Wb/mnc/manju gisun/manju hergen -i eldengge wehe/ilan sakda sunja dulembuhe sere gisuren
ᡳᠯᠠᠨ ᠰᠠᡴᡩᠠ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠰᡝᡵᡝ ᡤᡳᠰᡠᡵᡝᠨ᠉
ᡳᠯᠠᠨ ᠰᠠᡴᡩᠠ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠰᡝᡵᡝ ᡤᡳᠰᡠᠨ᠈ ᡳᡵᡤᡝᠪᡠᠨ ᡳ ᠨᠣᠮᡠᠨ ᡩᠠᠰᠠᠨ ᡳ ᠨᠣᠮᡠᠨ ᡩᡝ ᡨᡠᠴᡳᠪᡠᠮᡝ ᠠᡵᠠᡥᠠᡴᡡᠪᡳ᠈ ᡩᠠᠮᡠ ᡩᠣᡵᠣᠯᠣᠨ ᡳ ᠨᠣᠮᡠᠨ ᡩᡝ ᠠᡵᠠᡥᠠᠩᡤᡝ ᡥᠠᠨ᠋ ᡤᡠᡵᡠᠨ ᡳ ᠪᡳᡨᡥᡝᡳ ᠨᡳᠶᠠᠯᠮᠠ ᠴᡳ ᡨᡠᠴᡳᡴᡝᠩᡤᡝ ᡠᠮᠠᡳ ᡴᡠᠩᡯᡳ ᡳ ᡤᡳᠰᡠᠨ ᠸᠠᡴᠠ᠈ ᡶᡠᡴᠵᡳᠨ ᡯᠣ ᡴᡳᠣ ᠮᡳᠩ ᠨᡳ ᡠᠯᠠᠪᡠᠨ ᡩᡝ ᡤᡠᠩ ᠪᡝ ᠠᠮᠪᡠᠯᠠ ᠠᠰᠠᡵᠠᡶᡳ ᠵᡝᡴᡠ ᠨᡳᠶᠠᡥᠠ ᠪᡳᠮᡝ᠈ ᡳᠯᠠᠨ ᠰᠠᡴᡩᠠ ᡳ ᡤᡝᠰᡝ ᠰᠠᡴᡩᠠᠰᠠ᠈ ᡝᠯᡝᠮᠠᠩᡤᠠ ᡠᠵᡳᡵᡝ ᡴᡝᠵᡳ ᠪᡝ ᠠᠯᡳᡥᠠᡴᡡ ᠪᡝ ᡥᡝᠨᡩᡠᡥᡝᠪᡳ᠈ ᡠᠮᠠᡳ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠪᡝ ᠰᡠᠸᠠᠯᡳᠶᠠᡤᠠᠨᠵᠠᠮᡝ ᠯᡝᠣᠯᡝᡥᡝᡴᡡ᠉ ᡳᠯᠠᠨ ᠰᠠᡴᡩᠠ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠪᡝ ᠰᡠᠮᡝ ᡤᡳᠰᡠᡵᡝᡥᡝᠩᡤᡝ ᡠᠮᡝᠰᡳ ᠯᠠᠪᡩᡠ᠈ ᡝᠮᡝᠮᡠ ᡩᡝᡵᡤᡳ ᠵᠠᠯᠠᡶᡠᠨ᠈ ᡩᡠᠯᡳᠮᠪᠠᡳ ᠵᠠᠯᠠᡶᡠ᠈ ᡶᡝᠵᡝᡵᡤᡳ ᠵᠠᠯᠠᡶᡠᠨ ᠪᡳᠰᡳᡵᡝᠩᡤᡝ ᠪᡝ ᡥᡝᠨᡩᡠᡥᡝᠪᡳ ᠰᡝᠮᠪᡳ᠈ ᡝᠮᡝᠮᡠ ᠸᡝᡳᠯᡝᡵᡝ ᡶᠠᡴᠰᡳ᠈ ᡥᡡᡩᠠᡳ ᠨᡳᠶᠠᠯᠮᠠ᠈ ᡠᠰᡳᠨ ᡳ ᡥᠠᡥᠠ ᠪᡝ ᡥᡝᠨᡩᡠᠮᡝ ᠪᡳᠮᡝ᠈ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠪᡝ ᡳᠨᡠ ᠵᠣᠨᠣᡥᠣᡴᡡᠪᡳ᠈ ᡝᠮᡝᠮᡠ ᠠᠪᡴᠠ ᠨᠠ ᠨᡳᠶᠠᠯᠮᠠ ᠵᠠᡳ ᠰᡠᠨᠵᠠ ᡶᡝᡨᡝᠨ ᡳ ᡩᠣᡵᠣ ᠪᡝ ᡤᡝᡨᡠᡴᡝᠯᡝᡥᡝᠩᡤᡝ ᠰᡝᠮᠪᡳ᠈ ᡝᠮᡝᠮᡠ ᡳᠯᠠᠨ ᠣᡵᠣᠨ᠈ ᠰᡠᠨᠵᠠ ᡠᠰᡳᡥᠠ ᡳ ᠠᡵᠪᡠᠨ ᡩᡝ ᡩᡠᡳᠪᡠᠯᡝᡥᡝᠪᡳ ᠰᡝᠮᠪᡳ᠈ ᡝᠮᡝᠮᡠ ᡳᠯᠠᠨ ᡝᡵᡩᡝᠮᡠ᠈ ᠰᡠᠨᠵᠠ ᠪᠠᡳᡨᠠ ᠪᡝ ᠰᠠᡥᠠᠩᡤᡝ ᠰᡝᠮᠪᡳ᠈ ᡝᡵᡝ ᡤᡝᠰᡝ ᠪᡝᠶᡝᡳ ᡤᡡᠨᡳᡥᠠ ᡨᡠᠯᠪᡳᡥᡝ ᠴᡳ ᡨᡠᠴᡳᡴᡝᠩᡤᡝ ᠪᡝ ᡨᠣᠯᠣᡥᠣ ᠰᡝᠮᡝ ᠸᠠᠵᡳᡵᠠᡴᡡ᠈ ᠵᠠᡳ ᡮᠠᡳ ᠶᡠᠩ ᠨᡳ ᡝᠮᡥᡠᠨ ᠯᠠᠰᡥᠠᠯᠠᡥᠠ ᠪᡳᡨᡥᡝᡩᡝ ᠠᠮᠠ ᡳ ᡤᡝᠰᡝ ᡠᡳᠯᡝᠮᠪᡳ᠈ ᠠᡥᡡᠨ ᡳ ᡤᡝᠰᡝ ᡠᡳᠯᡝᠮᠪᡳ ᠰᡝᡥᡝ ᡤᡳᠰᡠᠨ ᠪᡝ ᡥᠣ ᡨᡠᠩ ᠪᡳᡨᡥᡝᡩᡝ ᡤᡝᠯᡳ ᡨᠠᡧᠠᡵᠠᠮᡝ ᡳᠯᠠᠨ ᠰᠠᡴᡩᠠ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠪᡝ ᡧᡠᠸᡝ ᠮᡝᡳᠮᡝᠨᡳ ᡝᠮᡠ ᠨᡳᠶᠠᠯᠮᠠ ᠰᡝᠮᠪᡳᠮᡝ᠈ ᠠᠮᠠ ᠣᠪᡠᠴᡳ ᡩᠠᠮᡠ ᡝᡴᡝ ᠣᠴᡳ ᠸᠠᠵᡳᡥᠠ᠈ ᡳᠯᠠᠨ ᠪᡳᠴᡳ ᠣᠵᠣᡵᠠᡴᡡ ᠰᡝᡥᡝᠩᡤᡝ ᠠᡳ ᠠᠪᠰᡳ ᠠᠯᡩᡠᠩᡤᠠ ᠠᠪᡴᠠᡳ ᠵᡠᡳ ᠰᠠᡴᡩᠠ ᠪᡝ ᡠᠵᡳᡵᡝᠩᡤᡝ ᠴᠣᡥᠣᠮᡝ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᡥᡳᠶᠣᠣᡧᡠᠨ ᠪᡝ ᡨᠠᠴᡳᠪᡠᡵᡝᠩᡤᡝ ᠠᠮᠠ ᠣᠪᡠᡶᡳ ᡠᡳᠯᡝᡵᡝ ᡩᠣᡵᠣ ᠪᡳᠣ᠈ ᡨᡝᡵᡝ ᠠᠩᡤᠠᠯᠠ ᡳᠨᡳ ᡤᡳᠰᡠᡵᡝᡥᡝᠩᡤᡝ ᠠᠮᠠ ᠣᠪᡠᠴᡳ ᡝᠮᡴᡝ ᠣᠴᡳ ᠸᠠᠵᡳᡥᠠ ᠰᡝᡥᡝ ᡳᠴᡳ ᠣᠴᡳ ᠠᠪᡴᠠᡳ ᠵᡠᡳ ᡩᡝ ᠪᡝᠶᡝᡳ ᠠᠮᠠ ᠪᡳᡴᠠᡳ᠈ ᡨᡝ ᡤᡝᠯᡳ ᡝᠮᡠ ᠨᡳᠶᠠᠯᠮᠠ ᠪᡝ ᡠᡳᠯᡝᠴᡳ ᠠᡳᡴᠠ ᠵᡠᠸᡝ ᠠᠮᠠ ᠪᡳᠰᡳᡵᡝᠩᡤᡝ ᠸᠠᡴᠠᠣ᠈ ᠮᡝᠨᡨᡠᡥᡠᠨ ᠪᡳᡨᡥᡝᡳ ᠨᡳᠶᠠᠯᠮᠠ ᡠᠨᡨᡠᡥᡠᠨ ᠪᡳᡨᡥᡝᡳ ᡤᡳᠰᡠᠨ ᠪᡝ ᠮᡝᠮᡝᡵᡝᠮᡝ ᠠᠮᠪᠠᠨ ᠵᡠᡵᡤᠠᠨ ᠪᡝ ᠵᡠᡵᠴᡝᠮᡝ ᠪᠠᠯᠠᡳ ᠪᠠᠨᠵᡳᠪᡠᡥᠠᡴᡡᠩᡤᡝ ᠶᠠᠯᠠ ᡝᠮᡤᡝᡵᡳ ᡳᠨᠵᡝᡵᡝ ᡩᡝ ᠰᠠᠯᡳᡵᠠᡴᡡ ᡴᠠᡳ᠈ ᡮᠠᡳ ᠶᡠᠩ ᡤᡝᠯᡳ ᡩᡠᠯᡝᠮᠪᡠᡥᡝ ᠰᡝᡵᡝ ᡤᡳᠩ ᡥᡝᡵᡤᡝᠨ ᠪᡝ ᠰᠠᡴᡩᠠ ᠰᡝᡵᡝ ᠰᡝᠣ ᡥᡝᡵᡤᡝᠨ ᠣᠪᡠᠮᡝ ᠰᡠᡥᡝᠩᡤᡝ ᡠᡨᡥᠠᡳ ᡧᡳ ᡥᠠᡳ ᠰᡝᡵᡝ ᡥᡝᡵᡤᡝᠨ ᡳ ᠴᠠᠯᠠᠪᡠᡥᠠ ᠠᡩᠠᠯᡳ ᠰᡝᡥᡝᠪᡳ᠈ ᠰᡝᠣ ᠰᡝᡵᡝ ᡥᡝᡵᡤᡝᠨ ᡠᡨᡥᠠᡳ ᠰᠠᡴᡩᠠ ᠰᡝᡵᡝ ᡥᡝᡵᡤᡝᠨ ᡳ ᠠᡩᠠᠯᡳ ᠣᠴᡳ ᡝᠮᡤᡝᡵᡳ ᠰᠠᡴᡩᠠ ᠰᡝᡥᡝ ᡴᠠᡳ᠈ ᡤᡝᠯᡳ ᠰᡝᠣ ᠰᡝᡵᡝ ᡴᠣᠣᠯᡳ ᠠᡴᡡ ᠮᡳᠨᡳ ᡤᡡᠨᡳᠨᡩᡝ ᡳᠯᠠᠨ ᠰᡝᡵᡝ ᡥᡝᡵᡤᡝᠨ᠈ ᠠᠪᡴᠠ᠈ ᠨᠠ᠈ ᠨᡳᠶᠠᠯᠮᠠ ᡳᠯᠠᠨ ᡥᠠᠴᡳᠨ ᡳ ᡨᠣᠨ ᠰᠠᡴᡩᠠ ᠪᡝ ᡠᠵᡳᡵᡝ ᡩᡝ ᡳᠯᠠᠨ ᠪᡝ ᡨᡠᡴᡳᠶᡝᠮᡝ᠈ ᡨᡝᡵᡝᡳ ᡨᠣᠨ ᠪᡝ ᠵᠣᡵᡳᠮᡝ ᡥᡝᠨᡩᡠᡥᡝᠩᡤᡝ᠈ ᠰᡠᠨᠵᠠ ᡩᡠᠯᡝᠮᠪᡠᡥᡝ ᠣᠴᡳ ᠪᠠᡳᡨᠠ ᠪᡝ ᡩᡠᠯᡝᠮᠪᡠᡥᡝ ᠰᡝᠮᡝ ᡤᡳᠰᡠᡵᡝᡥᡝᠩᡤᡝ ᡥᠣᠨᠣ ᡥᠠᠨᠴᡳ ᡤᡝᠰᡝ ᠰᡠᠨᠵᠠ ᠴᡳᡴᡨᡝᠨ ᠰᡠᠨᠵᠠ ᡝᠨᡨᡝᡥᡝᠮᡝ ᠶᠣᠣᠨᡳ ᡝᡩᡝ ᠶᠣᠩᡴᡳᠶᠠᡥᠠᡴᡡᠩᡤᡝ ᠠᡴᡡ᠈ ᠨᡳᠶᠠᠯᠮᠠᡳ ᡨᠣᠨ ᠪᡝ ᡠᡵᡠᠨᠠᡴᡡ ᠮᡝᠮᡝᡵᡝᠴᡳ ᠣᠵᠣᡵᠠᡴᡡ᠈ ᡤᡳᠩᡤᡠᠨ ᡠᠨᡝᠩᡤᡳ ᡥᡡᠸᠠᠯᡳᠯᠶᠠᠰᡠᠨ ᠨᡝᠴᡳᠨ ᡳ ᠶᠠᠪᡠᠮᡝ ᡩᡠᠯᡳᠮᠪᠠ ᡥᡡᠸᠠᠯᡳᠶᠠᠰᡠᠨ ᡨᠣᡴᡨᠣᡥᠣ ᡥᡡᠸᠠᡧᠠᡵᠠᠩᡤᡝ ᡠᡨᡥᠠᡳ ᡝᡩᡝ ᠪᡳᡴᠠᡳ᠈ ᡤᡝᡵᡝᠨ ᠪᡳᡨᡥᡝᡳ ᠨᡳᠶᠠᠯᠮᠠ᠈ ᡝᡳᡨᡝᠨ ᡤᡡᠨᡳᠨ ᠴᡳᡥᠠᡳ ᡧᡠᡩᡝᠮᡝ ᡤᠠᠮᠠᠮᡝ ᠯᡝᠣᠯᡝᡥᡝ ᡤᡳᠰᡠᠨ ᠪᡝ ᡤᡝᠯᡳ ᡩᠠᠪᡠᠴᡳ ᠣᠮᠪᡳᠣ᠉
ᠠᠪᡴᠠᡳ ᠸᡝᡥᡳᠶᡝᡥᡝ ᡩᡝᡥᡳ ᡳᠯᠠᠴᡳ ᠠᠨᡳᠶᠠ ᠰᡠᠸᠠᠶᠠᠨ ᡳᠨᡩᠠᡥᡡᠨ ᡨᡠᠸᡝᡵᡳ ᡩᡠᠯᡳᠮᠪᠠᡳ ᠪᡳᠶᠠᡳ ᡳᠴᡝᡵᡝᠮᡝ ᡥᠠᠨ ᡳ ᠠᡵᠠᡥᠠᠩᡤᡝ᠉
ilan sakda sunja dulembuhe sere gisuren.
ilan sakda sunja dulembuhe sere gisun, irgebun -i nomun dasan -i nomun de tucibume arahakūbi, damu dorolon -i nomun de arahangge han' gurun -i bithei niyalma ci tucikengge umai kungdzi -i gisun waka, fukjin dzo kio ming ni ulabun de ilan sakda beyere yuyure de isinaha sere gisun umesi goidaha, tuttu seme ulabun de gung be ambula asarafi jeku niyaha bime, ilan sakda -i gese sakdasa, elemangga ujire kesi be alihakū be henduhebi, umai sunja dulembuhe be suwaliyaganjame leolehekū, ilan sakda sunja dulembuhe be sume gisurehengge umesi labdu, ememu dergi jalafun, dulimbai jalafun, fejergi jalafun bisirengge be henduhebi sembi, ememu weilere faksi, hūdai niyalma, usin -i haha be henduhe bime, sunja dulembuhe be inu jonohokūbi, ememu abka na niyalma jai sunja feten -i doro be getukelehengge sembi, ememu ilan oron, sunja usiha -i arbun de duibulehebi sembi, ememu ilan erdemu, sunja baita be sahangge sembi, ere gese beyei gūniha tulbihe ci tucikengge be toloho seme wajirakū, jai ts'ai yung ni emhun lashalaha bithede ama -i gese uilembi, ahūn -i gese uilembi sehe gisun be ho tung bithede geli tašarame ilan sakda sunja dulembuhe be šuwe meimeni emu niyalma sembime, ama obuci damu emke oci wajiha, ilan bici ojorakū sehengge ai absi aldungga abkai jui sakda be ujirengge cohome abkai fejergi de hiyoošun be taciburengge ama obufi uilere doro bio, tere anggala ini gisurehengge ama obuci emke oci wajiha sehe ici oci abkai jui de beyei ama bikai, te geli emu niyalma be uileci aika juwe ama bisirengge wakao, mentuhun bithei niyalma untuhun bithei gisun be memereme amba jurgan be jurceme balai banjibuhakūngge yala emgeri injere de salirakū kai, ts'ai yung geli dulembuhe sere ging hergen be sakda sere seo hergen obume suhengge uthai ši hai sere hergen -i calabuha adali sehebi, seo sere hergen uthai sakda sere hergen -i adali oci emgeri sakda sehe kai, geli seo sere kooli akū mini gūninde ilan sere hergen, abka, na, niyalma ilan hacin -i ton sakda be ujire de ilan be tukiyeme, terei ton be jorime henduhengge, sunja dulembuhe oci baita be dulembuhe seme gisurehengge hono hanci gese sunja cikten sunja enteheme yooni ede yongkiyahakūngge akū, niyalmai ton be urunakū memereci ojorakū, ginggun unenggi hūwaliyasun necin -i yabume dulimba hūwaliyasun toktoho hūwašarangge uthai ede bikai, geren bithei niyalma, eiten gūnin cihai šudeme gamame leolehe gisun be geli dabuci ombio.
abkai wehiyehe dehi ilaci aniya suwayan indahūn tuweri dulimbai biyai icereme han -i arahangge.
ᠠᡳᠰᡳᠯᠠᡵᠠ
ᠪᡳᡨᡥᡝᡳ
ᠴᠠᡤᠠᠨ aisilara bithe cagan (参考资料)
edit
ᡝᡵᡝ
ᠵᡠᠰᡨᠠᠨ
ᡴᡝᠮᡠᠨᡳ
ᠮᡠᠶᠠᡥᡡᠨ
ᠰᠠᡳᠨ
ᠣᠵᠣᡵᠣ
ᡠᠨᡩᡝ᠈
ᡥᠠᠰᠠ
ᠮᡠᠶᠠᡥᡡᠨ
ᠣᠵᠣᠪᡠᡵᡝᠣ᠉
ere justan kemuni muyahūn sain ojoro unde, hasa muyahūn ojobureo.
此页面未完善，需要尽快补充。
- ᡝᡵᡝ ᡝᠯᡩᡝᠩᡤᡝ ᠸᡝᡥᡝ ᡩᡝ ᠮᠠᠨᠵᡠ ᡥᡝᡵᡤᡝᠨ ᠴᡳ ᡨᡠᠯᡤᡳᠶᡝᠨ᠈ ᠨᡳᡴᠠᠨ ᠰᡝᡵᡝ ᡠᡥᡝᡵᡳ ᠵᡠᠸᡝ ᡥᠠᠴᡳᠨ ᡳ ᡥᡝᡵᡤᡝᠨ ᡶᠣᠯᠣᠪᡠᡥᠠᠪᡳ᠉ ᠠᡳᡴᠠᠪᠠᡩᡝ ᠰᡳ ᠨᡳᡴᠠᠨ ᡥᡝᡵᡤᡝᠨ ᠪᡝ ᡠᡵᡝᠰᡥᡡᠨ ᡳ ᠪᠠᡥᠠᠨᠠᠴᡳ᠈ ᠨᡳᡴᠠᠨ ᡥᡝᡵᡤᡝᠨ ᡳ ᡠᠪᠠᠯᡳᠶᠠᠮᠪᡠᡥᠠ ᡶᡳᠶᡝᠯᡝᠨ ᠪᡝ ᠨᠣᠩᡤᡳᠪᡠᡴᡳ᠉
- ere eldengge wehe de manju hergen ci tulgiyen, nikan sere uheri 2 hacin -i hergen folobuhabi. aikabade si nikan hergen be ureshūn -i bahanaci, nikan hergen -i fiyelen be nonggibuki.
- 此碑文除满文之外，还有汉文共2种文字。如果阁下能够流利的使用汉文，请添加《三老五更说》的汉文版本。