Talk:Wb/skr/اُبھردا تارا
۞[{سئیں عاشق بُزدار نال مُلاقات}]۞ کَئ ݙینہاں تُوں سِک ہَئی مِلݨ دی عاشق بُزدار کُوں. گُزریل کَل فون تےرابطہ تِھیا تے سَئیں عاشق بُزدار صئیب مِلݨ دا ٹائم ݙِتا، جین٘دےنال دِلّی پیاس دی آس توڑ پُڄݨ کُوں نیڑے تِھین٘دی نظرآئی تےذہن ءِچ کَئی علـمی، ادبی سوالیں اَپݨی ترتیب دی ڄاہ جوڑݨ سان٘گے اَہرکیتی. ایویں ݙینہہ لَہݨ تُوں پہلے مَن بھان٘ولے اُستاد پروفیسر مُریدعباس عارفؔ دی کال آئی تے اُنہاں دے لَباں تےنہ مِلݨ دا شکوہ کُجھ ایں طراں ہا "اساں کنوں دِل چایو وےیار" ڄَاپےکِتھاں وَن٘ڄ لایو وےیار" مُحبت دےرَنگ کُجھ وَکھرےہون٘دِن، جَڈݨ وی ناچیزدی اعلٰی تعلیم ءِچ مُعاونت کرݨ والے مہربان ہَستیاں دا ذکرتھیسی اُون٘دے ءِچ مُریدعارف صئیب دا ناں قابِل ذکر ہوسی، اے اُنہاں دی بےبہا مُحبت ناچیز کُوں ایم فل سرائیکی دو گِھن آئی.سَویردا سِجھ اُبھریاتے سَبھےکام کار ویلھےسِر تُوں پہلاں کرگِھدے، نِریان کرݨ تُوں بعد یاد ݙیواوَݨ دےطور تےمُریدعارفؔ صئیب کُوں فون کیتا تےاَپݨی روانگی بارےݙسایا. ساڈھےڈاہ وَڄےدانش سکول فاضلپور دےسامݨےپُڄݨ تےفرمان اُستاد دےمُطابق رابطہ کرݨ سانگےجَئیں ویلھےموبائل جیب ءِچوں کڈھیا تےجناب دی ہِک مِسکال آچُکی ہَئی، کال مِلائی ایہا خبرآئی جو اساں ݙاکدارخلیل دی کلینک دےنال ہوٹل تےسئیں جاویدآصفؔ نال تُہاݙی بھال ءِچ ہَئوں بس کُجھ پَل دا سفر باقی ہا، اِنڈس سڑک دےݙینہہ لَہا والےپاسوں کلینک نال ہِک چھوٹی جَہیں کیبن تےمُریدعارف صئیب اپݨی سوہݨی سَن٘گت نال کچاری کرین٘دے ٻیٹھےہَن. سَلام دُعا تےمِلݨ نال دِل باغ بہارتِھیا تے جناب دےنال سوہݨےلکھاری، شاعر و ادیب وَکھرے اسلوب دےمالِک سئیں جاویدآصفؔ صئیب دے رَڄ دیدار تَھئےتےاُنہاں نال چاہ پیوݨ دا مزہ کجھ ہور ہَئی مُختصر جَہیں گَپ شَپ تَھئی تے وَل اُنہاں دی دُعانال رُخصت تھی پیوسےخاص پروبھرے ہِک دَفتر جن٘گ اخبار ءِچ امین انجؔم صئیب نال تعارفی سلسلےمِلیوسے تےجناب مُریدعارفؔ اپݨے ٹِکاݨہ خاص ٻاہݨ دی جھات کرائی ݙیکھݨ کُوں سوہݨی وِساخ تے چن٘ڳاں جیہاں دفترنظرامدا ہَئی، شہردے وِچاگ آلی سڑک تےروانہ تھی پیوسے جین٘دا ڳانڈھا ""مہرےوالا""دی سڑک نال تھین٘دا ہا سَت اَٹھ میل دا پَندھ غالباً شہرفاضلپورتُوں ""جھوک بُزدارمہرےوالہ""دا ہوسی ایہو پَندھ بُھرݨ کیتےمیݙا ہَم سفر مُریدعارفؔ صئیب میݙےنال ہَئی. رَستےءِچ کَݨک دا نِسارا ہا موسم ݙاݙھا پیارا ہَا سَرمی دے پُھلیں دی بِھیݨی خُشبو دےنال نال کَݨک دےسِٹےآپت ءچ کَھڑ تےمَن بھاوݨی موسیقی سُݨریندےکھڑےہَن
""آؤ بہارو جُھمری مارو""
دی چَس رَس آپݨی آپ ہَئی.ایں منظر اکھیں کوں ٹَھاڈل ݙِتی تے دِل دے سَت ماڑ تےجُھمر دے پھیر لَوائی رَکھیے. پروفیسرصئیب میݙےجذبیں کوں حیاتی دا نواں رُخ ݙیوݨ کیتےاپݨی صلاح سِیون٘ج تےڳالھ مُہاڑکُوں ٹوری رکھیا. پَندھ توڑکُوں پُڄیا"مہرےوالہ"ویلھےتےپُڄ ڳیوسے مہرےوالہ دی اَڄوکی سُنڄاݨ سئیں عاشق بُزدارہے، جَئیں پِچھلےتَرےݙہاکےتُوں وَدھ سرائیکی زبان و ادب، تےرِیت کُوں ہِک نَوی حیاتی ݙِتی تےہرسال ݙُو ݙینہواراں میلہ اپݨےسَمل تےٻانہہ ٻیل سنگت نال لَویندےپَئن، جیندے ءچ،ݙرامہ جُھمر، مُشاعرہ، موسیقی، تےکھیݙاں تےکتابیں دی نُمائش میلہ دا حصّہ ہون٘دی اے. سَئیں عاشق بُزدار سرائیکی تحریک دا پہاڑ جِتنا وَݙا نا صرف سوجھواݨ ہےبلکہ سُڄاک تےاُشاک شاعر و ادیب، نثرنگارتے تَل وطنی پُراݨا سیاستدان وی ہے. کَئ واری یونین کونسل دا چئیرمین تےضلع کونسل دا ممبر وی رَہ ڳئے. عاشق بُزدار سرائیکی وسیب دےاَݨ پَھر، کنڈوراݨے، پیروراہݨے تےسِروں نڳیے واسیں دی ہِک تَکڑی تےوَزبرآواز ہے، جَیں اَپݨی دَھرتی دا نوحہ 1986ء ءِچ جَگ مشہور کتاب ""قیدی تخت لاہور دے""لِکھی تےجیڑھا اَڄ وسیب ءِچ ہِک نعرہ بَݨ ڳئے "اَساں قیدی تخت لاہور دے" اقبالؔ دی طراحاں اَپݨےگُنگےدھرتی واسیں کُوں اُنہاں دےنال دَروہ تھیوݨ دا ݙَس ݙِتا تےراہ پَندھ دا ہِک خواب ݙِکھایا.. کُجھ ایں طراحاں
تُوں لَیلݨ ڳبھرو ݙِیس دا تُوں وَزبر تُوں شہ زور پَئی ویلھا وقت سُہاڳ دا تُوں کھارےچڑھ تھی گھوٹ ناں جےکرجاڳیوں وقت تے تاں چَہکاں چَرسِن چور تیݙیاں مومل،سومل، سَسّیاں وَن٘ڄ وِکسِن شَہر لہور سَئیں عاشق بُزدار اَپݨی شاعری دےذریعےگنگےٻاتے دَھرتی دےٻُڈھے، گھٻرو، ٻَالاں کُوں ہِک جاڳ لاتی تےاپݨی ساری حیاتی سرائیکی قوم دےحقوق سانگے لَڑدےریہےتےعملی کام کُوں وَدھارا ڈین٘دے پئن. نینگریں کُوں سَنیہا ݙین٘دے اَہدِن ""اَپݨی قیدݨ دَھرتی ماءدِی پارت ہیوی این٘دےݙُکھڑےسُکھڑےسارےآپ سَن٘بھالیں"" میڈا ذاتی خیال اے جو سَئیں عاشق بُزدار مورخ وی ہےتاریخ وی ہے. سَئیں عاشق بُزدار دے دَرشن تَھئے. ݙُوپہراں دا ٹُکرپاݨی عاشق خان نال کھاوݨ پیوݨ دا شرف مِلیا، عاشق خان دےٻَلپݨ دی سَن٘گتی، جھوک بُزدار داسینگھار مُنورخان بُزدار دی چاہ دے تَرےواری ٹَھڳور لئے، عاشق بُزدار تُوں علمی ادبی سبق گِھیدوسے، جُمعے دا وار اُنہاں دی سوہݨی مِٹھی محفل ءچ گُزار ݙِتوسے. عاشق بُزدار صئیب ڈھیرسارےموضوعات تےڳالھ مُہاڑ دی چَس چوائی. جھوک بُزدار تُوں وَلدیں واری مُکلاوے سانگے مُنور خان بُزدار نےبھاکُل پاتا تےساکوں راہ لایا. پروفیسرمُریدعارفؔ صئیب کُوں اُنہاں دےجاہ ٹکاݨےتےفاضلپور پُڄاوَݨ تُوں بعد اَپݨےٹِکاݨےتےآن سنبھریوسے. لکھت، ملک محمد رمضان نویؔدآرائیں
Start a discussion about Wb/skr/اُبھردا تارا
Talk pages are where people discuss how to make content on Wikimedia Incubator the best that it can be. You can use this page to start a discussion with others about how to improve Wb/skr/اُبھردا تارا.
