Basa Mardèker entu basa kacukan dasaran Portugis nyang tau ada di Jakarta. Ni basa dulunya basa aslinya orang Mardèker. Ni basa dasarannya diperkenalin pas awal-awal dijejeginnya penjogrogan Welanda di Betawi (wayah gini Jakarta). Orang Welanda pada boyongin dia punya budak deri jajahannya nyang dicedèk deri Portugis, èn itu basa kacukan Portugis jadi basa kongko di itu kota baru. Namanya dicomot deri basa Welanda nyang artinya "orang merdèka", bahna itu budak pada dilosin rep abis ngejogrog di situ. Ni basa lama-lama keisal ama basa Betawi di pengabisan abad ke-18, sebab orang Mardèker pada kawin kisaran ama laèn kaum ampé idèntitètnya pada ilang. Cuman, barang tahon 1670, serombongan orang 150 pada mijah ke tempat nyang wayah gini digeronya peminggiran Tugu, di mana dia pada opènin dia punya basa, nyang digeronya Papiá, ampé 1940-an.
Catetan ni basa nyang paling gaèk entu dicatet dalem atu daptar kata nyang digemborin di Betawi tahon 1780, nama Nieuwe Woordenschat. Orang paling akir nyang gapa ngomong ni basa namanya Oma Mimi Abrahams nyang wapat tahon 2012 èn basanya tinggal ada di lagu-lagu lama Keroncong Moritsku (Keroncong Tugu) doang.