Wb/jv/Sastra Jawa/Sastra Jawa Modhèrn/Angin Ketiga

Angin Ketiga (Trim Sutidja)

rodha bakal muter bali, Sumi

yèn langit klawu ing bang wétan

wis kesaput angin ésuk

lan kembang-kembang randhu

mangsa karo padha gogrok

kowé njur lunga menyang tegal, Sumi

nyambut gawé nganti soré

wenginé yèn wis sepi

kapangmu mesthi kumat manèh kaya mala

marga aku ana kutha

wis kejiret benang-benang sutra

lan katut malih dadi angka

Sumi,

aja kok kira kapangku wis mari

saben wengi dak tlusuri iliné kali Ciliwung

dak-golèki mbokmanawa ana serat-serating citramu

sing dak temu

sanadyan aku ngerti

iku sawijining dosa

yèn langit ing bang wétan

wis kesaput tekaning ésuk dina anyar

aku mesthi bali, Sumi

nalusur ing andhaning dhandhanggula

ngaras rambutmu lan tegal kita

(Kapacak ing kalawarti Jayabaya No.17, Oktober 1971)