Samuza föna, ba lalau fadahö-dahö si fitu yaŵa zaeru andrö, awö zi lima andrö tou zaeru; lafadöni-döni hezo zi a'a ira, ba wa'atumbu ba ba wa'asalaŵa göi. Fitu ira, oi lafadöni-döni manö: bawa ba hörö ba ikhu ba tögi dalinga ba tödö ba tanga ba ahe.
Hulö zi fazöndra-zöndra manö ira ba wamadöni, heza zi a'a.
Imane hörö: "Si a'a ndra'o, moroi khömi, ya'ami si daönö andrö; oföna u'ila sa hadia ia, moroi khömi." Ba imane tögi dalinga: "Lö'ö le, si a'a sa ndra'o moroi khömi; oföna urongo gofu hadia ia." Ba imane ikhu: "Lö'ö le, si a'a sa ndra'o, moroi khömi; oföna sa u'ago hua, gofu hadia ia, andrö sa, wa si a'a sa ndra'o." Imane bawa: "Lö'ö le, si a'a ndra'o, moroi khömi fefu, me ya'o zi manga, gofu hadia ia, andrö wa si a'a ndra'o moroi ba khömi andrö." Ba imane tanga: "Lö'ö le si a'a sa ndra'o, moroi ba khömi fefu, me ya'o zangai gofu hadia ia; andrö sa, wa si a'a ndra'o, moroi khömi andrö." Ba imane ahe göi: "Lö'ö le, si a'a i ndra'o, moroi khömi andrö fefu, me ya'o zofanö-fanö misa; gofu heza lafatenge ndra'o, ba möido, akao-kaodo ba lala."
Ba lö'ö manö na sa hede-hede dödö barö dötö'a bakha, ifondrondrongo manö, he lawisa da'ö, ba ha laŵa'ö dania ba gafuriata.
Ba fasoso-soso manö ira no mege, si daönö andrö, lafadöni-döni wa'asia'ara; siŵa luo ba siŵa mbongi lö labato da'ö, ena'ö latehe si a'a ia zamösana; ba faoma wa'abe'e, fauma lö lalulu khö nawöra.
Ba aföli sa'ae dödö, me fagua-gua manö ira. Awena humede ia sa'ae, imane: "Ya'ugö hörö, ba ya'ugö ikhu, ba ya'ugö tögi dalinga, ba ya'ugö bawa, ba ya'ugö tanga, ba lö'ö na lainia gahe ua: ba uŵa'ö i khömi da'ö; ya'o sa zi a'a, ba itete na sa ahe andrö. Börö sa ndra'o, awena maoso ami fefu; na lö maoso dödö bakha, ba lö fakhai ami andrö; ba na maoso ndra'odo atö, ba itete nasa ahe, ba awena danga ba awena ndra'ugö, ya'ugö bawa göi. Ha sa sangila manö ndra'ugö hörö, awai gunau ba da'ö göi. Ba awai gunau, tögi dalinga, ha samondrongo manö. Ba awai gunau göi, ikhu, ha sangago manö ndra'ugö; ba si manga manö gunau göi, ya'ugö bawa. Na lö'ö atö maoso dödö, ba lö'ö göi maoso gahe, ba lö ihalö tanga ba lö ö'a, ya'ugö bawa. Ha na no maoso ndra'o ba na no mofanö gahe, ba na no ihalö hadia ia tanga, ba awena ö'a, ya'ugö bawa. Andrö sa, wa si a'a ndra'odo, moroi khömi andrö fefu, böröta ndra'o ua, andrö dania, wa oi maoso ami andrö, fefu. Na no ahono atö ndra'o, ba ahono ami fefu, ba na maoso atö ndra'o, ba awena maoso ami göi. He ŵa'ae faoma fasöndra ami andrö, ba ya'o sa ma'ifu zi a'a.
Umbu edit
Heinrich Sundermann, "Amaedola ba Manömanö" bakha ba Niassische Texte mit Deutscher Übersetzung, 's-Gravenhage, Martinus Nijhoff, 1905, nga'örö 28-29.