Linumis dilo tadau tumonob au kaanu popotonob do koruolon ginawo di Ritah. Oruol ginawo dau kosorou di tongotobpinai dau di aiso manangkabaya do muli. Duo nodi toun nakatalib om iso-iso kasari isido pointamong di tama dau tu poinsokot nodi id galam. Okon daa ko aiso o iman-imanon nga au isido asaga monongkiad di tama dau songulun id kampung.
I nopo daa di duo toun nakatalib nga kinoowio di Ritah panaasan SPM. Osonong tomod daa o kootuson naanu dau id panaasan dii om osorou-sorou no daa dau mooi pongoput kawagu sikul hilo id labus pogun tu nakaanu sikulasip mantad porinta. Agayo o angkab om iman-imanon dau sumiliu songulun dokutul om nogi monguhup popoburu do paganakan. Sabaagi tulun toomod, au gia oiloilaan o karalan-ralano om kaantakan diti koposion. Duo minggu pogulu i mamanau mooi kawagu sikul, sikog ka om nohunduk i tama dau id popodsuon. Soira noilaan nga noontok i tama dau do toruol kanser. Laid no daa i tama dau kopuriman do oruol nga sansagan dau kumalaja om au nogi dau posunudon ii kumaa tangaanak tu mada do mongudipon diolo.
Minuli i tobpinai dau ontok di nohunduk i tama diolo nga minisoguli goduo i. “Au milo tongkiadan i tangaanak ku. Aiso ngaawi o madtamong tu kumalaja i koruhangku”, ka di taka’ dau, i Rindah. I nopo tabangon dau om au no oilaan kulom hombo no pinakayaan tu laid no au nokouli om posubu-subuon po au insan mamaramit soira tolipounan. “Iya nopo madtamong di gama tu aiso o katangkangahan. Manahak oku tusin monikid tulan”, ka kawagu di taka dau tiso, i Rianah i poingkalaja id kadai ponombiran. Maan nopo daa toboyo om kumaus no daa isido di tobpinai dau nga isai gia indo piintong momogompi di tama diolo.
Olunggui kopio i Ritah tu mamanau ngaawi no i koombolutan dau mooi sikul om songulun po di isido pointimporon id kampung. Mihad po daa ginawo dau nga aiso guno tu au kaanu monimban kinaantakan. “Poingkuro po nga aiso no ralan diti suai. Toguangon ku nopo miampai kalansanan do haro daa babang koposionku insan tadau’, ka nopo dau monginsasamod do ginawo.
I nopo timpuunon po, oudipon o tinan om pomusarahan di Ritah tu au gia oubas maganu-anu id dumo miagal di wokon. Maid-laid nga oubas nodi i Ritah momonsoi kalaja id dumo tu soira haro tulun kampung papaharo mogitatabang, mongoi kasari isido tanud. “Amu gia ti koilo nung au mintong om mumbal momit dilo wokon. Mada oku yoho mindahu no om muli kampis barait indo”, ka id pomusarahan dau. Soira nokoumbal do momutanom om nakaanu do asil, kopomusorou nodi i Ritah popoinlaab pongindopuan dau miampai momoguno mogikaakawo aplikasi id tolipaun. Ounsikou isido kumaa Minamangun tu wanadan kasari o goos dau om noonuan nogi isido tonggom di osogit.
Sundung do ingkaa, au daa insan kotingkod i tama dau monuhu mooi sikul tu osianan kokito di Ritah posisindaan nosiliu momuumutanom. “Au oku sitongkiad dia, ama. Nunu nangku kokua’an momuumutanom pia kaakan kasari i mantad asil di aanu”, ka di Ritah monginsasamod ginawo di tama dau. Tadau miolon tulan, tulan miolon do toun om okon nogi di ko lumingos toruol di tama dau nga mumang nogi di sogoi. Olunggui kopio ginawo di Ritah soira minidu pogun i tama koupusan dau. I po pason do tama dau pogulu minidu pogun o monginsasamod ginawo dau. “Kapatayon nopo nga au milo ilagon. Daamot poimpasi, potoboyon no ginawo monoguang nunu nopo kobolingkahangan miampai poinlansan kasari kumaa Minamangun”, ka.
Mantad nawayaan ngaawi id koposion, nosiliu i Ritah songulun di loobi otoboi om agaras. Sumoonu, ralan nopo Minamangun do manahak ponontudukan om barakat dau nga okon nopo ko maya buluntung togingo nga maya nogi rasam tasapou om luyud id koposion. Suai tulun, suai o susuyan do koposion nga oponsol do poingonggom kasari sunduan om kalansanan montok monoguang koposion.
Sinuat di: Jilorisa