ဝၼ်းသဝ်၊ မေႇ 4၊ 2024
ၵပ်းၵၢႆႇလူၺ်ႈ ၸဝ်ႈၸွမ်ၸိုင်ႈ ဢမႄႇရိၵၢၼ်ႇ ၵျူဝ်းပၢႆႇတႅၼ်ႇ မွၵ်ႇလၢတ်ႈဝႃႈ ဢိၼ်းတီးယႃႈ လႄႈ ၵျႃႇပၢၼ်ႇၼႆႉ မိူၼ်ၵၼ်တင်း ၶႄႇ လႄႈ ရတ်ႈသျႃး ယွၼ်ႉပိူဝ်ႈ ဢမ်ႇၶႂ်ႈႁပ်ႉ ၵူၼ်းၼွၵ်ႈမိူင်းလႄႈ လႆႈၶတ်းႁႅင်း ပၢႆးမၢၵ်ႈမီး ယၢပ်ႇယၢပ်ႇယဵၼ်းယဵၼ်းယူႇ ဢၼ်ဝႃးၼၼ်ႉသေ ၸိူဝ်းပဵၼ် လူင်ပွင်ၸိုင်ႈ ဢိၼ်းတီးယႃး လႄႈ ၵျႃႇပၢၼ်ႇၶဝ် လႆႈတွပ်ႇလၢတ်ႈၶိုၼ်းယူႇယဝ်ႉ။
လူင်ပွင်ၸိုင်ႈ ၵျႃႇပၢၼ်ႇ တွပ်ႇၶိုၼ်းဝႃႈတႄႉ လွင်ႈဢၼ် ၸဝ်ႈၸွမ်ၸိုင်ႈပၢႆႇတႅၼ်ႇ မွၵ်ႇလၢတ်ႈၵႂႃႇၼင်ႇၼၼ်ၼႆႉ ပဵၼ်ဢၼ်လႆႈၸႂ်ဢမ်ႇလီၸွမ်းသေ မၼ်းဢမ်ႇႁူႉပွင်ႇလီလီငၢမ်းငၢမ်းဝႃႈ လွင်ႈဝႃႈ ၵျႃႇပၢၼ်ႇတမ်းလၵ်းၵၢၼ်ၸိူင်ႉႁိုဝ် ဢၼ်ဝႃႈၼၼ်ႉသေ လႆႈလၢတ်ႈၵႂႃႇ ဝႃႈၼႆယဝ်ႉ။ တီႈၼႂ်း ၶေႃႈပိုၼ်ၽၢဝ်ႇ လူင်ပွင်ၸိုင်ႈၵျႃႇပၢၼ်ႇ ၼၼ်ႉဝႃႈ ၶေႃႈတွပ်ႇၶိုၼ်းၵျႃႇပၢၼ်ႇၼၼ်ႉၵေႃႈ လႆႈပွင်ႇၶၢဝ်ႇၸူးထိုင် ႁိူဝ်းၵႅဝ်ႈၶၢဝ်သေ လႆႈသပ်းလႅင်းၼႄ လၵ်းၵၢၼ် လႄႈ လွင်ႈၸုၵ်းယၼ် ၵျႃႇပၢၼ်ႇ ၵႂႃႇထႅင်ႈယူႇ ဝႃႈၼႆ။
ၽၢႆႇမိူင်းဢိၼ်းတီးယႃးၵေႃႈ ဢၼ်ပဵၼ် ၽွင်းလူင် ၵၢၼ်ၼွၵ်ႈမိူင်း ဢိၼ်းတီးယႃး Subrahmanyam Jaishankar လႆႈတွပ်ႇၶိုၼ်းဝႃႈ ဢိၼ်းတီးယႃးၼႆႉ ဢမ်ႇၸႂ်ႈပဵၼ်မိူင်း ဢၼ်ဢမ်ႇလႆႈၸႂ် ၵူၼ်းၼွၵ်ႈမိူင်းသေ ပဵၼ်မိူင်း ဢၼ်မီးပိုၼ်း တူင်ႇဝိူင်းၵူၼ်း ဢၼ်ပွင်ႇလႅင်းလီၼၼ်ႉယဝ်ႉဝႃႈၼႆ။ လိူဝ်သေၼၼ်ႉဢမ်ႇၵႃး ၽွင်းလူင် Jaishankar လႆႈမွၵ်ႇလၢတ်ႈတီႈ လၢႆးၵၢၼ်ထၢမ်တွပ်ႇ လိၵ်ႈၽိုၼ်ၶၢဝ်ႇ Economic Times ဝႃႈ ပၢႆးမၢၵ်ႈမီး ဢိၼ်းတီးယႃးၼႆႉ မၼ်းၼိမ်မၼ်ႈလီယူႇ ဝႃႈၼႆယဝ်ႉ။
ၸဝ်ႈၸွမ်ၸိုင်ႈ ပၢႆႇတႅၼ်ႇ ဢၼ်တိုၵ်ႉၶတ်းၸႂ် တႃႇႁႂ်းမၼ်း ထုၵ်ႇလိူၵ်ႈၶိုၼ်းတီႈ ပၢင်လိူၵ်ႈတင်ႈၸဝ်ႈၸွမ်ၸိုင်ႈၼႆႉ မၼ်းမွၵ်ႇလၢတ်ႈ တီႈ ပၢင်သူၼ်းတုမ် ဢၼ်ႁဵတ်းမိူဝ်ႈဝၼ်းပုတ်ႉၼၼ်ႉဝႃႈ ၸိူဝ်းပဵၼ် မိူင်းၶႄႉၶဵင်ႇ ဢမႄႇရိၵၢၼ်ႇ ဢၼ်ပဵၼ် ရတ်ႈသျႃး လႄႈ ၶႄႇ သေဢမ်ႇၵႃး ၸိူဝ်းပဵၼ် မိူင်းဢူၺ်းလီ ဢၼ်ပဵၼ် ၵျႃႇပၢၼ်ႇ လႄႈ ဢိၼ်းတီးယႃး ၸိူဝ်းပဵၼ် မိူင်းႁႅင်းယႂ်ႇ သီႇမိူင်းၼႆႉ ၶဝ်ဢမ်ႇမီးၵၢင်ၸႂ် တႃႇႁပ်ႉ ၵူၼ်းၼွၵ်ႈမိူင်း ၸိူဝ်းၶၢႆႉလၢႆႈဢွင်ႈတီႈယူႇလႄႈ တီႈဢၼ်ႁဵတ်း တႃႇႁႂ်ႈပၢႆးမၢၵ်ႈမီး ၶိုၼ်ႈယႂ်ႇၼၼ်ႉ လႆႈထူပ်း တၢင်းယၢပ်ႇၽိုတ်ႇဝႆႉယူႇ ဝႃႈၼႆယဝ်ႉ။ ၸဝ်ႈၸွမ်ၸိုင်ႈ ပၢႆႇတႅၼ်ႇ လႆႈဢဝ်ၵုင်ႇမုၼ်သေ လၢတ်ႈဝႃႈ မိူင်းဢမႄႇရိၵၢၼ်ႇတႄႉ ယွၼ်ႉဢမ်ႇမိူၼ်မိူင်းၸိူဝ်းၼၼ်ႉသေ ယွၼ်ႉႁပ်ႉတွၼ်ႈၵူၼ်းၼွၵ်ႈမိူင်းလႄႈ ပၢႆးမၢၵ်ႈမီး ဢမႄႇရိၵၢၼ်ႇၼႆႉ လႆႈမၼ်ႈၵႅၼ်ႇႁႅင်းယႂ်ႇ ယူႇယဝ်ႉ ယၢမ်းလဵဝ် ဝႃႈၼႆယဝ်ႉ။
ငိူၼ်ႈငဝ်ႈတိုၼ်း edit
- Seung Min Kim. "President Joe Biden calls Japan and India ‘xenophobic’ nations that do not welcome immigrants" — AP News, May 3, 2024
- Associated Press. "Japan, India reject Biden's comments describing countries as 'xenophobic'" — VOA News, May 4, 2024
- Bernd Debusmann Jr. "Joe Biden calls US allies India and Japan 'xenophobic'" — BBC News, May 3, 2024
- Aljazeera. "India, Japan dismiss Biden’s ‘xenophobic’ comment" — Aljazeera, May 4, 2024
- Michael D. Shear. "Biden Calls Japan and India ‘Xenophobic’ in Defending U.S. Immigration" — The New York Times, May 2, 2024
- Arlette Saenz လႄႈ Colin McCullough. "Biden calls US ally Japan ‘xenophobic’ along with India, Russia and China" — CNN, May 2, 2024
