AZAYA 40
Wina'am bʋgʋl o nidib sʋʋnr 1 Ya Wina'am la yɛl ya ye, “Bʋgʋlimi m nidib la sʋʋnr, bʋgʋlimi m nidib la sʋʋnr!” 2 Pian'am bʋgʋsiga tis Jerusalem, ka mɔɔli tis o ye, o tʋʋm kpi'ema la wʋsa gaad ya; ye, o taal kanɛ ka o daa tʋm la, ba yɔɔ li yɛla; ye, o di'e namisʋg abʋyi' Zugsɔb la san'anɛ o tʋʋmbɛ'ɛd la wʋsa zug. 3 † Sɔ' bɛ mɔɔgini mɔɔn ye, “Maalimi suori tis Zugsɔb la; maalim suoraug sappi mɔɔgin la tisi ti Wina'am la. 4 Pɛ'ɛlimi bʋmbu'ad wʋsa ka li dʋ. Birigimi zuoya nɛ kʋkʋna wʋsa ka li sig. Maalimi suobanɛ ka' sʋm la ka ba lieb sassi, ka maal suogɔnlima nɛ zin'ibanɛ ka' sʋm la ka li an sʋ'ʋŋa. 5 Wina'am pipilim la na nie, ka ninsaalib wʋsa na nyɛɛ li. Zugsɔb la mɛŋi pian'.” 6 M wʋm ka sɔ' yɛlim ye, “Kaasima agɔla.” Ka m bu'os ye, “M kaasim yɛl ye bɔ?” Ka o lɛbis ye, “Yɛlim ye, ‘Ninsaalib wʋsa nwɛnɛ mɔɔd nɛ, ka ba vɛnlim nwɛnɛ mɔpuum banɛ bɛ mɔɔgin nɛ. 7 Mɔɔd la ziankid ka li puum la sʋʋgid, Zugsɔb la vʋ'ʋsidi niŋidi ba la zug. Sida ninsaalib anɛ mɔɔd. 8 Mɔɔd la ziankid ka puum la sʋʋgid, amaa Zugsɔb pian'ad la kpɛm bɛ nɛ saŋa wʋsa.’” 9 Yanam banɛ mɔr labasʋŋʋ kɛn Zion na la, dʋmmi zuokanɛ wa'am hali la zug. Yanam banɛ mɔr labasʋŋʋ kɛn Jerusalem na la dʋ'ʋsimi ya kʋkɔya tans agɔla gɔla. Dʋ'ʋsimi, da zɔti dabiem; yɛlim Juda tempʋʋs la ye, “Ya Wina'am la nwa'!” 10 † Gɔsima, Zugsɔb onɛ an Paŋtita'ar Sɔb la kenna nɛ paŋ ye o sʋ'ʋg teŋ la, o paŋ la na bɛ saŋa wʋsa. Gɔsima, o mɔri yɔɔd kanɛ ka o na yɔɔ o nidib. 11 O gur o kɔnbid la wʋʋ kɔnbkem nɛ: O la'asid pɛbibis la ka ʋkidi ba nɛ o nu'usi piankid o nyɔ'ɔgin; ka kad pɛnya'as la bi'el-bi'el. 12 Sɔ' bɛɛ na nyaŋi mak atɛuk ku'om la nɛ o nu'ug bɛɛ mak saŋgbauŋ la nɛ o nu'ug labisim? Anɔ'ɔnɛ na nyaŋi vaae dunia uusʋg la wʋsa niŋ pɛogʋnɛ, bɛɛ mak zuoya la ka mak kʋkʋna baŋi ba tɛbisim? 13 † Anɔ'ɔnɛ mi' Zugsɔb la pʋtɛn'ɛrɛ, bɛɛ na nyaŋi pa'al o bɛɛ sa'al o?
14 Anɔ'ɔn ka Zugsɔb la keŋ o san'an bɔɔd ye o nie o ya'am?
Ka anɔ'ɔnɛ pa'an o linɛ dɔl suorɛ? Anɔ'ɔnɛ da pa'al o baŋir bɛɛ yɛl o linɛ nar ye o tʋm? 15 Dunia la tɛɛns wʋsa nwɛnɛ ku'om na tuaki li buati ni nɛ; ba fa'as nɛ nwɛnɛ uusʋg nɛ; o makid tembanɛ ka ku'om gilig la wʋʋ titanbʋʋlʋg nɛ. 16 Lebanon tiis la wʋsa pʋ siak maan bimbim la zug bugum nyu'orɛ, bɛɛ bʋnkɔnbid banɛ bɛɛ ani la siak maana maalʋgɔ. 17 Buudi wʋsa ka' si'el o tuonnɛ; ba anɛ zaalim o nini ni. O gɔsi ba ka ba ka' vɔɔnrɛ. 18 Anɔ'ɔn ka fʋ na mak nɛ Wina'am? Ka bɔɔ bɛ ka fʋ na nɔki zemis nɛ o? 19 Ya'a anɛ ba'arɛ, banɛ kpi'ed la maali li, ka banɛ kʋnt sanlima la buligi li nɛ sanlima ka maal anzurifa zɔnti niŋi li. 20 Dau kanɛ an nɔŋdaan ka pʋ mɔr sanlima bɛɛ anzurifa la, gaŋidi daug kanɛ ka sibig kʋ nyaŋɛ dii, ka bɔ onɛ mi' kpi'eb sʋ'ʋŋa ka o maal ba'akanɛ na zi'en sʋ'ʋŋa ka kʋ lii. 21 Ya zi'ii? Ya nam pʋ wʋmm? Ba pʋ yɛli ya pin'ilʋgʋn saa? Ya pʋ gban'e li gbin dunia pin'ilʋg saŋa la saa? 22 O zin'inɛ o na'am gbauŋ zug dunia nwa' ni, ka nimbanɛ bɛ teŋgbauŋ la zug nwɛnɛ sisɔma nɛ. O tiɛn saŋgbana la wʋʋ fuug nɛ, ka yadigi ba wʋʋ sʋgʋr ka ba ti' ye ba kpɛn' nɛ. 23 O kɛ ka kpi'emnam lieb zaalim, ka sie dunia na'anam paŋ ka li lieb zaalim. 24 Ban sɛɛ ba naae bɛɛ bʋdi ba, ka ba bɔɔd nya'a ba'ab la, ka o kpɛn da'ae pɛbisim gɛɛli ba ka ba kʋdig, ka sisi'epiliŋ piisi ba ka ba mɛlim wʋʋ udug nɛ. 25 “Anɔ'ɔn ka ya na nɔki mak nɛ mam bɛɛ anɔ'ɔn zem nɛ mam?” Onɛ an Kasi la yɛl ala. 26 Gɔ'ɔnim gɔs saŋgbana la: anɔ'ɔnɛ maal nɛ' wʋsa? Onɛ maal nwadbibis la wʋsa ka buonnɛ ba wʋsa yʋda yinne-yinne. On mɔr kpi'euŋ nɛ paŋ tita'ar la zug, baa yinne pʋ bɔdigida. 27 Bɔ ka ya nyɔnna, Israel? Israel, bɔ ka fʋ fabin ye, “Zugsɔb la zi' m tɔɔg la yɛllɛ bɛɛ o ba'a kae nɛ ban na mɔŋim bʋʋdɛ?” 28 Fʋ nam pʋ baŋɛɛ? Fʋ nam pʋ wʋmm? Zugsɔb la anɛ Wina'am onɛ bɛ saŋa wʋsa, onɛ maal dunia la wʋsa. O pʋ gɛɛnda, o mɛ pʋ tadigida; ka on gban'ad si'el gbin si'em la, sɔ' kʋ nyaŋi baŋi lii. 29 O tisid banɛ tadig la paŋ ka paasid banɛ an tadimnam la kpi'euŋ. 30 Hali na'akim nɛ pu'asada tadigid ka dasam tu'usidi lit; 31 amaa banɛ mɔr ti'ir nɛ Zugsɔb la na paam paŋ paal. Ba na bus kpʋkpama wʋʋ silʋg nɛ; ba na zɔ ka kʋ tadigɛ, ba na keŋ hali ka kʋ nwi'e.