömi, solau huhuo si tefuyu, ba wondrönisi khöra nifahaö.
31 Andrö, böi miförö, mitörö-törö tödömi: medölu fakhe waʼara, bongi maʼṍkhö, ba lö nibatogu wamarou tödömi dozi ami, mowöi daŵa hörögu ba daʼö. [7]
32 Ba iadaʼe, ba utouʼö ami ba danga Lowalangi ba ba daroma li faʼebua dödönia andrö, khönia, sangila mangaʼaroʼö tödömi, sangila mameʼe khömi ondröita andrö, awö niʼamoniʼö andrö fefu. [8]
33 Samösa lö niʼaluigu firö, ba ma anaʼa, ba ma nukha. [9]
34 Miʼila ae, tangagu andre zangalui soguna khögu, awö zoguna ba nawögu. [10]
35 Fefu gofu heza, ba no uʼoromaʼö khömi, si manö wohalöŵö, ba nitolo zambö faʼabölö, ba böi olifu ita niŵaʼö Zoʼaya, Yesu, me imane: ”Ohahau dödö ba wameʼe, moroi ba wanema.”
36 Ba me aefa iŵaʼö daʼö, ba ibalö duhini tou danö, mangandrö ia, ba fao ira fefu. [11]
37 Ba tobali abölö-bölö wegeʼegera fefu, ba latalagui mbagi Waulo, faʼago bawa ira khönia.
38 Abölö abu dödöra ba niŵaʼönia andrö, wa löʼö saʼae faʼila bawa ira. Ba lafasao ia baowo. (A. 25).