Databua'ö ho'ae, tafalalini,
Databua'ö ho'ae, tafagilo,
Ya'ita tome wotalinga mbatö,
Ya'ita tome wotalu zalo.
Datafazawili hörö zombö,
Datafasalio hiro-hiro.
Datafaedo gaya-gaya waha,
Datafaedo mbisi sesolo;
Yomo ba nomo zalaŵa helanö,
Yomo ba nomo Duha terongo.
Owua khöda dödö, ma'igi'igi,
Owua khöda dödö, omuso,
Me no tatema mbua lahina,
Me no tatema mbua nafo;
Mbuala danga masi-masi,
Mbuala danga idoro
Khö ninada Tuho barasi,
Khö ninada Tuho nomo.
Ho ifidi isakai lahina,
Ho ifidi isakai nafo,
Barö zangehowu öri,
Barö helatö sinundro,
Wa ikholi wino, ifosöri,
Wa ikhoi dawuo, ifobeto;
Ho ilau gurakhi ba zi föfö,
No ilau gafoa, hunö wino;
Hulö nilömbu ahe gela-gela,
Hulö nilömbu ahe ngaroto.
Ba he wöi, me no langanga mbua lahina,
Ba he wöi, me no langanga mbua nafo,
Andrö wa sara waŵa lö damanga,
Andro döfi fasui lö olofo.
A'oi esolo ndraono side-ide,
A'oi esolo ndraono safuo,
A'oi abölö zi tebai mofanö,
A'oi abölö zi tebai milo.
Me no tanganga mbua lahina,
Me no tanganga mbua nafo,
Ösi mbolara ni'otaraŵa,
Ösi mbola ni'ohulayo:
Ösi nuwu zaranö ana'a,
Ösi nuwu zaranö hamo;
Ya'ia dawuo lasaramboi alitö,
Ya'ia dawuo lasaramboi simbo :
Ya'ia sa wino so'uli gana'a,
Ya'ia sa wino so'uli hamo.
Ya'ia mbago mömö sire ana'a,
Ya'ia mbago mömö sire hamo.
Nitöngöni edit
- No tehalö mbalö huhuo andre moroi ba nifotöi "Gema" bakha ba "Umanö ba we'amöi tome" (26 nga'örö wa'anau!) nifa'oli H. Sundermann (faigi gumbu tou). Aefa da'ö no göi mubulö'ö gila-ila zure molo'ö EYD bahasa Indonesia ena'ö aoha wombaso ba ndraono si bohou ebua.
- Eluaha wehede nisura aöndrö: ho'ae: sambua lala wanunö; sombö: ni'oguna'ö Nono Niha me föna si hulö sereŵa, nifazökhi moroi ba guli geu; hiro-hiro: si hulö nukha moroi ba guli geu ni'oguna'ö ba wobalugö högö; bua lahina: te variasi mbua nafo da'a; masi-masi: fa'omasi; ifidi/isakai: mamidi afo; sangehowu öri: tua nöri; helatö sinundro: te variasi moroi ba sangehowu öri da'a; ifobeto: te eluahania mame betua ba mbulu dawuo; gurakhi: te variasi moroi ba gafoa (faigi khoi-khoi si fatete) somuhua; nilömbu: eluahania no la'alösö'ö faoma ana'a; gela-gela: bulu dalinga; ngaroto: te variasi gela-gela da'a; milo: möi mondra'u sökha/utu ndru'u; ni'otaraŵa: motif dekorasi mbola-bola; nihulayo: bola-bola nifazökh faoma motif hulayo; lasaramboi alitö: te töi dawuo da'e simane göi lasaramboi simbo; fino: baero dawuo, gambe ba betua moguna wino ba wamagaölö afo; bago mömö sire ana'a: te töi puitis mbago da'a
Umbu edit
H. Sundermann, Niassische Texte mit deutscher Übersetzung, 1905, nga'örö 1.
Fabaliŵa lala edit
Fanolo ba wanura: Lala wanura • Fama'oli nösi • Ngawalö templat • Ngawalö kategori
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö