AZAYA 46
Babilon wina 1 Bel nɛ Nebo banɛ an Babilon bada banɛ ka bʋnkɔnbid ziidi ba la na vanbin teŋin. Li anɛ gɛɛnlisi tis bʋnkɔnbid banɛ ziidi ba nɛ banɛ maannɛ ba la. 2 Bada nwa' wʋsa na igin teŋin, ba kʋ nyaŋi faaɛn ba mɛŋa, amaa ba na zii ba keŋ sankpan'asimin. 3 Kɛlisimi, Jakob yidima, yanam banɛ kpɛlim Israel yin la wʋsa, yanam banɛ ka m guri ya sʋ'ʋŋa saŋkanɛ ka ba da nan kpɛn'ɛdi ya pʋʋg ka mɔri ya lin yii ya du'am saŋa sa la. 4 Manɛ aan ya Wina'am ka na guri ya ka ya ti kʋdig ka ya zut pɛlig. Manɛ la, manɛ na nyaŋi sʋŋi ya. Manɛ maali ya ka na gɔsidi ya; M na guri ya ka faaɛn ya. 5 “Anɔ'ɔn ka ya na nɔki mak nɛ mam bɛɛ tɛn'ɛs ka o zem nɛ mam? Anɔ'ɔn ka ya na nwaas nɛ mam ka na nɔki ti makɛ? 6 Sieba kpa'ae sanlima ligidi yisi ba kɔlʋgin na ka nɔk anzurifa maki li tɛbisim; ka yɔ banɛ tʋm sanlima tʋʋma la ye ba nɔki maal ba'ari tisi ba, ka iginid teŋin zun'odi li. 7 Ba bukidnɛ ba'ar la ba biankimpiiung zug; ka mɔri keŋ ba'a li zi'eli li zi'esigin, ka li zi'e ani. Li zi'egi la, li kʋ nyaŋi vurigɛ. Baa sɔ' ya'a buonnɛ li, li kʋ siakɛ; li kʋ nyaŋi yis o yɛla pʋʋginɛ. 8 Tɛnri dina, yanam banɛ an ki'isʋg dim nwa', niŋimini li ya sʋʋnrin. 9 Tɛn'ɛsimi bʋn linɛ da niŋ saŋa kanɛ gaad la yɛla; Manɛ an Wina'am, sɔ' lɛn kae; Manɛ an Wina'am ka sɔ' lɛn kae nwɛnɛ mam. 10 Pin'ilʋgʋn sa, ka m pa'ali ya naari na ti an si'em. Kʋdimin sa ka m pa'al linɛ na ti kena. M yɛl ye, ‘Mam bɔɔdim na zi'en, ka m na maal linɛ malisim.’ 11 M buol dau sɔ' ka o na yi ya-nya'aŋ na; o na kena nwɛnɛ silʋg nɛ tʋm mam bɔɔd si'el. Man yɛl si'el la, dinɛ na niŋ; man gban'e si'el la, dinɛ na tʋm. 12 Kɛlisimi, yanam tʋbzian'asim dim banɛ lal nɛ pʋpielim la. 13 M mɔri m pʋpielim la li'el na, li pʋ lalla; ka m faangir la kʋ lɛn yuugɛ. M na tis Zion faangir, ka Israel mɛ na nyɛ m vɛnlim.”