Kué kembang goyang (hurup Arab Gundul: کوى کمبڠ ݢويڠ) entu atu kué has Betawi. Nama kembang goyang entu deri mawjudnya nyang mirip ama kelopak kembang èn pengejaannya digoyang-goyang ampé adonannya coplok deri cètakannya.
Latar Belakang
Kué kembang goyang dikeja deri tepung beras. Enni kué disebut kembang goyang lantaran pas mau digorèng cètakannya digoyang-goyanin di minyak panas. Lambat laun, enni kué juga ngalamin penambasan rasa nyang macem-macem. Berapa tètès sari prambosen, sari pandan, èn kwijèn bagèn jadi macem-macem rasa ampé nambahin warna bakal kembang goyang punya tampang keliatan cakep. Enni kué ditaro di toplès atawa gelèt nyang bening èn ditata bagèn cakep. Sama kaya' namanya, kué kembang goyang mawjudnya mirip kaya' kembang nyang lagi mekar. Entu kembang goyang entu nama atu periasan nyang dipasangin bakal sanggul kondè' èn enni kembang goyang bisa gerak-gerak atawa goyang-goyang lantaran ada punya pèrnya.
Kué kembang goyang udah jadi suguan has masarakat Betawi èn lajim disuguin pas lagi lebaran èn pas lagi keriaan. Kué kembang goyang juga jadi atu kué tradisionil nusantara nyang disuguin bakal tamu nyang lagi silaturahim lantaran kalo dirasanin rasanya entu gurih-gurih kres. Kué kembang goyang juga dikenalin sebagé kué kembang loyang atawa kué loyang kalo di pulo Sumatera. Melèngken orang Bali, wabilhusus orang Hindu, lajimnya maké enni kué kembang goyang jadi atu sesajén pas ari raya Nyepi.
Bahan èn cara ngeja kué kembang goyang
Bahan
- Telor ayam
- Gula pasir
- Garem
- Tepung beras nyang udah diayak
- Tepung sagu nyang udah diayak
- Santen
- Kelapa
- Kwijèn puti
- Minyak gorèng
Cara ngeja
- Kocok telor ayam ama gula ampé ngembang.
- Masupin tepung beras èn tepung sagu nyang udah diayak, garem, santen, èn kwijèn puti.
- Aduk sampé kecampur èn kalis.
- Panasin minyak gorèng.
- Celup cètakan kué kembang goyang ke dalem adonan, jaga jangan ampé permukaan cètakannya ketutup adonan juga.
- Abis minyak panas, langsung sigrah masupin cetakan nyang udah baluran ama adoannya ke dalem minyak, cuman jangan nyentuh dasar penggorèngan.
- Gorèng sambil goyang-goyangin cètakan ampé adonannya kelepas.
- Kalo udah rada kuning, angkat terus tirisin minyaknya.