Me föna ba sambua mbanua saröu so sageu mbawi si no atua-tua sibai. I'ila wa laföfölö ia niha na irugi dania inötönia, simane bawi bö'ö ba mbanua andrö. Börö da'ö i'odödögö wangoguna'ö ginötö wa'auri si toröi khönia.
Ifomaha ia ba fefu ngawalö wangi'ila nifa'ema khö ndraono ba zekola. I'osindruhugö sibai irege tobali atua-tua ia. Ato niha mbanua si möi khönia ba wamondrondrongo mene-menenia ba omasi-masi göi ia wanolo niha na so zabu dödöra.
Samuza ma'ökhö alua lökhö sabölö-bölö ba mbanua andrö. Oi tekiko nösi zinanö khöra irege lö mowua ba lö mamasi niha. Ato niha sabu tödö wa lö tobönö wangönara.
Me i'ila zalua simanö bawi andrö ba muhi'a dödönia ba wanolo ya'ira. Börö da'ö möi ia khö zatua mbanua ba iŵa'ö khönia wa itehegö laföfölö ia ena'ö böi olofo niha mbanua.
Ba mböröta mangiwa dödö zatua mbanua andrö, ba hiza i'aro'ö dödönia bawi andrö, wa no lala satulö da'ö. Andrö lafahö mbawi da'ö ba nagolenia labagi-bagi khö niha mbanua so'amböta soguna.
Me owulo ndra niha mbanua ba zinga galitö, me no ahori manga ira, itörö tödöra fefu niŵa'ö mbawi satua-tua andrö. No ibe'e wa'aurinia ena'ö tola auri ira. I'anema'ö aboto ba dödöra wa fozu wa'atua-tua andrö no ba wangoguna'ö ya'ia ba wanolo niha bö'ö ba tenga ba wangowuloi fangi'ila ma fa'onekhe.
I'otarai ngaluo andrö latörö-törö tödöra mbawi andrö fefu niha ba mbanua. Lö aetu latutunö khö ndraonora mitou wa bawi andrö no samösa guru sindruhu. No ya'ia zamomaha ya'ira hadia guna wa'auri ba gulidanö si no ifataro Sokhö.
Sanura: Sirus Laia