থায়না মমাংঙৈদা উমং অমদা পেবেৎ মপী মচা খরা লৈরমই। অদুগা মফম অদুদা হৌদোং লম্বোইবা অমসু লৈরমই। পেবেৎ মপীনা মচাশিং অদু পাইবা শানহনবা অদু হৌদোং লম্বোইবা অদুনা উরম্মী। মদুদগী হৌদোং লম্বোইবা অদুনা পেবেৎ মচাশিং অদু চানিংলম্মী। অদুগা হায়রশ্মী “হায় পেবেৎ ঐগী ইশকসে কয়াম ফজৈ?” অদুদগী পেবেৎ মপী অদুনা হৌদোং লম্বোইবদুগী তৌশিন্নবা মতৌদু খঙলদুনা পেবেৎ মপীনা খুমলকই “ অয়ো অয়ো ইবুংঙো, ইবুংঙোগী মশক্তি ফৌ শংবাই অথনবা, ঙারি পরেং অচুম্বা, বারকী তয়াল অঙাংবা মুক ফজৈ হায়খি। অদুদগী হৌদোংদু হরার্ড হরাউনা হনখিরম্মী।
অদুদগী মথংগী নুমিত্তসু মখুত্তা মালা পায়রদুনা মচিন্দা মুরুম মুরুম শোন্দুনা পেবেৎকী লৈফমদা অমুক লালক্ষ্মী। অদুগা অমুক হলমই হায় পেবেৎ ঐগী ইশকসি কয়াম্মুক রান্না ফজৈ ? অদুদসু পেবেৎ মপী অদুনা হান্নগুয়া হায়রম্মী “অয়ো অয়ো ইবুংঙো ইবুংঙোগী মশক্তি ফৌ শংবাই অথনবা, ঙারি পরেং অচুম্বা, বারক্কী তয়াল অঙাংবা মুক ফজৈ” হায়না খুল্লম্মী। মসিদগী হৌদোং লম্বোইবা অদুসু হনখ্রে। মহাকসু তাঞ্জা লুল্লদুনা নুংতিগী লাব্লম্মী। পেবেৎ মপী অদুসু হৌদোংগী মতাং অদু খঙলদুনা মচাশিং চাউবা ঙাইদুনা পাইবা ঙমদ্রিফাওবা হৌদোং লম্বোইবা অদুবু থেম থেমদুনা নুমিৎ কয়ানি হৌখিরমই। মচাশিং অদুনা পাইবা হৈরক্লবা মতমদদি পেবেৎ মপীদুনা হৌদোং লম্বোইবা অদুবু থিনা চৈরগে নিংলে। অদুদগী হৌদোং লম্বোইবা অদু অমুক লাকলে অদুগা পেবেৎ মপীদা হংলরে হায় হায় পেবেৎ ঐগী ইশকসে কয়াম ফজৈ? ” মসিদা পেবেৎ মপীদু শাওরদুনা খুল্লকই “ হৌদোংনবু কয়াম ফজনি হায়গে, হৌদোংদি হৌদোংমুক ফজৈ। অসি হায়রম্লগা ইচাশা ফ্রং হায়বগা পাইয়ে। মদুদা হৌদোংদু শাওরদুনা ঙরং-ঙরং ঙংলে। অদুগা পেবেৎ মচাশিংদু চাথোক্লগে খল্লে। মসিদগী পাইবা ঙমফাৎত্রিবা পেবেৎ মচা অমা তাপ হেক ফাই অদুগা চারগে তৌই। মদু উবদা পেবেৎ মপীনা ব্রাতোন্দগী হায়রকই – পেবেৎ ঐখোয়বু চাগে হায়রবদি অহানবদা ইরু ফজনা লুথোকপিরো অদুগা লা লাতোন অমদা হাপ্লগা মতু মমান খিংতোকপিরগা চাবিয়ু হায়রম্মী। পেবেৎত্মপীগী ৱাদু লৌরদুনা হৌদোং লম্বোইবনা পেবেৎ মচা অদু ঈরু ফজনা লুজথোকপীরে, মতু মমান খিংতোকপিরে অদুগা মখুবাক ময়ায়দা চেং খরা হাপ্পীরে। মসিদগী পেবেৎ মচা অদু মতু মমান খিংলদুনা মপীনা “ইচা তোম্বী ফ্রং হায়বদগী মথী পেৎ চিৎলগা পাইথোকখ্রে। হৌদোং লম্বোইবনা ফাবা নংহৌদরে। মসিদা শাওনিংলদুনা পেবেৎ মচাগী মথী অদু ওইনা সর সর লেকশিল্পে অদুগা মথন্তা হায়জরশ্মী “মথীনা অসুক হাওরসিনদি মশাদি করি ওইরমগনি। ” মসি হায়রগা নিংঙমদনা লৈহৌরে হৌদোং লম্বোইবা অদু।