AZAYA 17 Zugsɔb pian' Damaskus yɛla
Zugsɔb pian' labakaŋa Damaskus yɛla ye, “Gɔsima! Damaskus kʋ lɛn an tempʋʋg ya'asɛ, amaa li na lieb nɛ dabɔɔd. 2 Ba na bas Aroa tempʋʋs la, sɔ' kʋ lɛm kpɛn' ani ya'asɛ. Ba na bas ka bʋnkɔnbid ma'aa dig ani, ka sɔ' kae na kadi baa. 3 Paŋ kanɛ ka Efiram tɛɛns mɔr la kʋ lɛm bɛɛ, ka Damaskus na'am paŋ mɛ kʋ lɛm bɛɛ, ka Aram dim banɛ kpɛlim la na kɔ'ɔŋ girima nwɛnɛ Israel dimi kɔ'ɔŋ si'em la”, Zugsɔb la yɛl nɛ'ɛŋa. 4 Zugsɔb la yɛl ye, “Saŋa kenna ka Jakob yidim paŋ la na sie ka ba kpan'am la gaad. 5 Li na nwɛnɛ ki na zi'e ka ba ki'e ka buni naae, ka nwɛnɛ ki linɛ bɛ Refa Dim Bɔn'ɔgin ka ba wi'isi li wʋsa. 6 La'an nɛ wala, o nidib la bi'ela na kpɛlim, ka lɛn nwɛnɛ olif tiis wala ka ba pɔn' ka ayi' bɛɛ atan' kpɛlim saazug sa, ka anaasi bɛɛ anu kpɛlim wil banɛ bɛ teŋir la.” Israel Wina'am la yɛl. 7 Saŋkan la, nidib na gɔs onɛ maali ba la, ka fɛndigi lɛb Israel dim Wina'am Onɛ An Kasi la san'an na. 8 Ba kʋ gɔs maan bimbima banɛ ka ba mɛŋ nu'us maal la, ka mɛ kʋ tis Asera daad la girima nɛ bimbima banɛ ka ba maali nyu'od bʋnnyubisa li zug la.
9 Asida mɛnɛ, li saŋa ya'a ti paae,
ba tempʋbanɛ kpi'em hali la na nwɛnɛ Ammon dim din la nɛ. Tɛɛns banɛ ka ba bas Israel dim yɛla, ka li lieb sian'anr nɛ tutuud wʋsa la, nid kʋ lɛm bɛɛ. 10 Bɔzugɔ, ya tam Wina'am onɛ aan ya Faangid la yɛla, ya pʋ lɛn tiɛn tampiing onɛ aan ya kpi'euŋ sɔb la yɛllɛ. Ya tun'e sɛ teŋ zʋŋ tisʋma, 11 hali ka ba nɔbig ka pu puum daakanɛ ka ya sɛɛ ba la, amaa ya kʋ pun'oe wal baa yinne ba nii. Yanamɛ na bun si'el anɛ sʋnsa'aŋ nɛ tɔɔg linɛ pʋ naada. 12 Kɛlisimi tɛɛns bɛdegʋ dammid si'em; ba dammidnɛ nwɛnɛ atɛuk nɛ! Kasa, nidib la maan tʋkpiidʋg ka li nwɛnɛ ku'otita'ari pʋbid nɛ! 13 La'an nɛ nidib la maan tʋkpiidʋgʋ nwɛnɛ ku'om aaɛn pʋbidi ken la, Wina'am ya'a tansi ba, ba na zɔɔ lalig, ba na zɔ nwɛnɛ udug ka pɛbisʋg ʋki li kʋkʋna ni, ka nwɛnɛ sa'ad ka sisi'epiliŋ da'ae li. 14 Zaam ya'a ma'ae dabietita'ar na bɛ!
Bɛogʋ ti nied la ka ba gaad!
Banɛ faaɛn ti, ka vaae ti la'ad la, ban na di'e si'eli la.