AZAYA ZUT 3 Jerusalem nɛ Juda sariakadib 1 Gɔsima, nannanna, Zugsɔb onɛ an Paŋtita'ar Sɔb la bɔɔd ye o faaɛnnɛ sʋŋir kanɛ bɛɛ tis Jerusalem nɛ Juda la; linɛ an diib bɛɛ ku'om wʋsa, 2 nɛ banɛ an gandaad nɛ zabzabidib la, nɛ sariakatib nɛ nɔdi'esidib, nɛ ba'akɔn dim nɛ kpɛɛmnam, 3 nɛ soogianam banɛ sʋ'oe nidib pisnunu nɛ yʋ'ʋr dim la wʋsa, nɛ banɛ sa'an nidib nɛ banɛ mi' tʋʋma hali la, nɛ banɛ tʋm tiim tʋʋma la wʋsa. 4 M na kɛ ka na'akimbibis aan ba kpɛɛmnam, ka bilies sʋ'oe ba. 5 Nidib na mugusid taaba. Dau na zabid nɛ o tiraan ka nid nɛ o kpi'a na zabid nɛ taaba. Biis na duoe ziem ninkʋda, ka tadimnam mɛ zan'as banɛ aan ba kpɛɛmnam nɔɔr. 6 Saŋa kenna ka nid na gban'e o ba'abiig o saam yin ka yɛl o ye, “Fʋn mɔr fuug, alazug fʋnɛ na sʋ'oe ti, ka maal dabɔɔg nwa' yɛla tisi ti!” 7 Amaa o na tans agɔla ka lɛbis ye, “Mam pɔya mɛnɛ, m pʋ mɔr paŋ kanɛ na nyaŋi sʋŋɛ! Mam pʋ mɔr diib bɛɛ fuudi m yinnɛ; Da nɔk mam ye m sʋ'oe nidib la!” 8 Jerusalem yidig nɛ, ka Juda bɔɔd liig. Bɔzugɔ, ba pian'ad nɛ ba tʋʋma ka' sʋm tis Zugsɔb la, ka ba mɛ ki'is Zugsɔb na'am girima la. 9 Ban gɔsid si'em la pa'al ye ba tʋm taal. Ba tʋmmi ba tʋʋmbɛ'ɛd paalʋ ni wʋʋ Sodom dim nɛ. Yɛl bɛɛ ba zugin, ba mɛŋ tʋʋma kɛt ka ba paam tʋbtɛɛgir. 10 Yɛlim pʋpielim dim la ye, si'el wʋsa na an sʋ'ʋŋa tisi ba bɔzugɔ, ba na dii ba tʋʋm sʋma la nyɔɔd. 11 Yɛl bɛ bugusnam la zugin, yɛltɔɔg na paae ba. Tʋʋmbɛ'ɛd kanɛ ka ba tʋm la, lin ka ba na lɛbisi yɔɔ ba. 12 Biisi mugusidi m nidib la ka pu'ab sʋ'oe ba. M nidiba, banɛ guri ya la na bɔdisi ya, ka fɛndigi ya yis suorin la. 13 Zugsɔb la zin'inɛ o zin'isigin kɔɔtʋ ni. O duoe zi'en ye o kad o nidib la saria. 14 Zugsɔb la kad kpɛɛmnam nɛ tuongatib la saria ka kʋʋsi ba wʋsa bɛ'ɛd ye, “Ya di sɔ' wʋsa pɔɔg zʋʋd, ka tadimnam la'abanɛ ka ya faaɛn la bɛɛ ya yaan. 15 Ya gban'e ye bɔ ka san'amidi m nidib la? Bɛɛ bɔ ka ya nɛɛmidi ba wʋʋ zɔ'ɔm?” Zugsɔb Wina'am Paŋtita'ar Sɔb pian'ʋkʋ la. Jerusalem pu'ab yɛla 16 Zugsɔb la lɛn yɛl ye, “Zion pu'ab la anɛ nyɛɛsim dim; ba ken ka dʋ'ʋsidi ba ningɔnya ka ba gɔsig pa'an ye ba anɛ pu'agɔɔnda. Ba ken ka zia'asidi ba niŋgbina bɔɔd ye nidib gɔs, ka ba nɔba baans kum saiin-saiin.” 17 Dinzugɔ, Zugsɔb la na kɛ ka Zion pu'ab la zut mɔr fɛn'ɛd. O na kɛ ka ba zut la kɔn. 18 Dabisir kenna ka o na yisi ba la'avɛnla la, baans banɛ ka ba pid nɔba nɛ nu'usin nɛ niŋgɔnkɔris nɛ ban pan'ami ba zut si'em la; \v 19 nɛ tʋblɛma nɛ piena banɛ ka ba zanl nu'usin nɛ bɔbis; \v 20 linɛ ka ba mɔri maan zut, nɛ zɔnt banɛ ka ba pid nɔba ni, nɛ piena banɛ lɔɔd siaa, nɛ tudaari nɛ tima banɛ ka ba mɔri kɛt ka dap dɔlli ba la; \v 21 nu'ubibis baans nɛ baans banɛ ga'an nyɔnya ni la; \v 22 fuvɛnla nɛ fubibis nɛ futitada nɛ pɔtmaannam; \v 23 nɛ gɔtis nɛ fubanɛ lusid zug, ankitanam, nɛ la'abanɛ ka ba mɔri bɔbid la wʋsa. 24 Ka li nyuugi naan malisin la, li na nyuusid pɔn'ɔsʋg; ka ban naan lɔɔdin pien sʋma la, ba na lɔɔd nwiis banɛ gbinigbin. Ban naan mɔrin zuobidi maan ka li vɛnl la, ba zut na an kɔɔndkɔɔndi, ka ban naan yɛɛdin fusʋma la, ba na yɛɛd bɔto fuud. Ba vɛnlim la na lieb nyan. 25 Ba na nwɛ' tanpi kʋʋ ya dap, ka ya zabzabidib na kpi zaba ni. 26 Zion za'anɔya ni nidib na kaasidi ba yɛla, ka tempʋʋg la na an zaalim wʋʋ pu'a na zin' sanwɛɛr nɛ.
