Wb/nia/Balögaöti ba Bu Narögalogo

So samösa ndramatua ba mbanua mafi yöu Danö Niha sotöi Gofumböwö. Lö ara föna wa'amate namania ba lafangowalu ia khö Menibe ba zi fasinga banua khöra. Börö me ha ya'ia nono ba ngambatö zatuania, andrö wa hatö datölu ira inania, furi namania.

No fitu fakhe me no mongambatö ira, ba lö manö so'ono. Abu dödöra, mendrua manö nasa me no döfi me iröi ira inara.

Börö me sinumana ira ba la'eragi wohalöŵö ma lalau ndregera wangalui soguna.

Ba lafatörö döira niha ba mbanua andrö: Ama/Ina Balögaöti.

Lö manö ohau-hau-dödö Nina Balögaöti, aombö dödönia hewisa ba ginötö miföna na no atua ira, ba na fazamösa oföna mondröi ulidanö.

Ifalawugö wamaehagö khö wo'omonia, imane, "He Ama Balögaöti, na duma-duma oföna ahele nasi khöu, ba hewisa ndra'o moroi furi. Lö onoda samatohu börösisi." Fao fa'adö'u-dö'u ba wöi-wöi daŵa hörönia, i'andrö sibai gera-era wo'omonia.

Itöfa bakha dödö Ama Balögaöti, i'ösigö wanema li imane, "Duhu sibai nifaehagömö. No göi so ba dödögu zimanö. Da talau tani wangandrö khö Zokhö, somböi boto ba nosoda, ta'andrö ya i'amualagö khöda nonomatua, he ha izai balögaöti mbalazinia."

Me no hasara dödöra, ba lalau mangandrö simane niŵa'ö-ŵa'öra no mege, ba faduhu sibai dödöra wa ha sambalö wa latema. Dörö börö me soroi dödö, ba omuso dödöra me ibörögö manabina Nina Balögaöti.

Hiza'i ha irugi ŵalu waŵa dabinania ba abölö bölö wökhö Nama Balögaöti, iröi gulidanö.

Itaögö manö wa'afökhö moroi furi fo'omonia, lö aetu mangandrö fa'ahakhö dödö Zokhö boto ba noso.

Hawa'owua-wua dödönia me no irugi baŵa, ba tumbu khönia nonomatua. No ide-ide ha izai balögaöti.

Ba labe'e töinia Balögaöti, me no to'ua sa'ae. Imane tödönia, "Ŵara lö utema, ba no angandröŵama mege. Faduhu dödögu wa dela howu-howu manö da'e moroi khö Zo'aya."

Me no ebua-bua Balögaöti, ba alö göi wa'abölö ninania, imane khö ninania, "He nagu, lö tumbu gaŵöni na lö tanö. Da möi ita mangalulu khö zibayagu, ba wangandrö fanuturu lala ena'ö tedou mbosi wa'aurida andre. Da ta'andrö danömö wonowi, fa tola aheta ita ba mbaho wa'anumana andre."

Itema inania wanguma'ö, "He nogu, heŵa'ae no mokhö ndra sibayamö andrö, ba alai na anuzu dödöra ita."

I'aro'ö dödö ninania Balögaöti, imane, "Gofu hewisa dania, möi manö ita. Lö ambö lala khö Zo'aya."

Lö ara aefa da'ö meŵalu desa'a, momöi khö ndra sibayania Balögaöti.

Me no larugi yomo ba manofu khöra zibayania, hadia dani wa'atoharera. La'ombakha'ö danira fao fangalulu ba la'andrö wanolo na so zi tobali tanömö nowi.

Lö latötöna wa tenga si sökhi wanema li moroi khö zibayania. Imane sa wanguma'ö, "Lö khögu tanömö nowi, milabu ami. Lö ömi khögu."

Imane Balögaöti fao fe'e, "He Baya, tenga öma ni'andröma, ha börö danömö."

Itugu mofönu zibayania. Maoso ia isösöbi mbu narögalogonia, imane, "Wa'ogorogu ami, miböusi ndra'o, oi mita'unöi tou zalo, milabu wö'i ami. Hiza khöu danömö, halö mbu narögalogogu!"

Imane Balögaöti khö ninania, "Lau nagu, talabu ita, ohe khöda mbu narögalogo zibayagu, da'ö nitanöda dania, sitobali lala wangorifi boto tanö andre."

Fao fa'afatö dödö, lalau mofanö, laröi nomo zibaya Balögaöti, ladölö ira yomo, ba la'ohe ba wangandrö hadia nitötönara ba ginötö miföna.

Tölu bongi aefa da'ö, möi ira ba nowira. Me no fahawu du'u zui, ba lalau mohalöŵö ba wolowi.

Imane Balögaöti khö ninania, "Fitu rozi mbu narögalogo andre, da tatanö sara ero sambua owoto, ba ero tatanögö ba tatötöi fakhe da'a, rigi da'a, gowirio da'a, ohi da'a, gowi da'a, duria da'a, ba kamandriki da'a."

Me no lafalua da'ö ba mangawuli ira.

Me no irugi töra sara waŵa furi'ö, ba zi mewelendrua Dohare, momöi wamaigi nowira.

Ha wa'atokeara si fao fa'omuso dödö sabölö bölö, me la'ila oi tumbu zinanö nifotöira no, ba zi fitu ngenoli gowoto, ahori so zi fitu ngawalö zinanö, egedidö ma agatabö ba ehowu sibai.

I'otarai da'ö lö sa'ae abu dödöra wangalui soguna khöra. me onekhe ira wangoguna'ö. Lahaogö nomora si bohou, ba ladudugö sa'ae nosera si no atua.

Nitöngöni

• No mufaudugö wanura ba EYD (Ejaan Yang Disempurnakan).
• No lö mufaogö wamo'eluaha, ena'ö lö aetu manö-manö ia ba tenga tobali famotu niha.
• No göi mu'alösö'ö ma'ifu wanutunö ya'ia.

Umbu

Balögaöti, Ono Sadölö Tödö bakha ba Buku Cerita Rakyat (Manömanö) Nias Kota Gunungsitoli (2019), nifa'anö Soraya Zebua & Yasato Harefa, nga'örö 45-47.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö