Sastra Indonésia entu atu istilah nyang ngrungkunin macem-macem jandrah sastra Asia Kidul-wètan.
Sastra Indonésia bisa ngeruju' ke sastra nyang dikeja di Nusantara. Luasnya mah, ni istilah dipaké bakal ngruju' ke sastra nyang dikeja di wilayah-wilayah nyang basanya berales deri basa Melayu (nyang mana basa Indonésia entu atu potèlannya). Ni bisa ngeranggeh ampé wilayah merin Asia Kidul-wètan, masup Indonésia, èn juga' laèn-laèn negara nyang basanya medu, kaya' Malésia, Bruné, èn orang-orang Melayu di Singapur.
Istilah "Indonesian literature" dalem ni makalah dipaké bakal ngruju' ke Indonésia punya sepegimana keserat dalem bangsa Indonésia, serènta nglingkup sastra nyang ditulis dalem ni basa punya bentuk kolotnya, nya'entu basa Melayu nyang ditulis di Hindia Nèderlan.
Seklèbat delokan
Di jaman-jaman awal sejarah, Indonésia tau jadi atu sintrem dagang di antara orang layar ama tukang dagang deri Tiongkok, Hindi, Èropa, ama Wètan Tenga. Lagito, Indonésia masing jadi Welanda punya (sek. 1600–1942) èn Nipong (1942–45). Dia punya terdisi sastra kesawaban ama ni budaya pada, kebanyakannya deri Hindi, Parsi, Tionghoa, èn nyang paling belakangan, Èropa Kulon. Cuman gè', lantaran dia punya has Indonésia nyang laèn dèwèk, mangka dianggep jalan èn terdisi kepisah. Kalo diliat deri rèntètan wayahnya, sastra Indonésia bisa dibelèk jadi berapa jaman:
- Pujangga Lama: (sastra terdisionil)
- Sastra Melayu Lama
- Angkatan Balé Pustaka (sedari 1908)
- Angkatan Pujangga Baru (sedari 1933)
- Angkatan 1945
- Angkatan 1950–1960-an
- Angkatan 1966–1970-an
- Angkatan 1980–1990-an
- Angkatan Répormasi (1998–2004)
- Angkatan 2000-an atawa Angkatan Abisrépormasi (sedari 2005 ampé wayah gini)
Ni jaman sebenernya pada tumpang tindi, mangka kata nyang biasa dipaké bakal ngebelèk ni jaman pada entu "angkatan" nyang sebenernya lebi ngruju' ke gerakan deripada rèntètan jaman. Misalnya, Sastra Melayu Lama entu ditulis juga' ampé abad ke-20-an. Serènta juga', Angkatan Pujangga Baru juga masing getap hata ampé nongolnya Angkatan 1950-an.
Aliran-aliran
Réalisme
Réalisme entu atu aliran sastra deri Kulon paké setil penggambaran keidupan èn masarakat sejaman apa adanya. Dalem kesastraan Indonésia abad ke-20, nama-nama tokoh utama nyang alirannya réalisme antara laèn: Abdoel Moeis, Marah Roesli, Achdiat K. Mihardja, Utuy Tatang Sontani, Pramoedya Ananta Toer, W.S. Rèndra, ama Taufiq Ismail. Tukang sastra deri Lembaga Kebudayaan Rakyat (Lekra) jaman 1950–1950-an juga diarain ama réalisme sosialis.
Réalisme ajaib
Réalisme ajaib entu aliran sastra nyang maké pendeketan kenyataan saban sarian paké gabregan ama unsur ajaibnya juga di dalem. Di Indonésia, ni aliran sanonya dikenalin ama Danarto. Adapun laèn-laèn tokohnya entu Éka Kurniawan, Iwan Simatupang, èn Putu Wijaya. Mualip nyang maké réalisme ajaib dalem dia punya gegawéan entu Ayu Utami, èn laènnya. Simbolisme: Kaga' kaé réalisme ama natiralisme, tokoh-tokoh deri aliran simbolisme entu maké perlambangan, sindiran, kiasan, gambar resia, èn banyak badé-badéannya, kaya' Toto Sudarto ama W.S. Rèndra (awal-awalnya) punya sair.
Modèrenisme èn wanggar
Modèrenisme seni èn wanggar (avant-garde) di Èropa udah mulain semprakan abad ke-19 jadi gerakan nyang nglingkup macem-macem aliran. Dia punya gawéan sipatnya jajal-jajalan, ngoyod (radikal), èn kaga' lumbrah. Di Indonésia, misalnya, ni setil ditemuin dalem saja'-saja' bèbas pikangan tukang sair pembaru Chairil Anwar èn Iwan Simatupang punya gawéan.
Néo-romantisisme
Harkat Néoromatik nongtot di dékade 1880-an jadi tanggepan bakal modèrenisme èn ngejal bakal ngasi tekenan ama si tokoh punya perangsaan èn keidupan, sepegimana jaman Romantisisme punya gawéan. Tukang sastra Indonésia pada nyambut ini harkat liwat sastra Welanda. Sipat romantik kena ditemuin di Sutan Takdir Alisjahbana ama Rivai Apin punya gawéan.
Suréalisme
Suréalisme entu atu aliran modèrenis ama wanggardis. Selaènnya réalisme, gawéan suréalis gableg unsur kaga' masup akal, kagètan, barang kaga' kenyana nyang ditaro sili dedeketan sonder alesan danta. Tukang sair Dimas Arika Mihardja entu atu tukang sastra Indonésia nyang maké ni setil aliran. Kekaga'-masupakalan: Pilsapat kekaga'-masupakalan (absurdisme) berales ama kepercayaan ama kaga' adanya ma'na kalo manusia punya usaha dalem nyari arti keidupan entu kadanan èn bakalan ujungnya bantet. Di antara tukang sastra Indonésia nyang nganut ni setil kekaga'-masupakalan entu Budi Darma, Putu Wijaya, ama Aloysius Slamet Widodo.
Sastra populèr
Karang-karangan populèr sebagé lamatan budaya populèr dimaksudin bakal komersil punya berasil. Sastra populèr bentuk jandrahnya entu cerita tukang serep (detektif), ceritra cinta-cintaan, cerita kelayaban, angen-angen (fantasi), èn laènnya. Misalnya di Indonésia, ada roman-roman cinta Herlinatiens ama Primadonna Angèla punya bikinan. Atu bentuk sastra populèr entu karangan (fiksi) "mètropop", atu gawéan sastra nyang ngangkat ceritra pasal kawasan kota nenga nyang tinggal di kota-kota gedé dengen sisik melik keidupannya, diangsrongin paké setil basa populèr. Mualip Indonésia nyang bekèn lantaran dia punya gawéan mètropop antara laèn: Ika Natassa, Ilana Tan, èn Ria N. Badaria.
Sastra wangi
Sastra wangi entu geroan bakal gawéan sastra Indonésia deri mualip dames (Ayu Utami, Déwi Lestar, Djenar Maésa Ayu, Fira Basuki, Nova Riyanti Yusuf) nyang dia punya tèma entu pengènggalan èn sèksualitèt wadon.